The Voice of Italy laksawng rak ngah tu Sr. in a thianghlim mi a nunram tansan

The Voice of Italy laksawng rak ngah tu Sr. in a thianghlim mi a nunram tansan

          2014, The Voice of Italy ih hla zuamnakawk ah mipi thapetu pawl lawng si loin daing pawl khal rak mangbang thluh ter tu Sr. Cristina Scuccia in a mai Sr. nunram a rak suahsan zo. A mah cu 2014, The Voice of Italy laksawng rak ngah thei tu a si ih Catholic Sr. pakhat a si ih Ursulines congregation sungtel Sr. pakhat a si.  A mah in thih hlan lo ap aw in thukamnak khal Sep, 2019 ah a rak lak ih Sr. a tuannak kum (15) a kim zo. A mah cu kum (34) a kim zo. Sr. nunram a tansan hnu ah Spain ram ah cabuai tthu a tuan ih awnmawi lam khal a tuah bet ding thu a sim.

      Kan dung Zarh ah ‘Verissimo’ Italy programme pakhat ih thusuhnak ah Sr. angki hruk loin angki menmen a sen thawn make-up a thuh. Cui hla zuamnak ih hlawhtlinnak ih a rak thleng awk ter. A tlaitluang mi thubohcatnak cu covid pulhnat thawn mah le mah cek awk caan a rak si thu, social media pawl ih tarlang mi thuthang pawl cun a mah thusuhnak tampi sut dingah an rak can ter thu, nunram dinnak umlonak khal a rak ton thu, a mah le a mah zo a si ti khal cek aw thei nawn lo mi dinhmun tiang a rak can thu, curuangah thinlung lam siibawi thawn khal cekawknak a rak tuah thu, a mah dinhmun in Sr. nunram dungsiip dingih thu a rak bohcatnak a si tiah a sim.

          A harhdamnak a rak besia tak dah. A mai zalennak cu Sr. angki hruknak ih daan sungah khum tuar mi vekin a rak tuar. Ziang a cang ti a thei aw nawn lo. Asinan, Pathian a hngilh lo. Sr. angki hruk mi nunram ih hmuh a theih nawn lo. a mah dinhmun in zumnak nunram tansan a duh lo. Pathian zumnak a nei. Zumnak ih kekarnak tansan a tum lo. Tu ahcun a rak ton mi pawl ruangah a lungawi thu a sim.

          A mah cu Italy ram, Sicily peng, Vittoria ah a rak suak. A kum 19 ah Ursulines Sr. congregation ah a rak lut. 2014, The Voice of Italy zuamawknak hrangah mi an hril ih a aw ruangah cui program suahtu in Sr. hla zuamawknak ih tel on dingah zaangfah a rak dil sak. Laksawng a ngah mi netabik caanserh ah caanserh zoh rero tu mipi pawl cu Vancung ih um mi Kan Pa thlacamnak veikhat ten cam tlang dingah a rak ngen. Ziangah tile hi vekih cang dingah ka rak ruat dah tiah a sim.

          A thok lam ah hla zuamawknak ih sawmnak a rak tih tak. Veihnihnak ah Pope ih lamhmuhnak a si mi farah veng pawl, mipi feh mal nak hmun pawl ih thuthangtha phuang dingah feh uh tiih a cah mi a si ding tiah ruat in a rak zuam thu 2019 ah a rak sim dah. A mah cu congregation in siseh, Sr. nunram in siseh dung a rak siip ko nan Nu Pawlpi in thuthang suah mi a nei lo tiah theih a si.

          Hi thuthang cu CNA thuthang ih kan don mi a si.

https://bit.ly/3OyTLRw