Nauthlaknak a tum tu nupa pawl hrangah tikcu khel in an thinlung thleng dingah tlawngta pawl Rosary cam (February 3, 2022)

Nauthlaknak a tum tu nupa pawl hrangah tikcu khel in an thinlung thleng dingah tlawngta pawl Rosary cam

February 3, 2022

              Phun 7 a kai tu CeCe le Abby tei cu thlatin an rualpi pawl thangin anmah thawn Rosary an cam theu. Hitivekih tuahnak cu a thupit thu, ziangruangahtile mai thisen fa a simi fa suahhlan ah thla dingah ruat tu nupa pawl thinlung thleng dingah a si thu, kanmah din hmun in minung nunnak man ret in, upat thiam nak thinlung nei ding tiin ruah san a si thu CNA thuthang ah an sim.

              Anmah cu tlawngta 300 luan ummi St.Thomas More Catholic tlawng ah tlawng a kai tu pawl an si. Cui tlawng cu Colorado ramthen Centennial ah an phuan. Tlawng phuannak ih tumtah mi cu minung ih taksa, thinlung, thlarau zaten Bawi Khrih hnen hruai thei dingah le a tha mi fimthiamnak thawn hmailam ah tlawngta pawl hnen Pawlpi khal siseh, kiangkap khal siseh rianthiam tu pawl si dingah zirh dingah a si. Ca zirh nak siloin tlawngta pawl a dang pawlkom pawl ih cangvaih nak pawl, program pawl le a lenglam cangvaih nak khal an tel ter.

              Tlawngta pawl telmi pawlkom pawl lakah pakhat cu “the Lions of life” tiin hminnei mi pawlkom ih cangvaih nak a si. Kum, khan hril loin tel thei mi thlacam nak pawlkom a si. Himi pawlkom cu thlakhat veikhat nemhnget mi ah kom aw in Rosary an cam theu. Hivekih thlacam nak ih tumtah mi cu mai von mi fa pawl thla dingah aruat tu nu pawl ih ral ihsin cui an fa pawl himten neiin, nung thei ding ah a si. Cui thlacamtu pawlkom sungih phun 6, phun 7 a zirh tu nunpung lam zirh tu sayamah pawl in an hoha.

              Cui pawlkom hoha tu Weiland in amai dinhmun in himi cangvaih nak cu 2015 ihsin thokin a hlan ah tlawng ah sayamah a tuan ih, himi cangvaih nak cu kum 10 luan rei hoha tu hnen ihsin hlan nak in a tuan thu, a ngaihsak ih, a harhdam mi tlawngta pawl thla ih tlawngkai nili zing 7, tlawngkai hlan ah an tong awk theu thu, ziangruangahtile cui caan cu tlawngta pawl hrang khalah a kaih bikmicaan a si thu, himi cangvaih nak cu pawlkom hrang hlawknak aum ter thu, anmah pawl tuanten thang an si nak cu leipar ah nauhak pawl hranga h an ngaihsak tuk ruangah a si thu, an zumnak phur zet in langter nak a si thu a sim. Rosary an cam tikah thuthuk pakhat ciar ah minung nunnak an thupit thu langter nak thlacam nak a um. Cui thlacamnak cam in an hlan. Cui thlacam nak cu a tel mi nauhak pawl hnen tuanvo pe in a hoha ter. Tuah nak ding covo a pe. Anmah pawl phur zetin hohanak hmuhnak cu thin a nuam ter. Thlacamnak ah nauhak ihsin thokin tlawngta upa pawl, cui upa pawlcu Rosary cam an hoha ih, pahra ciar kha khan a phunphun in an hoha. A dang saya, sayamah pawl khalin an bawm.

              Phun 7 tlawngta pa Jonathan in “himi pawlkom ih cangvaih nak ah tel dingah thlakhat ah nikhat rikhiah mi caan hnakih tuan ah tho nak cu san a nei. Ziangruangahtile kanmah pawl Pathian kan thlacam nak thawn thangthat asi thu, himi pawlkom ih tel nak thawn pehpar in a ruah nak a sim.

              Kan zate ih nu asimi Bawinu ih thlacam saknak in tlawngta pawl ih thlacam nak cu a suak hrih lomi naute pawl hrangah kilhim dingah a tha a cak zet mi hriamhrei asi thu cangvaih nak ih a tel mi sayamah pakhat asimi Katherine Abor in a sim. Minung nunnak thawn pehpar in nauhak lai ihsin thokin upat thiamd ing thu theih ding a si thu, nunram ah a tuan thei bikin mah kiang ih um mi pawl duh ding timi zirh asile cui theihnak cu nunram ah reipi a um ding. Curuangah leilungpi rian dingah man cia in um ding. Nauhak lai ih theih mi thuhman thawn a pial mi dinhmun pawl ton tikah a sual thu theiin an hnong thei ding. Nauhak lai ah zir dingah a ol ruangah hminsin a ol. Anmah pawlcu nauhak an si ruangah an van a tha. Himi cu kan pawlkom ih kan danlam nak a si. Ziangruangahtile himi nunram ihsin thokin Rosary an cam timi hmuh a theih. Anmah thawn Rosary camnak cu thinlung a nuam ter. Himi tlawngta pawl cu an upat tik khalah himi tlawng ihsin ngah mi theih nak pawl olten an tan lo ding thu khal a ruahsan. Pehbet in an nunram ah rintlak zet in an tuar ding tiin a ruahsan thu, himi tlawngah fimzir in a dang tlawng ih an thlen khalah himi tlawng pawlah himi theihnak an pe thei vivo ding tiin ruahsan a si thu, an nauthlak nak cu thil menmen  vekin a ruat tu mi hrangah hriamhrei vekin a tha a cak mi tiin a um ding thu, curuangah himi tlawngah um laiah cangvaihnak cu nunramah mang in, nauthlak nak khamnak, dokham nak tuah ding mi thu hman asi timi cu hnget zet in an ding pi ding tiin ruahsan a si thu Weiland in a sim. Himi thuthang cu CNA thuthang ihsin kan don mi a si.