Thah a tuar mi thuthang la tu vui nakah thianghlim leiram ih tuahmawhnak cu Kohhran pawl in mawhthluk (May 17, 2022)

Thah a tuar mi thuthang la tu vui nakah thianghlim leiram ih tuahmawhnak cu Kohhran pawl in mawhthluk

(May 17, 2022)

              Kan dung tlawngkai ninga ah thuthangla tu Shireen Abu Aqleh ih ruak vuinak ah Israel palic pawl in tuahmawh hnaihnok nak parah Jerusalem Pierbattista kohhran, Orthodox kohhran, Catholic Bishop pawl le Khristian zumtu pawl in an mawhthluk thu thuthannak pakhat cu hmunkhat ten an suah. Cui tuahmawhnak cu Shireen Abu Aqleh ih ruak cu St.Joseph siizung ihsin Greek Melkite Cathedral biakinn ih an kuat laiih a cang mi a si. Cui hmunkhat ih thusuah mi ah siizung sung tiang Israel palic pawl luhnak le lu tan tiang tuahnak cu a thi tu man nak canserh upat lo nak a si thu a lang.

              UN secretary Antonio Guterris khal in Al Jazeera T.V thuthang zung hrang hna  atuan tu thuthangla tu a thihnak par ih mawhthluk nak a si. Thuthangla tu Shireen Abu Aqleh cu nitlak nak lam ih Jenin khuapi ah ralkap lam hnatuan tu Israel kilhim nak pawl ruangah a lu ah cerek an ngah ih a thi. Thilcang mi parah zalen in a fiang mi zingzoi nak tuah dingah Guterres in a dil.

Minung covo nasa zet ih siatsuah nak

              A tuah mi cu "Israel palic pawl ih riahsia pawl donak, thingtan pawl thawn thawinak, raba cerek pawl thawn kap nak le siizugn um mina pawl thinphan ter nak thazang hmang ih tuahnak cu minung covo le biaknak lam zalen nak covo nasazet ih mawhsiat nak a si thu le mi pawl hmai ah cawl dingah" an lang ter.

Nat tuar nak dam ter sal dingah aamahkhan nak

              Thusuahmi ah hnget zet ih an lang ter mi cu "St.Joseph siizung cu a bang aw lo mi ziangvek nunphung le biakank lam a um asi khalle cumi pawl hmuahhmuah dam ter dingah hmun tiin sunloih tlak zetin a um ih neta khalah um bet vivo dingah an tumtah thu" a si. Kohhran upa pawl ih netabik hminsin nak cu "kandung tlawngkai ninga ih thilcang cu Khristian kaingkap, siizung din tu langnak hmuh nak, St.Joseph kaing le siizung hnatuan pawl zate lawng siloin, cui hmun cu tuitiang a him mi hmun tiin a pom tu pawl zaten thuk zet in a na ter nan, siizung hnatuan pawl le St.Joseph Sister pawl cu dam ter nak an pek nak ah a hlan hnakin hnget sinsin in tuan dingah cui riahsiat nak thilcang in a nor thu" an sim. Himi thuthang cu Vatican thuthang ihsin kandon mi a si.

https://bit.ly/3LrmOUa