St. Joseph Sr. pawl Kawlram thlennak (175) kim Jubilee hngilhlonak (1847 – 2022) (Oct 23, 2022)             Lumbang Parish, Lumbang ih um langnak hmutu St. Joseph Sr. tlawngih thuanthu tawi

St. Joseph Sr. pawl Kawlram thlennak (175) kim Jubilee hngilhlonak (1847 – 2022) (Oct 23, 2022) 

           Lumbang Parish, Lumbang ih um langnak hmutu St. Joseph Sr. tlawngih thuanthu tawi

                                                                                                                                                  Ngantu – RN, Auna

           Fr. Joseph Muffat ih sawmnak vekin langnak hmutu St. Joseph Sr. pawl cu Pathian hnatuan dingah 1956, kumthok lam ah Zanniat miphun pawl umnak Lumbang ah an rak thleng. Cui caan cu Lumbang mi Sub. Con Hniar ih lamhmuhnak thawn Pathian thusimtu Reuben ih rak tuan thoknak Lumbang khua ah Catholic zumnak kum (16) rei rak um caan, Fr. Muffat, Lumbang ih a umnak kum (8) kim caan a si.

           Lumbang khua cu Kawlram ah St. Joseph Sr. pawl riantuannak hmunriatnak a si ih Chin ram ah hmaisabik Pathian hnatuannak hmun a si. Hmaisabik rak thleng tu Sr. pawl cu 1. Mother Milburga, 2. Sr. Marie De Vialar, 3. Sr. Adalaide Peters, 4. Sr. Regina Sue pawl an si.

           Sr. pawl an thlen thok in nunau pawl cazirhnak, thil thit zirhnak, siikhaan phuannak, Convent tlawng phuannak pawl an rak tuah. Lumbang khua ah thansonak malte lawng um lai san ah thatho zet in tha an rak suah. Hmun hlapi ah mi harsa le a dang harsatnak phunphun tuar in Pathian hna an rak tuan. Harsatnak pawl sungin tong an theih lo nak hi a harbik thu Sr. pawl ih thuanthu le Sr. pawl Zanniat tong rak zirh dah tu ih sim vekin theih a si.

           Hlan Sr. pawl ih cin le daan neih nak, ap aw in thungainak, lainatnak pawl cu cui san man mi kum upa pawl in tu le tu an sim theu ruangah santhar mino pawl ih ruahnak sungah upat in lungrualnak pawl a langsar ter.

Lumbang Parish sung St. Joseph Sr. pawl ih tuan rero nak dungthluntu hnatuan pawl-

Thlarau lam

           Thlarau lam hnatuan pawl ah nauhak pawl Pathian thuzirhnak, Parish sungah kumtin tuah theu mi Nu Bu, Pa Bu, mino pawl le nauhak pawl puai ni ah Pathian thuzirhnak, tindaan peknak pawl an rak tuah. Lumbang Biakinn (Vancungram ih hruainak ngahtu Bawinu) ih Biakthawinak le Missa Sumnak hrangah nitin timtuahnak ihsin tulsam mi phunphun khal Sr. pawl in tuanvo la in an rak tuah sak.

Harhdamnak

           Sr. pawl thlen kum 1956 ihsin thok in siikhaan an rak phuan ih hmaisabik siikhaan ih tuanvo latu cu Sr. Regina Sue a si. Nurse pakhat a si mi Sr. Regina ih thiamnak ruangah mi dam lo tampi in doctor pakhat dinhmun tiangin an rak ruat dah. Siikhaan phuan caan ihsin thok in tui ni tiang Lumbang khua le kiangkap khua pawl ih rinsan zet mi in kum reipi remcang zet in an rak phuan thei. Sr. pawl in siikhaan ih feh thei lo mi minaa pawl khal an inn ah feh in an va tuamhlawm theu. Lumbang khua ah acozah ih siizung um cing in Sr. pawl ih siikhaan ih piah aw tu cat bang lo ih an um nak cu Sr. pawl ih minaa pawl parih an neih mi duhdawtnak, zawnruahnak, zaangfahlainatnak le an pehtlaih daan pawl ruangah a si ding.

Fimthiamnak

           1956, Sr. pawl an thlen pek ah zaan ah ca zoh an kil ih nunau pawl ca an rak zirh. Cui san ah laitlang ah nunau pawl tlawng an rak kai hrih lo. Cui hnu ah Sr. pawl in St. Joseph Convent an hmin than deuh hnu ah Kalay, Falam, Hakha lam ih sumpai nei deuh pawl le sinak nei pawl in an fale pawl cu Lumbang, St. Joseph Convent tlawng ah an rak kai ter. Hi mi cu Lumbang hmin tha ter tu pakhat a si. 1962 ah mipi ih an lon hnu ah hi St. Joseph Convent tlawng khal an rak long ve.

           Sr. pawl in cin le daan thawn Boarder tlawng an rak din ih Boarder ih um tu mipum (70-100) lak an um theu. Hi Lumbang, St. Joseph Boarder tlawng ih phunhra ongtu cazin thaten an rak tuah lo nan mipum 50 luan ding cu a fiang tuk. Hi boarder ih rak um dah tu pawl sungin Puithiam pawl, Brother pawl, Sr. pawl, Pathian thusimtu saya pawl tamnawn an um zo.

           Hi St. Joseph Boarder tlawng le Lumbang Basic Education High School pawl cu thenawk theih lo, tidai le nga te vek, nu le paw leh fate vekin khat le khat rinsan aw in an um.

           2004 ah St. Joseph nursary tlawng an rak din ih tui ni tiang kum a dotdot in tha ten an phuan ih 2018, June 01 ah lungkimnak thupek (05) 1.6.2015 thawn volunteer zungih nemhngetnak an rak ngah. Lumbang khua ih um nauhak zaten Biaknak thleidang lo ih a kai lawng si loin kiangkap khua Par te khua ih nauhak pawl an rak kai mi khal hi Sr. pawl ih nauhak pawl par an ret mi thinsaunak, duhdawtnak thawn kilkhawinak le tha ten an zirhnak pawl ruangah a si.

           1956 ihsin thok in tui ni tiang Lumbang Parish sungih St. Joseph congregation ih luttu Sr. 26 an um zo.

           Lumbang Parish, Lumbang khua ih Pathian hna rak tuah tu St. Joseph Sr. pawl –

1. Mother Milburga                                           1956

2. Sr. Regina Sue                                               1956

3. Sr. Adelaide Peter                                          1956

4. Sr. Marie De Vialar                                       1956

5. Sr. Marie Kyi                                                 1986 – 1992

6. Sr. Agnes Peter Kam Do Ciin                       1984 – 1993

7. Sr. Gabriel Ruang Meng                                1987 – 1989

8. Sr. Dorathy Monteiro                                    1985 – 1992

9. Sr. Caroline Hmun Bawi                               1989 – 1994

10. Sr. Marie Stella                                            1991 – 1993

11. Sr. Lucy Paul Htwe Men                               1993 – 1994

12. Sr. Benadeth Nem                                      1994

13. Sr. Winnifred Jerome                                 1994 – 2004

14. Sr Imelda Nuam Bawi                                1996

15. Sr. Joanna Vung                                         1999 – 2005

16. Sr. Rose Mary Myint Myint Htwe              2001

17. Sr. Josephine Cing Khawl                           2002- 2008

18. Sr. Felicity Cin Lian Niang                         2004 – 2008

19. Sr. Patricia Hoosay

20. Sr. Joanna Peter                                          2001

21. Sr. Perpetua Liam                                       2005 – 2008

22. Sr. Anne Maire Mawi Meng                        2007 –2009

23. Sr. Perpetua Kung 2008

24. Sr. Theresa Mary Bual Dawh Sung           2008 – 2017

25. Sr. Angela Thuam Zam                              2009 – 2012

26. Sr. Angela Zun Rem                                   2009 – 2015

27. Sr. Maria Thian Za Nem                             2011 – 2014

28. Sr. Joanna Vung                                         2012 – 2012

29. Sr. Joanna Vung Ta                                    2012 – 2020

30. Sr. Theresa Yin                                          2013 – 2014

31. Sr. Paulina Par Cung                                  2014 – 2016

32. Sr. Regina Ngun Za Hnem                         2014 – 2019

33. Sr. Lucy Hoih Nei Lhing                            2016 – 2017

34. Sr. Agatha Sang Nei                                   2017 – 2018

35. Sr. Maria Law Gei Sein                              2017 – 2020

36. Sr Henry Don Khan Lun                            2018 – 2019

37. Sr. Maria Se Khaw Lam                             2020

38. Sr. Briget Kee Khaw Lam                          2019

39. Sr. Josephine Sa Tin Cung                         2020

40. Sr. Assumpta Van Nei Zing             2017

           Hi cazin cu Lumbang St. Joseph Sr. pawl ih thuanthu ca uk ih hmuh mi vekin tarlang  mi a si ruangah a famkim lo mi tete tla a um men thei. Ca ngantu dinhmun in fakim ten ka ngan thei lo ruangah thi a nuam lo zet. Hmin ngan ngah lo mi Sr. pawl nan um pang le in ngaithiam hram uh.

Congregation dintu                                 St. Emily De Vialar

Suah kum                                               12.9.1797

Suahnak khua                                         France, Gaingwak khuapi

Congregation din ni                                24.12.1832

Thih ni                                                    24.8.2856

Mithianghlim ih khaisan ni                    24.6.1951

Kawlram ih thlen ni                                17.6.1847

Hmaisabik thlennak                                Mon ramthen,

                                                                Mawlamyine khuapi

Lumbang khua ih thlen ni                      ….1.1956

Congregation hminsinnak (logo) ih duhsan

           Bawi Jesuh tel lo mi Thinglamtah tinkim in Bawi Jesuh Thihnak a neh thu a ti duhsan a si ih Thinglamtah cu Sr. pawl ih nunram ah thenkhat ih a um thu a langter.

> S cu Sister a ti duhsan a si ih

> J cu St. Joseph  ti duhsan

> A cu Apparition langnak ti duhsan a si.

Congregation ih motto – nunnak cem tiang zuam zet ih Pathian hnatuan

Thlarau lam thlun mi – Fapa Pathian ih minung cannak a laknak

* Sirhsan mi pawl – St. Joseph Sister pawl ih Kawlram thlennak kum (175) kim                                          cauk

* Sr. Maie Kyi, SJA ih ngan mi Give thank, 175 years of service in Myanmar -       Philippines – Singapore ca uk

* Basic Education High School tlawng, Lumbang diamond Jubilee hngilhlonak  (1925 – 2000), magazine ca uk

* U Sang Lyen ih ngan mi Hlur Hmung San le Lumbang thu a tlawm ca uk

* St. Joseph Sr. pawl Kawlram thlennak kum (175) kim Jubilee hngilhlonak ih suah mi 2022 calendar

* Sr. pawl hnenah hnenum ih um dah tu Pi Sui Hnem (Tial Uk Ni) ih sim mi pawl

* Lumbang St. Joseph Sr. pawl ih thawn daan ca uk pawl

* Fr. Paul Kip Thawng ih ngan mi 2014, Lumbang Parish ih kum (75) kim diamond Jubilee hngilhlonak ih rak suah mi Lumbang Parish Thuanthu a comzawng cauk

Hi thu hi Jubilee thuanthu thawn peh par ih kan run tar lang a si.