Orthodox Kohhran hotu Leronymos II in Pope Francis Rome a tlun hlan ah a va tong ta. (05 December 2021)

Orthodox Kohhran hotu Leronymos II in Pope Francis Rome a tlun hlan ah a va tong ta.

(05 December 2021)

         Orthodox Kohhran hotu Leronymos II nak le Greek mipi pawl in Zarhpi ni, zaan nazi 7:00 pm ah Pope ai-awh tu zung an thleng ih Pope Francis cibai an va buuk ta. Hotu pahnih ih tonawknak cu minute 30 hrawng a rak rei. An tonawk lai ah mikhual ca uk sungah lethmat an rak tthu. Cu tiin an tthu ih Orthodox Archbishop Leronymos II in ‘Tui zaan December 05, 2021, St. Sabbas ih puai ni hmannak ah kei mah le kohhranpi pawl cu Pope zungah kan thleng ih Greece ram ih a thleng tu, Rome khuapi ihsin upat tlak zet mi ka unau Pope Francis upatnak kan ra pek.Thaisun ah Rome ih a tlunnak lamtluan ah tluang ten him hram seh tiih thla ka cam sak , a thianghlim zet mi Pathian in thluasuah lo pe hram seh” tiah thla a cam sak.

         Cui hnu ah laksawng pekawk tlangnak an nei ih Pope Francis in ca uk pahnih laksawng ah a rak pek. Pakhat cu kumzabi 20 a thok lam ah Asia Minor (nisuahnak a lai lak tiin tui san ih kawh mi) Greek pawl ih riahsia za thuanthu ca uk le a dang pakhat cu Greek dodalnak ah nunnak a rak hlan tu pawl ih thuhla ngan mi ca uk a si. Puithiam pakhat ih ai-awh in Archbishop in Pope hnenah Naute Jesuh a cawi tu Bawinu Maria ih zuk laksawng ah a rak pek.

         Pope ih pek theu mi laksawng a si mi Pope ih tacik a tel mi tthi le Pasca puai Zarhpi ni (27, March 2020) ah leitlunhuap hnenih a rak sim mi thuthangtha ca uk (Statio Orbis) laksawng ah a rak pek.

         Hi thuthang cu Vatican ih kan ngah mi a si.

https://bit.ly/3rDal9y