Holy Land ih Catholic Biakinn pakhat sungih thinglamtah, mipi ih upat sunsak zetmi kutser pawl siatsuah theutu vandal timi pawl in an fir

Holy Land ih Catholic Biakinn pakhat sungih thinglamtah, mipi ih upat sunsak zetmi kutser pawl siatsuah theutu vandal timi pawl in an fir (August 24, 2021)

              Irael police pawl cu Holy Land, Tabgha khua ih Sang le Nga Pungzai ter nak Biakinnpi sungta zungruk (6”) sau, thiir thawn tuahmi thinglamtah firnak thawn pehpar in zingzoinak an tuah rero lai a si tiah AFP cun August 21 ah a than. Himi Biakinnpi saknak hmun hi, Bawi Jesuh in sang le nga pungzai ter in minung tampi rawl a rak donak hmun a si tiih pom mi khal a si. An fir mi thinglamtah cu Biakinnleng lam ih meisatlang puak ihsin suakmi lungto phun thawn tuahmi biaktheng parah thawn theihlo dingin bun fek mi a si ih, Galilee tili kap tluan ih Missa raithawinak tuah tinte’n rak hman theu mi thinglamtah a si.

            Holy Land ih German pawlkom (DVHL) aiawhtu, Georg Rowekamp cun, hi thinglamtah firnak thawn pehpar in Christian zumnak dodal duh ruangih tuahmi a si ti’n a sim. Himi Biakinnpi khal cu Holy Land ih German pawlkom pawl ih Biakinnpi a si. “August 19 zinglam ah hi thiir-thinglamtah cu thazang hmangin khiah hnu ih hlo mi a si thu kan hmusuak a si” tiah Rowekamp cun CNA thuthang darhnak ah August 23 ah a sim. “Himi tuah dingah thazang nasa tak ih suah tul dinhmun a si tikah, himi tuahtu pawl hin tumtahmi nei rori ih tuah hrim an si ko” ti khal in a sim bet.

            Hi tawk hmun cu mipi hrangih on a si hrih lo tikah, thinglamtah siatsuah ih firtu vandal pawl hi Galilee tili lam ihsin lawng thawn rami an si ding zum a um thu khal Rowekamp in a sim. Cuihleiah, “Tuitum thil cangmi ruangah kan thin a nuam lo nasa; 2015 kum lai khal ah hitawk hmunah mei-ur ih siatsuahnak a rak cang dah tikah kan thin in phang ter sinsin” ti’n khal a sim bet.Hiti vekih Sang le Nga Pungzai ternak Biakinnpi ih siatsuahnak a ton hi tu lawng ah a si lo. 2015 lai khalah mei-ur ih siatsuahtu pawl in Biakinn thilri pawl an rak ur ih, Biakinn luhnak lam hi nasa tak in an rak siatsuah ih hleiah, Hebrew tongfang in “lem-zuk pawl hmuahhmuah siatsuah an si ding” timi khal an rak ngan dah a si.

Source: CNA - Catholic News Agency (August 24, 2021)

https://bit.ly/3Bbl0d7