Rei lo te ih a thleng ding mi Pope Francis hmuak dingah Cyprus ram in timtuah (November 28, 2021)

Rei lo te ih a thleng ding mi Pope Francis hmuak dingah Cyprus ram in timtuah

November 28, 2021

         A ralai ding mi December 2, tlawngkai nili ah a Tuukhaal khual a tlawng tu ding Pope Francis hmuahnak ah Cyprus ram ih khualipi Nicosia ah tim an tuah theh zo. Tui tum veikhat Pope ih tlawnnak cu Cyprus acozah hrangah thuanthu sungih tang ding mi Tuukhaal khualtlawnnak a si. Cyprus acozah ih sim rel theinak a nei tu ih simnak vek a si le Pope thawn thuthang latu 77 an tel ding.

         Pope ih khualtlawnnak ah thuthang latu 200 luan in thuthang an la ding. Tuukhaal khualtlawnnak cu ni rei lo te sung a si ko nan Cyprus ih um ding mi netabik ni caanserh pawl a tam tuk. Cui ni ah Missa sumnak khal ram ih lehpannak zung ah hoha in a tuah ding. Catholic mipi za leng lo mi pawl khal in Pope thawn Missa sumnak ih an tel ding.

         Tamsawn cu tifinriat kiang in Pope thawn Missa sumnak tuah dingah hmun hlapi ihsin an feh ding. Pope cu mi harsa pawl, mivai pawl thawn khal an tongawk ding. Cui hnu ah a dang Christian biaknak pawl le Catholic biakinn a si mi ‘a thianghlim mi Thinglamtah’ Biakinn ah thla an cam tlang ding. Cui Biakinn cu a bang aw lo mi tong phun 8 thawn Missa raithawinak a tuah theunak Biakinn a si thu a sim.

         Hi khualtlawnnak sungah Pope cu Cyprus President ih inn ah a leng dingih President khal in cibai a rak buuk ding. Cui hnu ah nunphung rothil kilkhawi dingah, zumnak a bang aw lo mi biaknak pawl thawn thlacam tlangnak, biak nak a bang aw lo mi pawl thawn um tlang theinak lam rel tlangin khai sang dingah, Cyprus ram sungah hmuhton rero mi buainak, mivai tu pawl hrang, mi harsa pawl le milai covo pawl thuhla, leillungpi a hringhro rero tu covid-19 thuhla reltlang dingin a ruah san.

         Pope cu Cyprus ih Orthodox Pawlpi hotu, Archbishop Chrysostomos II khal cibai a va buk ding. Cui hnuah Catholic Pawlpi ih biaknak lam hotu pawl thawn thu an rel tlang ding. Catholic Pawlpi le Orthodox Christian Kohhran lakah a hnget khoh mi lungrualnak um ding tumtah in tui tum Pope Francis Cyprus ram ih a feh nak cu 2010, a cawl zo tu Pope Benedict 16 a feh hnuah a veihnihnak a tlawnnak a si tiah an sim.

         Pope Francis cu Cyprus ram in December 4 ah a pok dingih Greece ram ih khualipi Athens ah khual a tlawng bet ding. Himi thuthang cu Vatican thuthang ihsin kan don mi a si.

https://bit.ly/3I71AKQ