Kalay Diocese, Khampat zone Pathian thusimtu saya pawl thuzirhnak tuah (October 17, 2022)

Kalay Diocese, Khampat zone Pathian thusimtu saya pawl thuzirhnak tuah (October 17, 2022)

              Kalay Diocese, Khampat zone Pathian thusimtu saya thuzirnak cu Khuan Nuai khua ah October 4 ihsin 8 tiang an tuah. Himi thuzirnak ah Pathian thusimtu saya 41 sungah 38 an tel ih Khampat ih Puithiam pawl anmah rori in an zirh. Diocese uktu Bishop Felix khal in pakhat le khui sung thu a zirh ih saya pawl khal an lungawi zet thu, cuihleiah cui hmun ih Puithiam khal in hoha nak thawn Khampat mino pawl nikhat sung thu a zirh bet tiin a sim.

Himi thu pawl thawn pehpar in thusuhnak ah, “hi tawk Khampat pawlpi ah Puithiam 6, Sister 28 in Pathian rian kan tuan. Pathian thusimtu saya pawl 40 luan an um. An hrangah thla hlawh khal 50000 hrawng vial kan pe thei ih, an nuntu khua sak nak hrang an zuam rero ih biaknak lam le innsang hrang a tul vekin an tuah thei lomi an innsang hrang harsatnak, Pathian riantuannak ah fehvahnak a that lo nak pawl ton a si. Thenkhat saya pawl cu an fale pawl ih fimthiamnak hrang hman ah an harsa tiin parish Priest Rev.Fr.Cyril Paupeek in RVA Myanmar thawn interview nak ah a sim.

              Puithiam um lo nak hmun pawl ah saya pawl cu Pastor vekin an Tuu khal an hoha ruangah an hrang ih a tul mi thuzirhnak pawl an tuah sak. A hlan ih thuzirnak pawl cu thu botcat nak pawl khal tuah taktak thei le thei lo an rel tiin khal thuzirnak tuahnak ih tumtahnak cu Father in a sim.

              Pathian thusimtu saya a tuan duh tu cu Parish Puithiam hnen ihsin ram sung saya tuannak thawn pehpar mi thuzirnak ah form kuat in an dil thu, fimthiamnak rikhiahnak a um lo nan Puithiam hnen in zoh fel hnu lawngah thuzirnak ah an kuat tiin an sim.

              Khampat zone ah Kohhran mipi 5000 luan an um ih zone in saya thuzir nak cu kum hnih ah veikhat an tuah theu. Khampat khuapi cu Kalay – Tamu – India ramri ah a um ih Kalary Catholic Archdiocese kuttang ih um Parish khal a si.

Photo courtesy: RVA Tedim.