Missionaries of Charity sungtel Sister pahnih cu Ukraine rammi pawl umpi hrih dingah thu an kam. (March 5, 2022)

Missionaries of Charity sungtel Sister pahnih cu Ukraine rammi pawl umpi hrih dingah
thu an kam. (March 5, 2022)
           India ram ihsin Kolkata khua ih Mother Theresa ih Sister pawl tiih theih bikmi Missionaries of Charity sungtel Sister pahnih cu Ukraine ram ih buainak nasa zet ih a thlennak hmun ah mipi pawl rian hrih dingin tangta dingah a botcat zo ti a si. Cuih Sister pahnih cu Sr. Rosela Nuthangi le Sr. Ann Frida an si ih, India ram, nisuahnak saklam Mizoram State ihsin rami an si. Ralbuainak ruangih hliamhma a ngahmi le ral a kian rero mi, mi harsa pawl hrangah kan thih khal le a poi lo tiih tangmi khal an si. March 2 ni ah, India ram Kolkata khuaih an lubik Sr. Prema in a him deuhnak hmun ih tlan dingah a rak forh nan, annih cun harsat a tong mi mipi pawl a cang thei daan ih bawm dingah tangta dingin an rak hril sawn. Cule, an sungkhat unau pawl hnen khal ah, an himdam thu an rak simthei a si.
Mizo Missionaries Charity
           Mizoram State ah mipum million khat lenglo an um ih, cumi lak ihsin zateek 87 hrawng hi Khrihfa an si. Sr. Rosela Nuthangi cu, Mizo miphun lak ihsin Missionaries of Charity sungtel hmaisabik sangtu a si. 1984 kum ah, hmaisabik thukamnak a rak tuah ih a hlan ih Soviet Union (USSR) ram ah missionary dinhmun in thlah a rak si ih Moscow khuapi ah kum 10 hna a rak tuan. Russian tong duh tawk a thiam hnu ah, Latvia le Estonia khal ah hna a rak tuan. Cuihsin, 2017 kum ah Ukraine ah a rak thawn ih tuini tiang cu tawk ah missionary dinhmun in hna a tuan rero
tu a si. Sr. Ann Frida cu Mizoram ih khuapi, Aizawal ihsin rami a si. 1998 kum ah hmaisabik thukamnak a rak tuah. India ram sungah kum malte hna a tuan hnu ah, Ukraine ram ih khuapi, Kyiv ah an thlah ih cu tawk ah kum 10 hna a rak tuan.
            Anmah pahnih thawn pehpar in, North East Regional Bishops’ Council (NERBC) pawlkom ih lubik a simi, Archbishop John Moolachira cun, “Hi Sister pawl hi ka suang nasa. India a cozah in a rammi zaten Ukraine ram ihsin runsuak dingah a ko thluh ko nan, Missionaries of Charity sungtel Sister pahnih in ralbuainak lakih miharsa pawl tansan siang loin, umpi dingih an hrilmi hi mangbang ciamco ding a si lem lo. Himi hi Kohhranpi ih dinpi mi khal a si. Pathian hnatuan ih pum a petu zaten maih nunnak hnakin midang ih nunnak hrang a zohtu sawn an si thluh. Hiti vek caan ah miharsa pawl an tansan a si ahcun, Pathian ih kawhnak an ngahmi thawn a mil-aw lo ti’n an ruat cio ko ding” ti’n a sim.

            Mizoram ih Salesian Siangbawi, Fr. Robert Faustin khal in, hi Mizo Sister pahnih ih sungkhat unau pawl in tubai te tiang an pehtlaih awk thei rero thu a sim. Hi zohthimtlak mi raltha Sister pahnih an him ding kan beisei ih Ukraine, Russian le Leitlun ah remdaihnak a um theinak dingah thla kan cam cio hrih pei ti khal in sawmnak a nei bet. Mizoram in Myanmar raltlan pawl hrang sangka onsaknakA tu ah, Mizoram in Myanmar raltlan pawl hrangah beunak a ngaihtuah sak rero laifang khal a si. Mizoram ih minister lubik khal in, Myanmar ramri ah 24,200 lenglo raltlan pawl hrangah beunak an ngaihtuah sak rero thu March 2, Tlawngkai Nihnih ni ah a sim. Hi raltlan pawl hrangah ei-in siseh, riahnak siseh, a dang tulsam mi tete pawl cu state a cozah, NGO pawl, Kohhran pawl, tlawngta pawlkom le khua upa pawl tangtlang in tawlrel sak rero a si thu le state cozah lam ihsin raltlan pawl in harsatnak le buaibainak tong lo dingin thei tawk ih a zuam rero thu pawl khal a sim.

Source: Vaticannews

https://bit.ly/3vJc8fj