Tuluk ramah Catholic Bishop pakhat thuneitu pawl in kai October 27, 2021

Tuluk ramah Catholic Bishop pakhat thuneitu pawl in kai

October 27, 2021

         Tuluk acozah in Wenzhou ih Bishop Shao Zhumin cu October 26 ah a rak kaih thu Asianews in theih a si. Thuthang vek a si le kum 58 a kim zo mi Bishop cu zung pih ni pawl ah an rak kaih thu, thuthang ih tarlang bet mi cu hi vekih kaih tuarnak cu veikhatnak lawng si lo in Archbishop ih hrilnak a rak ngah nak 2016 ihsin thok in tu le tu a si zo thu a rak tarlang.

         A mai Diocese khal in thuthan pakhat an suah ih ‘Bishop cu tui dinhmun ruangah zumnak le ralthatnak nei dingah, beidong lo dingah, kaih a tuar lai ah a dam ih Bawi Jesuh ih hnemnak thawn thinlung thatho ten um dingah, a Tuuruun pawl hnenih zamrang ten a tlun sal thei nak dingah thlacam sak uh tiah a rak ngan.

         Vatican in a mah cu tui a hoha mi diocese rak hruai tu Bishop Vincent Zhu Weifang a nunnak a cem kum 2016 ihsin tuanvo an rak ap. Bishop Vincent Zhu Weifang kha kum 16 rei thawng an rak thlak. Bishop Vincent Zhu Weifang a thih laiah khal kaih a rak tuar. Curuangah tui kaih a tuar nak cu a hrangah hmaisabik nak a si lo ruangah a thinphang tuk nawn lo. 2017, April thla le May thla sungah khal kaih a rak tuar. May thla ih kaih a rak tuar ah thla 7 hrawng a rei hnu lawngah an rak thlah sal. 2018 ah kaih a rak tuar lala. Kaih a tuar nak cu Tuluk acozah ih thusuah mi vekin a thlun lo ruangah a si.

         Bishop cu 1963 ah a rak suak ih 1989 ah Puithiam cannak a rak ngah. 2011 ah Yongjia Diocese ih Assistant Bishop ah tuanvo an rak pek. Asinan, a mah tuanvo apnak cu Tuluk Catholic Bishop pawlkom le Tuluk acozah tang ih um mi Catholic mipi pawl in an rak cohlang lo.Tuluk ram sungah Catholic pawlkom pahnih a um. Pakhat cu leithuai Kohhran (under ground Church) tiin an ko ih Vatican parah a rin um zet. A dang pakhat cu miphun duhtu Catholic pawl (Patriotic Catholic Church) tiin pahnih a um. A pahnih nak pawlkom cu Catholic a si ko nan Tuluk acozah kutthuai ah a um.

         Leithuai Catholic Bishop pawl thawng thlak nak cu Catholic mipi pawl ih a thupi zet mi Biakthawinak caanserh tuah zik te ni mal te a duh vek ah an kai theu.Tahthimnakah Christmas, thosal, Bawinu Maria Vancungram ih hruainak a ngah puai, Mithianghlim pawl sunloih puai, mithi hrang thlacam ni pawl a si. Kum reilo te ah Wenzhou hmun ih thunei tu pawl in Tuluk Catholic mipi pawl hnenah thlaan ih thlacam lo dingah an rak kham.

         Asinan, Catholic mipi pawl cu Biaknak lam ih zuamzet tu pawl an si. 2021 a thok lam ah khal Xingxiang Archbishop Joseph Zhang Weizhu a rak hlo. Netabik ih theih mi cu Tuluk thuneitu pawl ih rak kaih mi a si. Cu lai ah Bishop lawng si lo in Puithiam hrekkhat le Brother pawl tla an tel. Kaih an tuarnak cu Tuluk acozah ih thusuah mi vekin tuah mi Tuluk acozah kuthnuai ih um mi Kohhran ih lamhruainak an thlun lo ruangah a si.

         Hi thuthang cu CNA thuthang ih kan ngah mi a si.

https://bit.ly/3EAI2vT