India: Khrih zumtu pawl, an khuapi pawl ih thinheng ih hringhronak tong

india_ram.

Monday, December 12, 2022

India: Khrih zumtu pawl, an khuapi pawl ih thinheng ih hringhronak tong.

India ram, Chhattisgarh State, Kondagaon peng ih um, Bhaisabod khua ah innsang hrekkhat pawl cu Khrih an zumnak ruangah hringhronak le siatsuahnak an tong. Innsang 8 ihsin upa nauhak mipum 15 hrawng cu Khrihfa pawl ih thlacamnak ah an thinlung a lut tuk ih Khrih thuthluntu pawl ih lamzin an thlun thok. Asinain, an khuapi pawl cun himi thu an theih tikah, lungawipi thei lo’n an hringhro ih, an hmuh thar mi Khrihfa pawl ih nundaan pawl tansan in an zumnak hlun ih an kirsal lo aisile, an parah tihnungza thil thlengter ding tiangin ralrinnak an pe. Himi innsang 8 sung ihsin Christian daan vekin biaknak sungah a lutfel ngaingai tu zo hman an um hrih lo nan, Khrihfa pawl ih cam mi zanlam thlacam cu an nei theu. Anmah lam cun, Christian nundaan thlun in, thla an cam tikah hnangam daihnak an hmuh thu an sim. Khrih ih an zumnak an hlon duh lo ruangah, rua-fung le kedam pawl thawn vuak le thawinak an tuar ih, hrekkhat inn tla cu siatsuah mi tla an um phah. Hmuhsuam tongtu innsang pawl cun an nunnak hrang thinphannak ruangah police pawl hnen ah humhimnak pe dingin an rak dil.

Police lam ih simnak vek a sile, hi thil cang mi hi, mi hrekkhat pawl in midang pawl hnen ih Jesu Khrih an zumnak thuhla an relnak ruangah a suakmi innsang buainak men a si an ti. Asinain, pengtlang police zung cun, mawhnak neitu pawl parah a tul dandan ih thuthennak tuahsak ding thu an kam. Hmansehla, hmuhsuam siatsuah tongtu innsang sungtel pawl cun, tuanvo neitu police zung lam ihsin hi thubuai thu, tha te’n an tawlrel sak ding an zum lem lo. Chattisgarh State ih Christian Welfare Society timi Khrihfa pawl thatnak ding lam tawlrel tu pawlkom cun, siatsuahnak a tuahtu pawl kai ding ah dilnak an nei.

https://bit.ly/3HBxHUS