Pakistan ah hmaisabik mino Pathian ih riantuantu ngah March 24, 2022

Pakistan ah hmaisabik mino Pathian ih riantuantu ngah

March 24, 2022

          Nu Cathlic Pawlpi ah Mithianghlim ih khaisang dingah then (3) in then a si. (1) Pathian hrang pumpetu ih thannak, (2) Blessed ih thannak, (3) Mithianghlim ih khaisannak pawl a si. Pakistan ram cu Christian mi malte lawng umnak ram a si. Cui ram ih mi pakhat cu Mithianhlim ih khaisang thei dingah hmaisabik kekar a si mi Pathian hrang pumpe tu tiin kan dung January (31) ah Lahore Archbishop Sebastian Shaw in mipi theih in a rak than.

          Pathian ih riantuantu ih khaisannak a ngah tu ih hmin cu Akash Bashir a si. A thih caan ah kum 20 lawng a si mi Catholic mino pakhat a si. A mah cu a liam zo mi (2015, March 15) ah Youhanabad ih um St. John Biakinn sungah thla a cam rero tu mipi pawl bomb puah ih that dingah a ruat tu pawl a rak khamnakah nunnak rak liamtu a si. Cui thilcang ah a mah thawn minung 15 an rak thi ih (70) luanin hriamhma an rak ngah. Cui doawknak rei lo te ah a kiangkap ih um an rak ngah. Cui doawknak rei lo te ah a kiangkap ih um Protestant biakinn pakhat khal ah cu vekin a rak do. A mah cu midang pawl ih nunnak run dingah thah a rak tuar. A mah cu Theology, Philosophy thiamnak pawl a rak zir ngah lo. A mai Christian nunram cu tlaitluang ten a rak hmang. Bawi Jesuih dungah nitin, tikcu tink, nazi tin, dinhmun tin ih rak thluntu a si.

          Cui thil a can ni ah Missa sumnak rak tuahtu a mai Parish Puithiam, Fr. Francis Gulzar in hi nauhak pate ruangah a nunnak a rak him thu, cui ni ah Biakthawinak ih a tel rero tu Kohhran mipi a thawng thawng in Biakinn sung le leng ah an khat. Ngaingai ahcun bomb puahtu cu Parish Puithiam thawn Biakthawinak ih a um rero tu mipi pawl tin ih tuah mi a si. Asinan, hi tlangval pa in a hmu ih a rak kham sak thei.

          A mah cu Parish sungih mino a si ih Parish Puithiam thawn khal nelaw zet mi an si. A mah in a mai Christian nunram cu mi tampi ih nunnak run dingah a thihnak thawn a rak pholang. Hi vek mi raltha hnatuan ruangah a mah sunloihnak a cem thei lo thu le a  nu le pa khal a lungawi thu a sim. March 15, kum kim ni ih Missa sumnak ah mino tampi tel dingah a rak sawm thu, hi mino hnenin zir in innsungsang hrang, Pawlpi hrang ram hrangah ziangtin rian ding, sunloih tlak mi pawl si dingah zir a tul thu, hi mino cu Pathian ih miphun h rangah a thabik ih a rak ap awk thu, a mai leitlun nunram a tawi ko nan a hnatuan mi a tum tuk thu, a mah cu a dik mi Christian a si thu a nunram thawn a rak langter tiah a rak sim.

          Hi thil a rak cannak cu tui kum thawn cun kum 7 a kim thlang. Asinan, a mah hngilh a theih lo. A suahcem mangsal in an tuah theu. A sangsang in dingin a thlaan kiangah thlacamnak pawl khal in an upat zet.

          Tu vekih cui hmun mi pakhat cu Mithianghlim ih khaisang thei dingah a thok ruangah Diocese hotu Bishop in siseh, Pakistan Catholic Pawlpi hrangah siseh, sunloih tlak a si. Pakistan Catholic Pawlpi cu 1947 lawngih a rak thok ruangah kum rei tuk hrih lo mi Pawlpi a si. Pawlpi cu apawtu pawl an um le a tha sinsin ih thangso ih thlengawknak a um.

          Zohman ih thlengawknak rak ngah lo tu kohhran mipi tampi khal an rak um. An um rero lai. Kan nih cu mi malte kan si ko nan Jesuh Khrih teette khaan nak ah an thakhoh zet. A hleice in fimthiamnak le harhdamnak lam ah an rak ap aw.

          Cui thil a can hnu ah Biakinn ih Biakthawinak caanserh thok in a cem tiang Kohhran mipi pawl in an timtuah ih kilhimnak a cancan ten ap aw in khal an lungawi zet. Hi kilhimnak pawlkom sungah Blessed ih khaisan ding mi tlangval ih u kum (27)  kim mi Arsalan khal thatho zet in a tel. Kilhimnak pawlkom sungtel (52) an um. Cu mi pawl sungin mipa pawl lawng an si lo. Nunau pawl khal an tel. An mai Biakinnn le zumnak ziangtin humhim a tul ti in rak zirh.

          Hi Pakistan mino ih Blessed ih khaisannak thuhla an cohlan sak ruangah Pope siseh, Mithianghlim khaisannak lam thawn pehpar mi zungih tuanvo neitu pawl siseh a lungawi thu, tu vekin thok thei dingah cui thilcang a hmu tu (100) luan ih thu nepnawi pawl an rak tarlang thu, hi hnatuannak ah Salesian pawlkom in thupi zet ih an rak tuah thu, tu ahcun hmaisabiknak an theh zo tiah an sim.

          Tui hngakhlap rero ding mi cu Pakistan ram hrangah thuthangtha a si mi Blessed ih khaisannak a si.

          Tu vekih Pakistan ram ih mi pakhat Blessed ih khaisang thei dingah Pathian ih riantuantu ih an rak than thei ruangah thazaang thar an rak ngah ih Biaknak lam ah thakhohnak a um deuhdeuh. Pakistan ram mi tampi in Rome khuapi ih tuah ding mi Arsalan Blessed ih khaisannak caanserh ih tel cio ding khal a ruahsan. Hi thuhla khal a thupi tuk.

          Pawlpi ih Pa a si mi Tertullian ih sim mi cawn a si le 'the blood of the martyrs is the seed of the Church' (martyr pawl ih thisen cu Pawlpi ih thlaici a si' ti a si.

          Hi thuthang cu Aid to the Church in Need ih kan ngah mi a si.

https://bit.ly/38o80I7