Cambodia ram ah kum upa zomi minung 15 in Catholic Kohhran ih lut dingah biakinn sangka kingnak nei (Feb. 21, 2022)

Cambodia ram ah kum upa zomi minung 15 in Catholic Kohhran ih lut dingah biakinn
sangka kingnak nei (Feb. 21, 2022)
                   Midang ih hmuh theih dingih cangvaihmi langternak ah ti’n Catholic Kohhran ih lut dingih a timtuahmi kum upa minung 15 cu hnipuan dum-rang hru phahin biakinn kharmi sangka kiangah an dingih Baptisma (Tikholhnak Sacrament) sang in Christian Innsungsang sungtel si dingah an
hngak. Puithiam pakhat in biakinn sangka cu a onsak ih, “Ziang ka lo bawm ding?” ti’n a suh tikah, Kohhran sung lut duhtu pawl cun “biakinn sung ka lut duh” ti’n an sawn fingfing. Himi Kohhran sungih cohlan-awknak caanserh cu February 20 ni ah, Phnom Penh khuapi ih St.
Perter and St. Paul Biakinnpi ah an tuahmi a si.
                 Cambodia ram ih Catholic Kohhran sung lut duh pawl timtuahnak an neihmi daan vek cun, Kohran sung an luh hlan ah Catholic zumnak, Bible ihsin a rami zumnak, biaknak lam fehdaan tete le Pathian biak daan tete pawl theifiang dingah kum 2 hrawng Pathianthuzirnak nei hmaisa
in biakinn lam ih cangvaihnak pawl khal ah tel hmaisa ta ding ti a si. Kum 36 a kim zomi mino, Som Loka cun “Catholic Kohhran thuhla hi ka sungkhat unau pakhat ruangah le tui ka hnatuanmi ruangah ka theih mi a si” ti’n RVA thuthang ah a sim. Loka cu Phnom Penhn khuapi ihsin nitlaknak saklam 367 km hrawng a hlatnak,Thailang ramri, Pailin peng ihsin rami a si ih tu ahcun Phnom Penh Thmey Pastoral center ah hna a tuan rero laimi khal a si. “Catholic Kohhranpi ih mipi thawn a pehtlaihdaan siseh, mi farah pawl hrang le Cambodian mipi pawl hrangih hnatha a tuanmi pawl khal siseh, ka rak hmu rero ko” ti’n Som Loka cun a sim.
            Amah hi, Catholic Kohhranpi ih cangvaihnak pawl, ahleicein, hnatha tuannak pawl ah a tel rero zomi khal a si. “Ka thazang suahnak lawngin Kohhran ih cangvaihnak ah ka rak tel thei nan, ka thinlung cu lungawinak le hlawptlonak in a khat; kan unau pawl hrangah Kohhranpi hi ziang tlukin siannak thinlung a nei ti khal ka hmu ko” ti khalin a sim bet. Som Loka cu, Catholic Kohhranpi sungah lut dingih a timtuahnak ah an innsang lam ihsi khal in tan an lakpi nasa. Kohhran sung lut dingah a timtuah vetu Vorn Champa khal cu himi timtuahnak program ah kum khat lai a tel zo. “Catholic pawl cu zumnak le duhdawtnak hlawm-aw in khat le khat an bawm- aw hlelhhlo” ti’n Champa cun a sim.
          Tu ahcun, Vorn Champa cu Don Bosco Teuk Thla tlawng ah hna a tuan rero lai. Anih hrangahcun Budhist biaknak ihsin Christian biaknak ih ra luh hi an innsang lam ihsin an lungkimpi lo tuk tikah thil ol a si lo nasa. Champa ih nu le pa pawl cu Buddhist biaknak sungah a fek zet pawl an si. Buddhist biaknak sung ihsin thanglianmi kan si lawng si loin, Christian biaknak cu ramdang biaknak a si tiih anruah tikah biaknak thar sungih a luh ding an lungkimpi lonak a si ti khal in a sim. Hmansehla, hi fala note cun, a nu le pa ih ruahnak pawl cu a pahsuak thotho. “Hi pawl ka pahsuak theinak cu ka zumnak ruangah le Jesuh Khrih parih duhdawtnak le rinnak ka neihmi ruangah a si” ti khal in Champa cun a sim.
        Cuihleiah, Champa cun, “Catholic Christian pakhat ka si ko nan, Catholic pakhat dinhmun in mipi hrangah mi tha ka sinak ka langter ding; ka nu le pa pawl ka upat hrih kei, kan innsungsang hrang siseh, community hrang siseh, keimaih hrang siseh, thatnak tampi suahpitu si ka zuam ding” ti’n a sim bet. Tui tum ih, Catholic Kohhranpi sung lut dingih a timtuahtu pawl a rak cohlangtu cu Fr. Peter Soun Hangly a si ih, himi minung 15 pawl cu biaktheng kiangih dingin a sawm hai ih, Kohhran mipi hmai ah Kohhran sungih cohlannak cu a tuahsak a si.
Source: RVA thuthang

https://bit.ly/3t1YGAp