Cambodia Bishop, Olivier in Pope Benedict ih keneh thlun dingah Catholic mipi pawl forh.

Cambodia Bishop, Olivier in Pope Benedict ih keneh thlun dingah Catholic mipi pawl forh.

          Bishop Olivier Shmmitthacusler in Jan 2 ah Pope Benedict XVI ih nunram cawng dingah le zumnak nunram hrangih lam a hmuh mi pawl thlun cio dingah zumtu pawl a rak forhfial. A mah cu kan dung ih nunnak cemtu Pope Benedict XVI mansalnak Missa Sumnak le Pathian ih Nu, Bawinu Maria ih puaini ah Cambodia ram, Kandal province, Lvea Em ramthan ih remdaihnak Siangpahrang Bawinu Biakinn ih a rak sim mi a si.“Duhdawtnak lamzin thlun cio uhsi. Zaangfah lainatnak thinlung thawn midang thatnak hrangah kan nunnak hlan ding ngam cio uhsi. A famkim mi lungawinak taktak thawn Pathian hnenah nuam ten feh uhsi,” tiah Bishop in a rak sim.

          Phnom Penh Vicariate ih the Apostolic Vicar in nunphung le a hngetkhoh mi zumnak nei dingah Pope Benedict XVI ih Catholic mipi pawl lam in rak hmuh mi a rak langsar ter. Bishop Olivier in, “Pope Benedict XVI ih ruahnak pawl, nunram le a hnatuan mi pawl cu tongkam ih sim theih a si lo,” tiah a rak sim. Germany le France ih ambassador pawl in zumnak le Biaknak lam ministry ih State Secretary le mino burpi pakhat le Catholic mipi pawl an rak tel.

          Bishop in nunnak cem tu Pope ih a sim mi sirhsan in “kan leilungpi tharthawh kan duh a si le, kan leilungpi run kan duh ngaingai a si le ti daan pakhat lawng a um, cu mi cu Pathian kan hawl hmuh sal a tul,” tiah a rak sim. Bishop in ‘an thinlung ah Pathian umnak ziangtin cohlan a tul ti an theih le, Pathian ih duhdawtnak midang pawl ziangtin hlawm ding ti an theih le, lungawinak taktak ih lamzin ah an feh thei ding,’ tiah thuk zet in a rak sim.

          Bishop in 2009 ah Phnom Penh hrangih coadjutor Bishop dinhmun ih tuanvo peknak le 2010 ah Vicariat thotho ah Bishop ih tuanvo an pek lai ah nunnrak cemtu Pope hnen ihsin hleice tak in laksawng a rak ngah. Jan, 2013 ah Cambodia ih Catholic Pawlpi in nunnak cemtu Pope Benedict XVI a rak colh hlan te ih a sim mi video pakhat an rak dong.

          A thusim mi cu the Second Vatican Council kum 50 kim anniversary le the Compendium of the Catechism of the Catholic Church ih kum 20 kim anniversary hrangih a rak sim mi a si. Pope dinhmun in video thawn message a rak kuat. Asinan, a mai netabik video ih tongkam cu Cambodia Pawlpi hrangah a si. Kan pawlkom humhim dingah le kan zumnak humhim dingah Mekong Mary hnenah zaangfah a rak dil tiin Bishop Olivier in a rak nemhnget.

.

          Cambodia ih Superior of the Providence sisters sungtel, Sr. Anne Lucie Nguyen Kim Nga in Pope Benedict XVI a thih caan ah a nunram cu a rak remdai zet tiah a rak sim. Sr. in lenglam lawngin si loin Pathian thawn kan pehtlaih awknak le nunram sung Pathian thawn kekarnak thawn sunglam ah Catholic sungtel pawl an si thu a rak sim bet.

          “Pawlpi cu Pathian ih tidaan ih kekar thei dingah rak bawmtu, Pope Emeritus Benedict XVI ih san lai ah Pathian hnenah kan lungawi. Catholic pawl in Pathian thei sinsin dingin a mai theology ihsin lamhmuhnak rak pet u Pathian hnenah kan lungawi tiin Pope mansalnak ih thu a sim mi ah Deacon Vy Sammanang in a rak sim. Nunnak cemtu Pope Benedict XVI cu April 16, 1927 ah Germany ram ah a rak suak. Suahpi unau 3 a nei. April 19, 2005 ah vei 265 nak Pope dinhmun ah a rak cang ih a harhdamnak dinhmun ruangah Feb 28, 2013 ah a rak cawl.

          A kum 95, Zarhte ni, zinglam 9:30 am, (3:39 pm, Cambodian time) ah Vatican ih the Mater Ecclesiae residence ah a nunnak a rak cem. Pope a tuan lai 2005 – 2012 sungah, ram 27, European, Latin American, America, Africa le diplomacy, Christianity le zumnak sungih pehtlaihnak hngetkhoh ter dingah nisuahnak lam Asia ram pawl ah a Tuukhaal khual a rak tlawng.

          A nunram ah, Theology a rak zir ih theology professor a rak can hnu ihsin Pope ah a rak cang. Theology, thlarau lam nunram le Catholic formation lam in ca uk 66 a rak ngan.

          Hi thuthang cu RVA thuthang ih kan ngah mi a si.

https://bit.ly/3iBwkeR