Raltlan nauhak pawl hnen thinlung thazang pekih hleiah Holy Childhood pawlkom in Parish tin ah thuzir nak tuah.

Raltlan nauhak pawl hnen thinlung thazang pekih hleiah Holy Childhood pawlkom in Parish tin ah thuzir nak tuah.

              Phekhung Diocese Santa Maria zone ih Holy Childhood thuzirnak le hlawmawknak cu Parish tin in an tuah tiin theih a si. Cui thuzir nak cu may 13 ihsin 16 tiang an tuah nak a si. Cui nauhak pawl thuzirnak ah kum 10 ihsin 14 sung nauhak 471 an tel. Thuzirnak cu PMS Director Fr.John Bosco, Fr.Thomas Chit Thar tei thawn Parish Puithiam pawl, Sister pawl, Pathian thusim tu saya pawl le Holy Childhood nauhak pawlkom ih hotu pawl in hoha in an tuah nak a si.

              Thuzir nak tuah tu asimi Fr.Thomas Chit Thar in "Phekhung nitlaknak lam ih raltlan pawl an tam tuk tikah anmah pawl thinnuam dingah, a dang raltlan nauhak pawl khal, khua ih nauhak pawl khal thleidang loin hmunkhat ten tong aw in hmunkhat ten rawl an ei tlang. Pathian an biak. Hmunkhat ten an lek ding timi tumtahnak thawn tuah nak asi" tiin Fr.Thomas Chit Thar in RVA ah a sim.

              Pehbet in Fr in "thuzirnak sung khua tin choir zuamawknak, lam zuam awknak pawl, Pathian thu zuamawknak an tuah. A thupi bik in a tu vek caan ah nauhak pawl Pathian thu hngilh lo ding ah a um mi pawl thawn Pathian thu kan zir" tiin ralbuainak karlak raltlan phah in nauhak pawl Pathian thu hngilh lo dingah an tuah sak nak thu an sim.

              Raltlan sung nauhak thuzirnak tuah daan khal Fr. in "himi thuzirnak tuah dingah ton mi pawl a tam. Nauhak pawl in ei ding, laksawng pek ding pawl ihsin thokin a hlu kan khuang. Hi tawk ih a ra tu nauhak pawl hnen khal in khuang a ngah lo. Khua pawl khalah raltlan dinhmun asi ruangah khuan a ngah lo. Cutiin ram leng ih hnatuan ulenau pawl le ram sung ih a hlu tu pawl hnen in fang a hlu khuang in himi thuzir nak tuah si" tiin thuzir nak tuah suak nak dingah tuan daan pawl a sim.

              "Atuvek raltlan nauhak pawl le a dang nauhak pawl hmunkhat ten thuzir nak tuah tikah khua ih mipi um daan, khuate lam umdan hlawm awk a ngah.  A hlan ahcun kannih khal kayan tong in kan tong. Kayan in missa kan tuah. A tu ah kawl tong in tongnak, kawltong in Bible siarnak, kawl tong ih missa ruahnak pawl, mirang in Rosary camnak pawl tuah tikah nauhak pawl phur zet ih an tel nak hmuh tikah thuzir nak tuah nak cu di a riam" tiin thuzirnak hoha tu Fr.Chit Thar in thuzir nak par ih a diriam nak thu a sim.

              "Nauhak pawl phur zet ih an tel khal nauhak pawl in choir, lam thaten an zir. Adang kanmah in Pathian thu catlang (40) kan pe. Cumi khalah nauhak pawl in khua tinkim in nauhak pakhat ciar a tlar in an zuam aw. Cumi nauhak pawl lungawi zet in an sak nak hmuh asi" tiin nauhak pawl ih tha ten thu zir nak thu pawl a sim.

              "Parish in pehbet in nauhak pawl caantha an ngah asile raltlan pawl thazang an pe. Thuzirnak an pe. A dang Missa raithawinak khal an tuah sak. Nikhat sung ih suncaw an do. A hlu an ngah asile an ngah vekin a hlu an pe sal. A tu hrawng a harsa zet ih a hlu tampi kan ngah lo ruangah cuvek in kan tuah thei nawn lo. Hmaikar lam asile tuah ding a um. Ahleice in thinlung thazang ngah dingih tha pek nak a si. Anmah thawn nikhat sung nauhak pawl hrang lungawi nak pawl an tuah sak. Upa pawl thawn asile Bible hlawmnak an tuah. Zaten hmunkhat in missa an tuah. Suncaw khal hmunkhat ten ei, hmunkhat ten um tikah kannih khal kan lungawi. Tuletu rat ter in duh. Ra ringring dingin in sawm. An hnen khalah khau tinkim ral tlan pawl cu khua mi pawl hnakin an tam" tiin raltlan pawl tha zang an pek nak thu a sim.

              Pehbet in Fr.Thomas Chit Thar in "khuapi ih mipawl khalin a hlu an pek thei lo hman ah theih tawk in thlacam ding ka duh. Kohhran pi khal siseh, a dang kohhran khal siseh kan kawlram mi asimi pawl hrang pakhat a nat khalle zaten a naa ding. Cuvekih hmunkhat ten tuarnak a tul. Zangfah nak thinlung ka duh. A mal bik thlacamnak, thapek nak tuah asile ka di a riam" tiin raltlan pawl hrang khuapi ih mi pawl thlacam sak ding mang ter duh thu a sim.

              Ahlan ah Diocese thawn pehpar mi thuzir nak pawl an tuah theu ih a tu cu ram dinhmun ruangah Diocese zaten thuzir nak tuah thei lo in Parish lawng thuzir nak pawl asi tiin theih a si. Harsat nak a phunphun ruangah Diocese ih Holy Childhood nauhak thuzirnak tuah a si lonak kum 3 sung a lut zo tiin khal theih a si. Diocese in tuah a theih lo nan pehbet in Parish, zone thu zirnak pawl thlakhat veikhat tuah dingah program pawl a um tiin Fr.Thomas Chit thar in RVA hnen hmailam hnatuan nak thawn pehpar in a sim. Fr. Thomas Chit Thar in thuzir nak a cang suak ruangah hmun tinkim ih a bawm tu a hlu tu pawl zaten hnen a lungawi thu a sim.

Source; RVA Myanmar