Kawlrampi remdaihnak hrang thlacam cio dingah Mandalay Archdiocese hotu in zaangfah dil (14 January 2022)

Kawlrampi remdaihnak hrang thlacam cio dingah Mandalay Archdiocese hotu in zaangfah dil

14 January 2022

         Mandalay Catholic Archbishop Marku Tin Win in covid-19 pulhnat ruangah thukhat, ei ding um lo nak, ramsung ralbuainak le hremnak pawl ruangah a thenthek aw rero mi Kawlram hrangah a mah thawn thlacam tlang dingah Archdiocese sungih um Puithiam pawl, Sr. pawl, kohhran mipi pawl a rak sawm.

       Zarhte ni, zaanlam tinten nazi pakhat sung Bawipai Thi le Sa upatnak ah khal tel cio dingin, cu vekin tla ih hmaisabik nak Zarhpi ni tinten remdaihnak hrang tumtah in cam dingah khal a rak sawm. Tui dinhmun ruangah ruahsannak pawl hloral ter lo in tihphannak, thinphannak pawl, beidong thlak zet mi dinhmun ah Pathian hnenih zumnak nei ringring dingah a rak forh.

Tuahmawhnak pawl a tam sinsin

         Thuneihnak longtu ralkap le dodaltu ralkap pawl lak ah nitin doawknak pawl nasa zet in caan reipi a rak cannak cu Khrisian tamsawn umnak Kayah, Chin le Karen ramthen pawl ah a si. Mipi pawl mai umnak inn le lo pawl tansan in an tlan rero ih Biakinn pawl, Biaknak lam inn pawl ah an beu hai.

         Kum 50 luan ralkap uknak ihin 2011 ihsin thok in ramkhel lam, sumdawnnak le nunphung lam harsatnak pawl pakhat hnu pakhat a rak tam deuhdeuh.

         Thaal tikcu caan thok ihsin tui ni tiang thah a tuar tu 1400 an um ih mi thawng za leng lo in an um nak an tansan. Tui kum thok lam nithum ni ah Kayah, Karen, Mon ramthen le Ta Nin Tar Yi ihsin mai inn le lo tansan tu 192,300 an um thu, 4700 hrawng cu kiangkap ram Thailand ram ah an beu thu, January 11 ah UN in a than. Inn 1550 luan, mipi thilri pawl, Biaknak lam inn pawl, tlawnginn pawl, siatsuah tuar in a besia bik mi cu meisa an rak ur ih hriamhrei tum le fate pawl thawn an rak kap. Cu vekin Kawlram ih a satnak hmun a si mi Sagaing, Magway, Chin ramthen pawl ihsin mipi 157,500 khal in an um nak an tansan. Mipi le democracy a duhtu pawl doawknak ruangah nunnak liamtu 1000 luan an um ih 10000 luan cu dik lo in thawngthlak an tuar.

UN ih mawhthluknak

         Nisuahnak lam Asia le tinfinriat hmun ih upa Debora Comini khal in kan dung Zarh ah a rak mawhthluk. Ziangah tile nauhak 4 an rak that ih mi tampi hriamhma an rak ngah ruangah a si. UN dinhmun in ramsung buainak long tu ralkap in vanzam thawn donak, tan bul nei lo in zalen mi pawlkom pakhat in hi thilcang phorhsuak cih dingah, cu lawngah sualnak a tuah tu pawl cawhkuan pek a theih ding thu a rak sim.

         Nauhak pawl do nak ruangah khal a thinheng thu, doawknak a tuah rero tu pawlkom pahnih in nauhak pawl tuahmawh lo dingin tuah a tul. Hi mi cu ramhuap dinhmun a si vekin Kawlram dinhmun thawn hi lungkimnak thlun a tul tiin lethmat an thu tiah a rak sim.

         Hi thuthang cu Vatican thuthang ih kan ngah mi a si.

https://bit.ly/33SKJMd