Atui ralbuainak ruangah Pathian thawn nai awk a theih thu Ukraine ih Catholic thuthangla tu in sim (March 8, 2022)

Atui ralbuainak ruangah Pathian thawn nai awk a theih thu Ukraine ih Catholic thuthangla tu in sim

(March 8, 2022)

              Russia pawl ih donak thawn pehpar in ram dinhmun thu a la tu Ukraine Catholic thuthangla tu cu an khuapi Kyiv ihsin danglam zet in a suak tiin an sim. An khuapi ihsin suak dingah Pathian in theihter nak a pek thu, tlan ding khalah tha a pek thu March 5 ah a sim. Khuapi sungah ni reipi harsa zet in an relh thu, netabik lawngah khuapi ihsin suak dingah thu a bot cat thu, Pathian in amah cu a dam lem lo mi a nu khal siseh, a naupa khal siseh, khuapi ihsin hruai suak dingah a sim thu, a theih mi aw cu a rualpi pawl a sim ih ruahnak a phunphun an pek thu, mi pakhat in thiangthlarau Pathian hnen thla cam asi thu a sim. Cutiin Bible a siar. A hrangah a hnget mi thu botcat ding caan asi thu a thei. A ruahnak khalah cu tiin a forhfial. Khui tawk in tlan nak ding lamzin khal Pathian in lamhmuh dingah Pathian hnen a zaten a ap. A tu ahcun an khuapi in suak dingah amah in mawtaw nei lo asile feh ding a har.

              Phur tu ding mawtaw pawl pehtlaih nak a nei ih mawtaw pakhat cu nazi pakhat sungah feh ding mi a um thu, a innsang hrangah cun a tel thei thu an sim. An khualtlawnnak a hlat ih hleiah lamzin khal an phit. Cui an feh sung a dang ah ruahnak a thleng lo. Pathian ih tuahtuannak lawng a ring. Thianghlim innsang Bethlehem ihsin Izipt ih an tlan nak thu khal a von ruat. Amah le a nu, a naupa pawl cu a tu an feh nak ding hmun ah ziangtluk rei an um ding ti theih a si lo. Pathian ih rem a ti sung an um ding. Ziangvek thil, ziangvek hmun thawn ding timi cu Pathian in a sim leh ding tiin a ruah san.

              Ralbuainak a cang rero nan Pathian thawn a nai awk ter nak cu zum lo ding khop in a si. A thaisun ah amah le a innsang cu an khuapi thawn 200km peng 124 hrawng a hlat nak Yatih Sister tlawng pakhat ah an thleng. Cui Sister tlawng cu khuapi ih nisuahnak lam ah a um. An hlan ih raltlan tampi cu Sister pawl in an kilkhawi. Tlawng ih khan pawl cu raltlan pawl hrang malte cawl in, inei, it thei dingah an hmang. Himi raltlan pawl cu Ukraine nitlak nak lam ah an feh bet ding. A tu cu malte sung an cawl. A feh duh lo tu pawl hrang ahcun an inn ih an tlun sal ding tiang a pahnih nak an inn a si ding.

              Himi Yatih tlawng cu a duh zet thu le ahleice in biakinn a duh zet tiin a sim. Caan bikhiah um loin biakinn ah feh in thlacam a theih. Zan a thlen tikih thawmthang a dai zet tikah amah vekin daiten a um thei lo mi khuapi le Ukraine thlanglam ih mipi pawl zangfah in an tap. Russia ralkap pawl cu mipi pawl an um nak hmun kiang ih inn pawl ah tihriam in an kap. Mi zangfah nak in a bawm rero tu pawlkom pawl an do. Pehtlaih awk nak ih hman mi tlangleng zin pawl an siat ter. A tu hi tawk ah thlen asinan a him tuk lo. A tui khuapi khal Russia pawl in veihnih rori hriamhrei pi thawn an do nan mi tuahmawh aw an um lo. Bawinu ih bomnak khal an zum. Himi khuapi ah “tlan ih a tap tu Bawinu” zuk a um. Khuanu khuapa pawl cu Bawinu ih bomnak an co tiin an zum. Amah khal a him tiin a ruah thu sim phah in amah ih video thawn thusuhnak cu thlacam nak thwn an cawl.

              Bawi Jesuh cu leitlun ih a cang mi a tha lo mi pawl hnakin a tha a cak. A lang ter. Bawi Jesuh cu kan ruahsan nak a si. Bawinu cu kanmah pawl a thuamthawn in pom ding timi a zum thu a sim. Himi thuthang cu CNA thuthang ihsin kan don mi a si.

https://bit.ly/35ZZpu6