“Religious (thukam pathum latu) pawl cu thlacamnak ih mi raltha pawl si a tul,” tiah Cardinal Charles Bo in sim.

“Religious (thukam pathum latu) pawl cu thlacamnak ih mi raltha pawl si a tul,” tiah Cardinal Charles Bo in sim.

          Myanmar Cardinal in apawtu (religious) pawl cu thlacamnak ih mi raltha pawl si a tul tiah apawtu pawl sunloih ni (Consecrated Life Day), Feb 2 ah Myanmar ram, Yangon Archbishop House ah a rak sim. “Thukam pathum latu pawl cu thlacamnak ih mi raltha  si a tul. Tui ram ih a cang rero mi buainak pawl ziangtin a reh leh ding ti kan thei ban lo nan, thlacamnak thawn ziangtin kan hngak ding ti kan theih a tul,” tiah Yangon Archdiocese ih Cardinal Charles Bo in a rak sim.

          Apawtu pawl sunloihni (Consecrated Life Day) cu Myanmar ram ih Religious Congregation 23 ihsin a tel tu 102 thawn an rak hmang. “Ziang hrangah kan nung? Ziang tumtahnak kan nei? Ziang ruangah hi tawk ah kan um? Ziang tumtahnak hman nei lo ih nun khuasaknak in leilungpi a rit ter,” tiah Cardinal Bo in a rak thangphawk.

          Gospel thuthangtha sungih siar mi Anna le Simeon tei thuhla thawn pehpar in Cardinal Bo in Simeon ih kum reipi a rak hngahnak le kum 84 kim zo mi Prophet Anna ih Bawipa a hngahnak a rak langsar ter. “Ruahsannak in mit ih hmuh thei lo  mi a hmu thei. Ruahsannak in hmuhtheih lo mi a hmu. Ruahsannak in a cang thei lo mi a ngah,” tiah Cardinal in a sim.

          “Pathian a hngak tu pawl cu a thar in an tha a tlung sal” tiah a rak simfiang. “Simeon in Messiah hmu ngah dingah a rak hngak. Thlacam nun le Pathian zumnak cu a hrangah a thupi tuk. A nunram cu hlawnthil, thuneihnak, sinak sang le dinhmun, hminthannak, hotu si ding, Bishop si dingah a si lo. Pathian hrang lawngah a si,” tiah Cardinal Bo in a rak sim.

          Tuni cangvaihnak pawl ah Mass raithawinak, thu reltlangnak, forum ong dingah le Biakthawinak pawl a rak tel. Covid-19 le ralkap ih uknak lonnak ruangah tlawng theh ta lo in tuan ten mino pawl ih thitumnak tuah mi pawl parih a sim mi ah Cardinal in, “ramdang hmun hlapi ih fim zirtu Puithiam pawl le thukam pathum latu tampi an um. Mino pawl hrangih an theihkauhnak hman ding hnak in, an colh a si le, ziang hman tuah lo ih an um le an dinhmun an mawhthluk,” tiah a rak sim.

          Yangon ih St. Mary’s Cathedral ih Parish Puithiam, Fr. Hyginus Myint Soe in “khualtlawn tlangnak le khualtlawnnak pakhat dinhmun in” synod thuhla cu cui ni ih a tel tu pawl hnenah a rak hlawm. Puithiam in, “Synod ih tumtahnak taktak cu kan congregation, pawlkom, le pawlkom din daan tharthawh dingah a si. Tharthawhnak tinkim cu laksawng le tuanvo pakhat a si. Pawlpi in a hmuhtonnak pawl thawn a zir ding,” tiah a rak langsar ter.

          Apawtu pawl sunloih ni (Consecrated Life Day) in program neta lam cu Religious Congregation phunphun lak ihsin thureltlangnak lole pawlkom pawl in thungainak, thapeknak, Synodality ih kan um daan ti vek pawl Synodality thawn hlawmawknak a si.

          Hi thuthang cu RVA thuthang ih kan ngah mi a si.

https://bit.ly/3XpepGC