Cardinal Charles Bo in Russia hnenah zangfah dil

Cardinal Charles Bo in Russia hnenah zangfah dil
             Cardinal Charles Maung Bo in nuclear ralbuainak cang ter lo dingah le remdainak hrangih hmaiton thurelnak thawn leilungpi dam ter sal dingin zangfah dilnak ca a suah. Cardinal Charles Bo hi, Federation of Asian Bishops Conferences (FABC) timi Asia Bishop Pawlkom hotu lubik pakhat khal a si. March 4 ni ih ca a suahmi ah, “Kan leilungpi hi hlohralnak lamzin parah a ding” ti’n a ti. Nuclear ruangah minung tampi thihnak a ra thleng ngaingai pang ding timi phang in, tui tum ah hiti vekih zangfah dilnak ca a suahmi khal a si.“Ukraine ram namnuainak le minung tampi hmakhat teih thi ter theimi hriamhrei pawl tiang hmang ding ih hringhronak pawl ruangah leilungpi hi amah le amah a ci a mit-aw tum thlang. Ukraine ramih tihnungza thil a cangmi hin leilungpi cu tihphannak thawn a khat ter” ti’n a sim.  “Hi thil hi a tawp rori a tul” a ti.
          Cardinal Charles Bo cun, Pope Francis ih zangfah dilnak a rak neih zo vekin, Russia ram uktu upa pawl le leilungpi ih buainak hi hriamhrei hmangin kan cawl ter thei ding tiih a ruattu ram uktu dangdang pawl hnen khal ah, remdaihnak lam zawngin leitlun ih buainak pawl cem ter thei
dingah UN ah tongaw khawm dingin a rak sawm ve. Ram 140 lenglo a telmi UN pawlkompi in, hi ralbuainak thawn pehpar in an lungkimpi lonak an suahmi hin kan hna a ngam ter ih kan tha a tlung ter ti khal in a sim. Kum zabi 20 lai ih a rak cangmi Leitlun Ralpi buainak vek cu, kum zabi 21 sungah cun cang ter hram lo ding ah le, thuanthu sia ih in zirhmi cingkeng ringring in, cuvek thuanthu thalo cu ngan sal lo ding khal in forhfialnak a rak nei. Ram (ramri) thu ih ralbuainak ruangah harsat a tuartu cu, milai zapi a si thu, leitlun ralpi a rak tho lai khal ah, nehnak a co taktak tu khal an rak um lo thu, thuanthu ihsin fim zir ding a thupit thu pawl khal a sim.
            “A tu hi leilungpi damter ding caan a si, siatsuah-awk caan a si lo” ti khal in nasa zet in a sim bet. Cule, Russia ram uktu, President Putin hnenah a tanglam vekin direct in zangfah a dil: “President Putin hnenah direct in zangfah kan dil. Russia hi UN Security Council ih permanent sungtel 5 lak ihsin ram pakhat a si. Hi Council cu leilungpi ah remdaihnak thlen ter ding le ramtinkim ih covo humhual sak dingah tuanvo neitu a si. Curuangah Ukraine ram do nawn lo in,
buaibainak cem ter dingah UN ah tongaw khawm dingin zangfah kan lo dil a si.

            Cardinal Charles Bo ih zangfah dilnak ca a suahmi ih netnak ah, “Remdaihnak hi a cang thei ringring ko; remdainak lawng hi leitlun mi hmuahhmuah ih hmailam caan hrangah lamzin a si”
ti’n a sim.

https://bit.ly/3IL094F