Congo ih thah tuar tu Puithiam hrangah Kohhranpi pawl in Novena thlacam sak

Congo ih thah tuar tu Puithiam hrangah Kohhranpi pawl in Novena thlacam sak

            Congo ram ah tui February 02 ah Catholic Puithiam pakhat hriamhrei kengtu pawlkom ih methal thawn kah a rak tuar. February 2 cu leitlunhuap Pathian riantuantu pawl puai ni a si. Cu vekin ‘Bawi Jesuh Biakinn sungih apnak puai ni’ khal a si. Puithiam cu cui puaini hrangah Missa sumnak theh hnu a tlun nak ah tu vek ih thahnak a rak tuar. Thah tuar tu Puithiam ih hmin cu Fr. Richard masivi Kasereka a si ih kum 36 lawng a si lai. A mah a thattu pawlkom cu hriamhrei kaitu pawlkom a si. Thah a tuarnak hmun cu Lubero Khayaing  ih  nisuahnak saklam ah a si. Tui sualnak tuahtu pawlkom phork suak thei dingah an thok zo thu, Butembo-Beni ih Diocese hotu Melchisedec Sikuli Paluku in CNA thawn thuthang thlah rero tu ACI Africa thuthang zungah February 03 ah a rak sim ih Diocese ih thuthang suahnak ah ISIS pawlkom ih cohlan mi kiangkap Uganda ram ih Allied Democratic Forces (ADF) pawlkom ih tuah mi a si thu a tarlang.

          Diocese hruaikaitu in ruahnak luan ih tuah mi a phunphun a zen thu kan dungkum ah hi hmun ah a rak sim dah. Hriamhrei keng in tuahmawhtu pawlkom pawl in cazirnak tlawng pawl, siizung pawl an rak siatsuah. Siivai tuamhlawmnak la dingah siizung ihkhun parah an rak that. Milai nunnak zuah lo in hi ti vekih tuahnak a that lo thu kan dung May, 2021 ah a rak sim. Fate pawl in an nu le pa pawl milai bang lo ih thah an rak tuar lai an hmuh thu, nu le pa nei lo pawl, nuhmei pawl an tam deuhdeuh thu, khua pawl khal vutcaan ih cang ding tiangin an rak ur thu, kan nih cu harsatnak tumpi a thleng rero mi dinhmun ih kan um thu a rak sim.

          Tui thah a tuar tu Puithiam cu Congolese riantuantu pawlkom in a si ih an naupa thah a tuar thu an theih ni ih a thaizing February 3-11 tiang ni 9 sung Puithiam ih thlarau hrangah Novena cam cio dingah Diocese sungah an rak than. Puithiam cu March, 2018 lawngah kumkhua thukamnak a rak lak ih February, 2019 ah kumkhua Puithiam cannak a rak ngah.

          A mah cu Tangaza University ih tlawngta hlun khal a si. Cui University cu riantuantu (congregation) pawlkom 22 ih rak din tlang mi a si. Tui dungthluntu St. Michael Parish ih Parish Puithiam dinhmun in October, 2021 ihsin rian a rak tuan thok. A mah cu a nunnak ap zet tu riantuantu pakhat a si thu, a mai congregation khal a duhdawt zet thu, a mah a tong dah tu pawl in a zaangfah lainatnak, a nuam awkzet nak ruangah an nel thu, Italy ah riantuan rero tu Fr. Laurianus Banyuzukwabo Tuyisabe in ACI Africa thuthang ah a rak sim.

          Pawlkom zate ih hoha tu Fr. Teodoro Kalaw khal in tu vek in riantuantu thahtuarnak cu nasa zet in a rak mawhthluk ih thudik thuhman zamrang ten ngah dingin thlacam dingah, Pathian thuthangtha ih a ra mi thukam thawn kaih mi Pathian siseh, pawlkom siseh siang zet in a pet u cu siang zet in thah a rak tuar thu, leilung ih luang mi a thi cu Pawlpi ih Pa Tertullian ih a rak sim vekin Pawlpi karhzainak ih thlaici si hram seh tiah a rak sim.

          Puithiam ih ruakvuinak cu February 5 ah Kaghuntura ih um St. Francis Assisi Biakinn ah an tuah. Puithiam tu vek ih thah tuarnak cu netabik a si lo. Nunnak thar ih thawhnak a si thei. A mah sunnak cu Pathian thuthangtha phuannak khal a si ih kan mah thawn a tlan len lai ah a rak tuah mi thatnak pawl mangsal dingah le in rak hmuh mi a duhdawtnak pawl mangsal dingah a si tiin Bishop in a rak sim.

https://bit.ly/34I9qvf