A zumnak in misual pawl kut ihsin a luat ter tiin Sr.Narvaez in sim October 26, 2021

A zumnak in misual pawl kut ihsin a luat ter tiin Sr.Narvaez in sim

October 26, 2021

              Sr. Narvaez cu "A Thianghlim zet mi Maria Franciscan" Sister riantuantu pawlkom ihsin a si. A liam zo mi kum 5 hrangah amah cu Mali ram ih hna a tuan laiah Islam mi sualral pawl ih kaihnak ihsin a luat tu a si. Zumnak le thlacamnak in in luat ter tiin a sim. Sister cu Colombia ram mi asiih, (2017, February 7) ah kaih a tuar ih, October 9 ah a luat sal. Luat thei dingah Vatican le Colombia Catholic Bishop pawl pawlkom pawl in tongin thu an rel sak. Amah cu Rome a thlen laiah Pope ih tlawngkai nithum tinten khawmzawh pawl a ton caanah a feh. Cutiih a feh laiah Vatican thuthang zungin kaih a tuar lai ih a ton mi dinhmun pawl an sut. A luat ruangah Pathian hnen a lungawi thu, luat thei dingah a zuam tu Pawlpi, Pope, Italy thunei tu pawl hnen a lungawi thu, kaih a tuar laiah Colombia Catholic Kohhran le a Sister a tuanpi a unau pawl cawl loin thla a cam sak thu, cutivek in ramtin kim khal ihsin thei dingah a zuam thu a sim.

A kai tu pawl thwn an rem aw.

              Sister cu kaih a tuar laiah amah a kai tu pawl thawn an pehtlaihawknak a that thu, ziangruangahtile anmah pawl khal upatnak a pek ruangah an upat nak khal a ngah thu, amah cu Catholic mi pakhat lawng siloin, Pathian hnatuantu Sister khal a si ruangah biaknak lam thawn a pehpar awk asile mi khual vekin siseh, mi kai tu pawl ih zummi biaknak lawng a hman mi biaknak a si thu, anmah pawl thawn el aw lo in an sim mi zaten upat zet in ka ngai.

Pathian rori ka zum.

              Sister cu mi kai tu pawl ih hmuhsuam tuar ding a tih lo thu, ziangruangahtile Pathian lawng a zum hnget thu, a cang dingmi hmuahhmuah cang ko seh tiin amah le mah a ruah awk thu, thlacamnak, Saam pawl siarnak pelh loin tuah nak cu Thlarau lam thazang a pek thu le himnak a ngah ter thu, a suah sal tikah a ruah hmaisa bik mi cu Pathian kha thazang, ruahnak neih mi zaten thawn lungawi thu sim dingah asi tiin a sim.

Mali ramih tuah rero mi Franciscan Sister pawl ih hnatuan mi pawl

              Kaih a tuar caanah Mali ram, Karangasso ramthen ih um mi pawl hnen harhdamnak lam a kilkhawi caan a si thu, harhdamnak lam a killkhawi ih hleiah meisa ruangih nu ih tansan mi nu le pa nei lo nauhak 12 hrawng khal a kilkhawi ih, ca ngan, casiar, thil thit, puan ih zuk suai cutivek pawl a zirh thu, cutivek in mipi pawl sumlut um dingah hnatuan tenau pawl hrangah paisa sannak khal a tuah sak thu, a hleice in nunau pawl ih tuah thei mi thil ciin nak hnatuan pawl a bom thu, cutiin innsang in le ei thuamhnaw kha hmun khat khat in bom thei dingah tumtah asi thu, a tuvekih kaih a tuar hnu cui tlawng khal a tan thu, asinan rinsan tlak mi nunau pawlih bom nak program pawl khal tuah bet rero a si tiin a sim. 

Mali ram ih himnak a um lo nak a tam vivo.

              A liam zo mi kum pawl ah Mali ram sung Khristian Pathian hnatuan nak pawl cu a dang misual Muslim pawl hnen ram tha vekin hnaihnok nak pawl ton a si. Himi Muslim misual pawlkom cu "Qaeda le IS" ruahnak luar Muslim pawlkom thawn an pehpar aw. Curuang khalah Sahana hmun tiang an cangvaih thei nak a si. Anmah pawl cu cui hmun ih mi pawl thi hnai suak tiang an tuah ih an biak nak ruahnak a pom lo tu pawl an um ter lo ruangah cui hmun tansan dingah thu a um. Kan dung kumkhat luan hrawng khalah Africa Pathian hnatuan pawlkom Siangbawi Pierluigi Macclli khal Mali ram ah kaih a tuar ih kum hnih a rei ah a luat sal tiin thei a si. Himi thuthang cu Vatican thuthang ihsin kan don mi a si.

https://bit.ly/2ZusDh6