Hlasak thiam Sister a kum 84 ah a nunnak cem January 27, 2022

Hlasak thiam Sister a kum 84 ah a nunnak cem

January 27, 2022

          Leilungpi in Catholic rock hlasak thiam Sr pakhat asimi Sr. Janet Mead a sung. Amah in “Vancungum kan Pa” thlacam nak cu disco-rock pungsan ih a rak sakmi hla ihsin, mi in an thei tam ih, a tu ah amah cu sersiam tu Pathian hnen a feh zo. Amah cu “Sister of Mercy” tiih kawh mi “zangfah nak Sister” pawlkom sungtel pakhat a si. Amah cu (Jan,16, 2022) a kum 83 ah cancer nat nak thawn a nunnak  a cem. Himi thuthang cu amah a thei tu, a hnatuan nak pawl theitu hrangah a tum zet mi sungnak a si. Sr cu nunram a harsa pawl hrangah cawl loin hnatuan tu a si. A tum zet mi sung nak tiin ti asinan in tan mi zohthim tlak ro pawl cu pehbet in a cangvai rero ding. A tanta mi pawlkom khal siseh, a sung khat pawl khal siseh, cutivekin Sister ih a rak ngaihsak zet mi “Adelaide Day Cetre” ih innsang pawl zate thawn an riahsiat thu Peter Malinauskas in a kuat.

          Mi ih an theihtam nak a hla a suah hnu kum 50 a rei ah Sister cu a hlawhtling zet mi Catholic music thiam tiin mi in an pom. Amah cu Sister tuan cingin a tha bik hlasak thiam 10 cazin sung ah a telmi Sister lak ihsin a pahnih nak Sister a si. Amah tlun ih um mi Sister cu Sr.Luc-Gabrielle a si. Amah cu “the singing nun” (hlasak tu Sister) tiin khal mi in an thei tam ih, amah cu 1963 kum ah “Dominique” hla thawn a rak hlawhtling.

          Sr.Mead ih thuanthu an nganmi vek a sile, a nunram tluan ah music a rak duh zet. Music cu a kum 17 ihsin thokin a rak zingzoi. Biakinn ah rock hlasak nak a rak thok. Himi fimnak khal Sister si dingah “zangfah nak Sister” pawlkom ih a luh caan ah pawlkom sungah a rak zirh. Zirh tu sayamah dinhmun in rock music a zirh nak cu a tlawngta pawl hnatuan pakhat tiin a pek thei thu a theih tikah Missa raithawinak ih sak mi hla pawl cu rock awthluk thawn a ngan.

          1973 ah amah rori in hla khui a suah ih, cuveten hlasak zuamnak ih hotu pawl in zuam ve dingah an sawm. Hla khui cu A side ah St. Francis Assisi le St. Clare tei ih nunram ngan mi “Brother sun, Sister moon” B side cu “The Lord’s Prayer” vancungum kan Pa kha hla thawn a phuah. Mipi in an rak pom zet. Cui hla cu Australia ram mi pakhat ih khui kha America ah khui tan 1 luan zuar theimi dinhmun ah a rak thleng ih, hla khui zuar tam zet mi hla sak thiam tiin Sister cu a hmin athang. Sister ih hla khui cu “Grammy” laksawng pek dingah hril mi tiang a thleng. Asinan cu laiah “rock Anro” Siangpahrang Elvis ih “How Great Thou art” hla in a ngah. Pathian riantuan pawl ih thukam nak vekin Sister in a ngah mi laksawng, sumpai pawl zaten karuna hnatuan nak hrangah a hlu.

Hlawhtlin nak a ngah hnu, mi theih lo in hlasak nak lam ihsin a suak

          Hmaisabik a suah mi hla thawn a hlawhtling zet tu Sister cu a khui zaten “With You I am” thuluu thawn a suah bet. Cui hla khal no.19 nak a ngah. Ahmaisa tluk in a hlawhtling lo. Asinan a ngah mi hlawhtlin nak ruangah Missa raithawi nak ih hla pawl cu rock hla pawl aw in a khum.

          Amah cu leikhuavel ah cu tluk in a hlawhtling nan lang zet in a um lo. A music thu sim ter asile a hrangah tih nung za caan a si tiin a sim theu. Ziangruangahtile a zum nakah thusuh nak a rak um ter dah. A pathum nak khui a than tikah a nunram a ning zet. Mi hmuh ah a nunram ihsin dung a sip ih, a thup ten a um. Cui a pathum nak khui cu 1999 kum tiang darh ter loin a um. Cui kum cu ahmaisabik khui a suah nak kum 25 kim thawn a deng aw.

          Amah cu a nuntu khuasak nak hnatuan (professional career) a tlansan nan music fimthiamnak cu Catholic tlawng pawl ah a nunram tluan ah a zirh. Amah cu a aw thun nak lawngah a caan hmang loin mi harsa pawl, inn le lo nei lo pawl bom nak karuna hnatuan pawl khalah a tuan. Himi a tlamtling mi karuna hnatuan ruangah Sister cu Australia tlawng lam ah kum 2014 ah mi thiam hleice tiin an rak sunloih. Cui kum ah “Yamaha Golden Gospel” laksawng khal an rak pek. Ziangruangahtile Australia music thangso dingah a rak tuan ruangah a si.

          Thinnat za ni asimi January 26 ah “Guardian” thuthangah Adelaide Archdiocese in Sr. Janet Mead cancer thawn a nunnak a cem thu an than. A music le a thuhla cu amah thawn a nel aw mi zaten hrang tleu nak ngah nak tiin a tang ding. Cutiin, hitivek in a hlawhtling nan a Pathian riantuannak nunram le pawlkom cu lei khuavel ih ziang thawn hman a rak thleng theilo mi hi leitlun mi zate hrangah zir ding tlak nunram pakhat dinhmun tiin a tang ding.

Himi thuthang cu Aleteia thuthang ihsin kan don mi a si.

Photo courtesy of NewsBreak

https://bit.ly/3LB4Y24