Jesuit pawl ih hoha mi tlawng cu Bangladesh ah hmaisabik din (September 21, 2022)

Jesuit pawl ih hoha mi tlawng cu Bangladesh ah hmaisabik din

(September 21, 2022)

          Bangladesh khualipi Dhaka thawn nai mi Gazipur peng, Kuchilabari ah Jesuit pawl ih hoha mi St. Xavier ram tinkim thawn pehpar mi tlawng hmaisabik an rak din. Tlawng cu tlawngta 34 thawn an rak thok ih tlawng ih kauh zia cu tlawngta 600 tiang cohlang in an zirh. Hi tlawng din an tum nak cu a rei zo nan covid pulhnat ruangah ni an rak thawn. Hi tlawng din dingih an rak tumtahnak a rei zo. Motbari Parish kiangkap ah mirang tlawng um ding a sin an a um lo tiin tlawng ih tuanvo neitu Fr. Pronbash Pius Rozario in a simfiang.

          Tlawng ih thulu cu ‘One fire kindles other fires’ (meikang pakhat in a dang khal mei a van sak thei) ti a si. Mino pawl ih thangliannak thawn ram mipi tha le ram duhdawtnak thinlung nei dingah zirh in thanso ter a duh. Tumtah mi cu ruahnak thanso ding lawng a si lo. Thinlung lam khal thangso dingah a si.Khualipi Dhaka ih Archbishop Bejoy N.D’Cruze khal on puai ah a rak tel. Ram sungah fimthiamnak lam thlengawknak tuah dingah thasuah a tul. Pawlpi cun milai pawlkom thatnak tuah in teette khaan a tul. Pawlpi ih hohanak thawn din mi tlawng in tlawngta pawl fimnak phunphun thiam ter a duh. Sumdawnnak thatnak hlawknak hrang lawngih hi tlawng din mi a si lo. Tlawngta pawl in thiamnak a famkim mi fimnak an ngah ding. Zirh mi thiamnak pawl ih man neih zia, tui ni ramkhel ih a tel rero tu pawl vekin ram thatnak tuah tu pawl suah dingah khal saya/sayamah pawl a rak forhfial.

          Tui hluatdaw hotu, Shirin Sharmin Chaudhury le fimthiamnak lam ih minister Dipu Moni pawl khal khualipi Dhaka ih din mi ‘Holy Cross’ Catholic tlawng ih tlawng rak kai tu pawl an si thu, cui hmun ih Catholic kohhran mipi pawl in Jesuit pawlkom hnenah tu vekin tlawng hoha ih an din sak ruangah lungawi thu an sim. Ziangah tile hi hmun ah tu vekin san man mi fimthiamnak an tul tuk. St. Xavier ramhuap thawn pehpar mi tlawng dinnak cu Pathian in cui hmun mipi pawl ih thlacamnak aw a ngainak a si thu, fimthiamnak cu mitin ih thanliannak ah a tul. Hi tlawng in cui hmun ih um mipi pawl lung a hmui ter ding. Hi tlawng cu Catholic tlawng a si ko nan Biaknak, miphun thleidang lo in fim zir thei nak tlawng a si.

          Mah rori khal acozah tlawng saya pakhat a si mi Suren Gomes in tui tlawng din in fim zirnak a pek cu an lung hmui thu, leitlunhuap ah Jesuit Puithiam pawl cun an fimthiamnak hna an tuan thu, hi tlawng dinnak cu Pathian ih thluasuah a si ih Pathian hnenih an lungawi thu, kan fa le pawl, neta tesinfa pawl in thiamnak a famkim mi thiamnak an ngah ding.

          Bangladesh ah Jesuit Puithiam pawlkom cu cui hmun Christian pawl a um thok ihsin a si. Cu pawl cu kumzabi 16 ah Bangladesh tifinriat ah hmaisabik rak hman mi Pathian riantuannak pawlkom a si. Asinan, neta lam ah ramkhel daan ruangah cui hmun an tlansan ih 1994 in Bangladesh Catholic Bishop pawl pawlkom ih sawmnak thawn rian a rak tuannak a si.

          Tu ahcun Bangladesh ramsung ah Jesuit tlawng (3) a um ih, cui hmun mino (23) Jesuit pawlkom pawl an si. Cu pawl cu Parish pawl ah, nunphung, thansonak, thlarau lam, miharsa pawl runnak, mino pawl sawmdawlnak, kiangkap kilhimnak ti vek lam ah thatho zet in an tuan. Bangladesh ram ah ram mipum taan (165) sungin, Muslim zateek 90 an um ih Catholic mipum cu 400,000 lawng a um. Bangladesh ram ah Catholic University tlawng pakhat, college tlawng (13), phunhra tlawng (200) luan, hramthok tlawng, technology tlawng pawl, pumcawmnak tlawng (500) hrawng a um.

          Hi thuthang cu RVA thuthang ih kan ngah mi a si.

https://bit.ly/3SJJ5jQ