Myanmar Chin Catholic community in Philippines ah Chin National Day (Lai Phun Ni) tuah.

Myanmar Chin Catholic community in Philippines ah Chin National Day (Lai Phun Ni) tuah.

          Myanmar Chin Catholic community in Philippines ram Quezon khuapi ih RVA hmuan sung ah February 20 tlawngkai nikhat ah avei 75 nak Chin National Day (Lai Phun Ni) an tuah. Fr. Joseph Phe Ling Lay in lungawi tawinak Missa cu Puithiam 7 le deacon pakhat thawn haha in a tuah. Himi ah mi 50 luan lai an tel. Missa tuah lai ah Myanmar hrang thla an cam ih a hleice in Myanmar sung buai hleice nak hmun hrang thla an cam.

          Chin mi Deacon Joseph Thang Ha SJ in avei 75 nak Chin National Day (Lai Phun Ni) an tuah nak le Myanmar hrang thlacam nak pawl ruangah a lungawi thu a sim. "Kan bangawk lo nak pawl hngilh in ram khat dinhmun in le Pathian fa dinhmun in kan kom khawm aw ih himi cu Kawlram ih harsat tuar pawl thawn kan lungrualnak kan langternak a si. Himi lungrualnak thawn cangvaih nak thlacam tlang nak, thuanthu pawl hlawm awknak le suncaw ei khawmnak kan nei" tiin deacon in a sim.

          Chin Falam mi Sr.Margarita Sai Tin Thiam, SJA in RVA ih a sim mi cu " Chin National Day (Lai Phun Ni) hmin in kan tong aw khawm asinan himi cu Chin mi pawl hrang lawng asilo. Himi ruangah ka lung awi zet. Himi ih ti duhsan cu ram pakhat ihsin ra in lungrualnak, zangfahnak le bawm awknak asi" tiin a sim.

          Chin mi pawl cu hmun a phunphun ah an um ih a hleice in Chin ramthen, Rakhine ramthen, Sagaing, Bago le Magwe pawl ah an um. Thenkhat cu India ram Mizoram khal ah an um. Myanamr ah miphun 135 an um ahleice in Kachin, Kayah, Kayin, Chin, Burma, Mon, Rakhine le Shan tiin a um.

          Mlocalpassion.com ih an sim nak vekin ahleice  in Chin miphun sungah a thupi bik in 8 an um ih cumi ah Chin miphun group tiin 53 a um. Tourism.gov.mm ih an simnak vekin Chin mi pawl in February 20 cu Chin National Day (Lai Phun Ni) tiin an ti. Chin ramthen ih aiawhtu 500 lai cu 1948 Feb 20 ah Chin National Conference tonawknak an rak nei ih siangpahrang pawl ih uknak daan cu democratic ukawknak tiin thleng dingah an rak rel cat. Cui conference anneih ni February 20 cu Chin National Day (Lai Phun Ni) tiin a rong cang ta. Chin ramthen cozah cu cuihmun ih upa pawl in himi nemhnget nak ah hna an rak tuan thlang ih a sinan himi cu tuisan ah Myamar ram huap ih colh ni tiin nemhnget asilo. Chin National Day (Lai Phun Ni) cu ram a phunphun ih ummi Chin mi pawl le Chin miphun 53 hrangah a thupi zet mi ni pakhat a si. Himi thuthang cu RVA thuthang ihsin kan don mi a si.

https://bit.ly/41pc81l