Tidai pil ruangih rak thi tu mivai nauhak pawl rak hruk (life jacket) mi nun runnak angki. (December 1, 2021)

Tidai pil ruangih rak thi tu mivai nauhak pawl rak hrukmi (life jacket) nun, runnak angki.

(December 1, 2021)

         Mai umnak hmun a him lo ruangah siseh, pumcawmnak a remcang nak hawl dingah siseh, tifinriat kha harsa zetin taan in Europe ih um dingah zuam in nunnak tampi a liam tu an um vekin, harsa zetih a tlan tu pawl lakah nu le pa pawl fehnakih a tel tu kum kim lo nauhak pawl tla an um. Tifinriat taan lai ah nunnak a rak liam tu nauhak nunau ih rak hruh mi nunnak runnak angki cu Vatican ih ret dingah an rak pek. Hi vek ih retnak cu cui nauhak mang ringring dingah si lo in hi thilcang mi mang salnak dingah a si tiah an sim.

         2016 ah Pope Francis Greece ram, Lesbos ih um mi harsa pawl umnak ah feh in a rak hnem hnu Vatican ih a tlun lai ih miharsa hrekkhat Rome ah a rak hruai ih a cozah a si lo mi NGO pawlkom khal in Pope hnenah cui nunnak runnak angki cu laksawng ah an rak pek. Cui acozah si lo in nunphung bomnak pawlkom dintu Oscar Camps in hi vekih tuahnak cu Lesbos mi harsa pawl umnak ih thilcang mi kan mah thawn keng dingah a si thu, tui nunnak runnak angki cu an rak run thei lo mi kum ruk mi nauhaknu te ih a rak hruk mi angki a si.

         A mah cu a mai innsang pawl thawn tidai sungih an rak pil thu, hi thuhla cu Pope an simfiangih Pope khal a thinnuam lo thu, cui nunnak runnak angki kai in a rak lak thu, 2019 ah khal ziangvek harsatnak tong in a rak hruk ti theih lomi Thinglamtah pakhat le nunnak runnak angki khal Pope an rak pek tiah a simfiang. Pope khal in 2019, December 19 ah a rak cohlan mi cui Thinglamtah le nunnak runnak angki pawl mi hmuh thei nak ding hmun ah a ret. Thinnat thlak zet mi hi thilcang vek hmu in mang dingah, milai nunnak bawm ding cu mi tinkim in tuanvo an neih thu thei ter dingah, hi thilcang cu Biaknak bang awk lo nak ruangah siseh, miphun bang awk lo ah siseh mi tin bawm daan a si tiah Pope Francis in a rak sim.

         Cui nunnak runnak angki cu Pope ih zungpi luhnak ah an ret. Hi thilcangah minung thawng za leng lo pawl in an mai umnak hmun siang lo na cingin an tansan ih leiram thar a hawl rero tu pawl an um kha mangsal dingah a si tiah a sim.

         Hi thuthang cu Rome Reports thuthang ih kan ngah mi a si.

https://bit.ly/3lrZXxx