Pope Francis in Vatican ih Communication zungah Indian Siangbawi tuanvo pek

Pope Francis in Vatican ih Communication zungah Indian Siangbawi tuanvo pek 

30.9.2022

Asia Bishop Pawlkom ih Executive Secretary tuantu Fr. George Plathottam cu Vatican ih Communication (Petlaih awknak/thut theihternak) zung ah thuronmi lakih tel ve dingin hrilnak a ngah

 
September 29 ah Pope Francis in Vatican ih Communication zungpi ah sungtel si dingin mi 2 a hril ih thuronmi dinhmun in mi 10 a hril tiah Vatican Thuthang in a sim.

Fr. George Plathottam amah lawng hi Asia huap ihsin Vatican Communication zungpi ah hnatuan dingin hril mi a si.

“Hi hnatuan thar pekmi hin mangbang le lungawi in i tuah” ti’n Fr. George Plathottam cun RVA thuthang ah a sim.

Vatican Communication zungpi ih sungtuan si dingah hrilnak a ngahtu mi 2 cu Archbishop Ivan Maffeis (Italy) le Bishop Valdir Jose De Castro (Brazil) an si.
 
Cule, thuron dingmi dinhmun ih hrilmi mi 10 pawl cu: Fr. George Plathottam, Oscar Elizade Prada, Helen Osman, Fr. Fabio Pasqualetti, Sr. Veronica Donatello, Sr. Adelaide Felicitas Ndilu, Fr. Andrew Kaufa, Tomas Insua, Professor Antonio Cisternino le John E. Corcoran pawl tla an si.

2015 kum ah Pope Francis in Vatican ih petlaihawknak fehdan pawl thate’n kaihruai dingah Communication zungpi a rak din mi a si ih himi zungpi ah sungtel, hotu le thuronmi ti’n phuaih 3 in hna an tuan rero.

Asia ihsin Bishop 3, Cardinal Charles Maung Bo (Myanmar), Cardinal Thomas Aquino Manyo Maeda (Japan) le Bishop Pierre Nguyen Van Kham (Vietnam) te pawl cu Vatican ih zungpi sungtuan an si ve.

2019 kum ihsin Fr. George Plathottam cu Asia Bishop Pawlkom ih pehtlaihawknak zung a rak hoha rero zo. Himi zung in RVA kan timi Asia huap in tong 22 hmangin Catholic thuthang zamnak khal tuanvo a lak cih mi a si. RVA a rak dinnak hi tu cun kum 52 a rei zo.
 
Fr. George Plathottam hi media trainer khal a si, journalist khal a si ih communication lam thiam zet mi khal a si.

Amaih hohanak in Asia Bishop Pawlkom ih pehtlaihawknak zungpi in communication lam ih training peknak dingah ti’n 2019 kum ah Veritas Asia Institute of Social Communication (VAISCOM) timi pawlkom cu Philippines ram, Manila khuapi ah a rak dinsuak.

Fr. George Plathottam in Philippines ram ih College of Communication tlawng le Polytechnic University tlawng ah fimnak a zir rero tu undergraduate le graduate tlawngta pawl ca a zirh rero. Cule, India ram, Assam ramthen ih Donbosco tlawngah communication lam ih doctor degree hrang tim a tuah rero tu tlawngta pawl khal guide tuansak rero tu a si.

A hlan ah India ram, Shillong khuapi ih St. Anthony’s College tlawng ah Mass Media Department ih director dinhmun in siseh, Indian Catholic Press Association (ICPA) pawlkom le South Asian Catholic Press Association ih president dinhmun in siseh, South Asia Religious News ih editor dinhmun in siseh tuanvo a rak lak dah.

Cule theology, sociology, le journalism le mass communication lam ah master degree 3 a ngah ih Shillong ih North Eastern Hill University tlawngpi ihsin doctor degree khal ngahtu a si.

2008 ihsin 2015 tiang India Bishop pawlkom ih pehtlaihawknak zung ah secretary a tuan ih 2012 ihsin 2015 tiang National Media Training and Research Institute (NISCORT) timi pawlkom ah director a tuan.

1992 kum ah Union of Catholic International Presses le German cozah ih pekmi North-South Friendship Prize timi laksawng a rak ngah.

https://bit.ly/3CwjXYS