Australia Bishop in Cardinal George Pell a nunnak a cem nak ruangah a riahsiat nak lang ter.

Australia Bishop in Cardinal George Pell a nunnak a cem nak ruangah a riahsiat nak lang ter.

          Australia Cathoilc Bishop pawl pawlkom president Archbishop Timothy Costelloe in January 11 ah Cardinal George Pell ih nunnak cemnak ruangah a riahsiat nak a lang ter. Australia mi Cardinal Pell cu January 10 a kum 81 ah a nunnak a cem. “Rinlopi Cardinal George Pell in Rome ih in tansan nak cu riahsiat za a si” tiin Archbishop Costelloe in a sim. Archbishop in Cardinal Pell cu kum 25 luan lai Bishop pawlkom, Sydney ih Archbishop, Melbourne ih Archbishop le Australia ih Catholic Pawlpi ah a fel le adik mi hotu a si tiiin a sim.

          “A thil ti theinak pawl cu Australia le leitlun killi ah mi theih asi, sumdawnnak lem le Cardinal pawl council sungtel khal in mi thiam nal zet asiih, Pope Francis ruahnakpe tu sungtel khal a si. Australia Pawlpi hotu in Cardinal Pell ih tuah tuan nak pawl cu Australia kohhran le leilung pumpi ah kum reipi a tang ding. Archbishop Costelloe in Catholic zaten le midang pawl hnen khal “Cardinal Pell hrang thlacam nak ah tel ve dingin, mifel le thuhman duh tu ih thlarau hahdam ten cawl dingin le a ro in tan mi pawl thawn kan mang ding. Reuters ih an simnak vekin Melbourne Archbishop Peter Comensoli in a thin a khuai nakin Cardinal Pell cu January 10 ah a nunnak a cem.

          Cardinal Pell ih nat nak cu Rome ih Salvator Mondi siizung ah tuamhlawm asiih cutawk hmun ah zan 9 ah a nunnak  cem. Thuhla an sim nak vekin Cardinal Pell cu Vatican ih vuinak an tuah hnu ah Australia ah an phurih, Vatican ih a thawn hlan kum 13 lai Archbishop atuan nak Sydney ih St.Mary Cathedral ah an phum.Cardinal Pell cu Vatican a nel zet tu mi pakhat asi. 2013 Pope an hril hnuah Pope Francis in kohhran remthatnak ih ruahnak pe dingah Cardinal pawl council ah a hmaisabik sungtel pawl a rak hril. Pope in Cardinal Pell cu sumdawnnak lam thuthuk ih hotu tiin a hril.

          Cardinal Pell cu 2017 ah sumdawnnak ih hotu ihsin a cawl. 1996 Melbuorne ih Archbishop a tuan laiah mipa pahnih taksa lam in a rak hmuhsuam tiin puhmawh a tuar. Hmaisabik a thu an thennak an theh hnu Cardinal Pell cu veihnih nak thuthen asiih kum 6 sung hrem a tuar. 2020 April ah Australia ih thuthen nak in ni 400 hnu ah mawh nak a neih lo thu an sim.

          Cardinal Pell cu 1941 June ah Australia ram Ballarat ah a rak suak. 1960 ah Werribee seminary ah a lut ih 1966 ah ordination a ngah. 1987 ah Melbourne ih Bishop a tuan ih 1996 ah Archbishop a cang. Vatican zung ah rian tampi a tuan. Cardinal Pell cu 2001 ah Sydney Archbishop a tuan ih 2003 ah Pope John Paul II in Cardinal sinak a pek. Pope Benedict XVI hril nak khal ah a tel. January 5 Pope Benedict vuinak khal ah Cardinal a rak tel. Himi thuthang cu RVA thuthang ihsin kan don mi a si.

https://bit.ly/3kmgq8E