Pope Benedict XVI ih ruakvuinak caanserh programme le Pope hnatuan upa sinak pawl.

Pope Benedict XVI ih ruakvuinak caanserh programme le Pope hnatuan upa sinak pawl.

          Pope Francis in Pope Benedict XVI ih ruakvuinak caanserh cu Pope upa sinak famkim thawn a tuah ding. Pope Benedict XVI hrangah ruakvuinak Missa Sumnak (Requiem Mass) cu Rome tikcu caan zing nazi 9:30, 2023, Jan 05, tlawngkai nili ni ( Kan Kawlram 3:00 pm) ah an tuah ding. Pope Benedict hrangah ruakvuinak Missa Sumnak caanserh ca uk fate Booklet an suah ih caanserh vekin Pope Benedict cu Pope a dotdot ih ruakvuinak caanserh thawn kaih in an tuah dingih tui a hruaikai tu Pope Francis in a uk rero lai ruangah a mah thawn mil aw mi caanserhca, hman mi pawl an timtuah. Tui caan ahcun 2023, Jan 2-4 tiang, nithum sung minung tampi in upatnak pe thei dinah Pope Benedict cu Pope a dotdot, ruakvuinak caanserh ih hruk theu mi angki sen a hruk ih St. Peter Basilica Biakinnpi ih a lai ah an ret.

          Pope Benedict XVI cu nitin ten mipum taan thum le hrek hrawngin an ra zoh ding tiin an ruat lawk ko nan ngaingai ahcun nitin ten mipin 135,000 luan in upatnak an pek thu theih a si. Pope Francis in Pope Benedict hrangah ruakvuinak caanserh, thuthangtha simnak le (netabik Pathian hnenih apnak/thlahnak) Rites of commendation and Valedictio caanserh thawn an cem ter ding.

          Ruakvuinak Missa Sumnak ih siar ding mi Cathianghlim cu Lk 23: 39-46 sungah a si dingih cui catlang ah Thinglamtah parih Bawi Jesuih kiangah an thlai ve mi hnenah Vancungram, Paradise ah a mah thawn a um ding mi catlang a si. Bawi Jesuih netabik tongkam cu “Aw Bawipa, ka thlarau cu na kut sungah ka lo hlan” ti mi catlang a si. Bawi Jesuih netabik tongkam cu “Maw Bawipa, ka lo duh” tiih rak titu Pope Benedict XVI ih netabik tongkam thawn a danglam aw tuk lo.

Ruakvuinak caanserh

          Pope Benedict ih ruak vu ruakkuang pathum ah an re ding. Cu mi pawl cu Cypress ruakkuang, Zinc ruakkuang le Elm ruakkuang pawl an si. Pope ih ruak cu Cypress thawn tuah mi ruakkuang sungah an ret dingih cui ruakkuang sungah sui, ngun le dar fun pawl khal an re ding. Cypress ruakkuang tuah ti tikah Pope khal minung pakhat a si ve ti duhsan a si ih Cypress ruakkuang cu zinc thawn tuah mi ruakkuang sungah an ret. Zinc ruakkuang parah Pope Benedict ih hmin, Pope a tuan kum an tarlang ih luruh le Thinglamtah khal ant uah.

          Pope Benedict XVI ih ruak suah mi Pope ih capi pawl khal cui zinc ruakkuang sungah an ret. Zinc ruakkuang cu a hnget zet ih a siat har. Elm ruakkuang sungah zinc ruakkuang an ret. Zinc ruakkuang le elm ruakkuang sungah marble lungpheng an dam. Elm ruakkuang cu Italy ram ih hmuh har zet mi thing phungkhat a si ih cui elm ruakkuang cu sui pawl thawn an khuh. A duhsan cu Pope ih upat tlak langsar ternak a si.

          Pope Benedict XVI ih a hruk mi angki rong cu sendup a si ih cui sui rong kiangah an telh. Cui angki sendup cu Asutralia ih tuah mi leitlunhuap mino pawl ni ih hruk mi angki sen thawn a bang aw lo. Pope Paul VI a rakt hih kum 1978 ihsin Pope pawl ih ruakvuinak caanserh angki rong cu sendup a si. Ruakvuinak caanserh cu (a rang lukhuh, sui telh) Pope ih lukhuh, Pope lawngih orh mi Pallium tthi pawl cu Pope Benedict ih hruk ding mi a si vekin Pope Benedict ih tacik, Pope Benedict sanlai ih a zuk le paisa fang tivek hminsinnak pawl khal a tel ding. Ruakvuinak Missa Sumnak theh tikah Pope Benedict ih ruak cu St. Peter basilica Biakinnpi ih leithuai ih um Pope pawl an vuinak hmun ah an ret ding.

          Pope Benedict XVI a thih hlan te ah a mah phum ding a si le hmunthar timtuah duh loin a hlan ih Pope Paul VI an rak phumnak ih phum dingah a rak dil. Cu vekih a dilnak cun Pope Benedict ih tangdornak a langsar ter.

          Hi thuthang cu Vatican thuthang ih kan ngah mi a si.

https://bit.ly/3iiLhT5