2023 ih tuah ding mi leitlunhuap mino puai ih tel dingah American Bishop pawl in sawm October 11, 2021

2023 ih tuah ding mi leitlunhuap mino puai ih tel dingah American Bishop pawl in sawm

October 11, 2021

         American Catholic Bishop pawl pawlkom ih kut thuai ih um kohhran pi pawl, thit umnak, innsungsang le mino thawn pehpar mi commission ih hotu Archbishop Salvatore J. Cordileone le leitlunhuap mino puai cang suaknak ding Committeeih tuanvo nei tu Bishop Edward J. Burns pawl in thuthan ca pakhat an rak suah ih 2023 ah American Catholic mino tampi tidaan pakhat a si lo le pakhat thawn an tel ding tiah ruahsan in an lunghmui zet.

         Mino pawl dinhmun in innteek ram Lisbon tiang fehin an mah rori an tel ding maw a si lo le an mai Diocese sungih an tuah mi leitlunhuap mino pawl ih puaini caanserh pawl ah an tel ding maw; hril ding tampi a um. Ziang vek khal si sehla, mino pawl hnenah a danglam zet mi Pawlpi ih cangvaihnak ah tel dingin a sawm duh thu a rak sim.

         Pope a mah rori in a hoha ding mi leitlunhuap mino pawl puai ni ih Missa Sumnak cu August 6, Bawi Jesuih hmuihmel thleng ni ah a tuah dingih Pathian ih khawkhan mi a si.

         Ziangah tile Bawi Jesuh thawn tlang sangpi parih a kai tu Petru, James, John pawl ih an rak hmuhton mi thilcang cu a cekci mi a si. Leitlunhap mino pawl puai ni khal mino pawl parah hi vek in thathnem nak a um ding tiih a ruahsan thu, mino pawl ih hi puai cu khui hmunah ziang vekin an tuah ding ti a thupi lo. Asinan, mai nunram ih zumnak thleng awknak thupit in tuah ding lawng a si.Leitlunhuap mino pawl puai ni cu hmaisabik ah 1985 ah Pope St. John Paul II in nemhnget in a rak tuah thok. An tuahnak ih tumtah bik mi cu mino pawl khat le khat nel aw dingah, mino ih nemhnget mi kum cu kum 16-35 tiang a si.

         Leitlun ram tin in tel a theih. Hmaisabiknak leitlunhuap mino pawl puai ni cu 1986 ah Rome khuapiah an rak tuah. Asinan, Pawlpi dinhmun in mino pawl ih puai ni cu kumtin leitlunhuap Diocese tin ah an tuah. Leitlunhuap mino pawl puai ni cu covid nat a can hlan 2019 ah Panama ram ah netabik an rak tuah. Panama ram ih an rak tuah theh hnu innteek ram ih an nemhnget mi ram cu Portugal ram, Lisbon khuapi ih tuah dingah a si. A ngaingai ahcun 2022 ih tuah dingah an rak nemhnget. Asinan, covid pulhnat a karh rang tuk ruangah kumkhat an rak thawn. Leitlunhuap mino pawl puai ni ih motto cu 'Maria cu a tim a tuah ih Judea peng tlangpar khua ah zamrang te in a hung feh' ti mi Lk 1:39 sungta a si.

         Nu Maria in Vancungmi Gabriel hnenah 'Pathian ih duhnak vekin si ko seh' tiih a leh hnu ah a u nu Elizabeth hnenah zamrang ten a feh lai mitthlaam in vun hmu sal dingah a si. American Catholic Bishop pawl dinhmun in ramsung lawngah leitlunhuap mino pawlih puaini a tuah duh tu Diocese pawl hrangah a tulsam mi lamhmuhnak cu Internet in an kuat ding.

         American Pyidawngsu ih um Catholic Diocese pawl ah tui kum mino pawl ih puai ni cu 'Jesuh Siangpahrang' puai ni ah tuah ding a si ih a danglam hleice. Cui ni cu November 21 a ciah ding.Kum tinten 'Thulhfau puai, Zarhpi ni' ah tuah a si theu. Pope Francis in September 27 ah kumtin mino pawl ih puai ni tuah nak ding motto cu Tirhthlah 26:16 sung ihsin 'Tho aw; Ka hnatuantu ih hril dingah langnak ka lo hmuh mi a si' ti mi Bible catlang a rak hril sak.

         Hi Bible Catlang cu Pope Francis ih 2023 hrang leitlunhuap mino pawl puaini ih a sim mi pathum sungih pakhat a si. Vatican thawn pehpar mi innsungsang zungpi khal in leitlunhuap mino pawl ih puai ni cu an mai um nak Diocese pawl lawng ih a tuah tu ding Diocese pawl hrangah lamhmuhnak pawl a rak suah.

         Hi thuthang cu Vatican thuthang ih kan ngah  mi a si.

https://bit.ly/3jbMPvm