Pope in Greece ih tlangleng pah awknak ih harsat tuar pawl hrang a riahsiatnak le thlacam sak nak hlan (March 2, 2023)

Pope in Greece ih tlangleng pah awknak ih harsat tuar pawl hrang a riahsiatnak le thlacam sak nak hlan

March 2, 2023

           Pope Francis in tlawngkai nihnih zan ih Greek khuapi Larissa kiang ih tlangleng pah awk nak ih harsat tuar pawl hrang a riahsiatnak le a thlacam sak  nak cu tlawngkai nithum ah telegram in ca a kuat. "Nunnak cemtu pawl ih thlarau Pathian ih zangfahnak ah a hlan ih an duhdawt mi pawl a caan tu innsang pawl hrang a riahsiatnak a hlan thu" ca kuat mi ah a ngan.

           Telegram ihsin ca a kuat mi cu Greek Bishop pawl conference ih President Syros ih Bishop Petros Stefanou hnen ah Cardinal secretary Pietro Parolin ih lethmat thawn kuat mi a si. Harsat tuar pawl le mi run tu pawl hrang thla a cam sak ih "Pathian hnenih ralthatnak le lungrualnak hlan nak a si" tiin a sim.       

           Tlawngkai nihnih zan ah, khualtlawng pawl phur tu tlangleng cu thilri pawl phur tu tlangleng thawn Greece ih thlanglam Tempi tlang karlak ah hmaiton rori in an pah aw. Mawtaw tampi in tlangleng zin an nal ter ih meisa kang nak malte khal a cang. Khualtlawng pawl phur tu tlangleng in mipum 342 le hnatuan tu 10 a phur. Hnatuantu 2 in thil phur tu tlangleng cu an mawng.

           Amalbik mi 36 nunnak an liam 85 luan lai hliamhma an ngah tiin tlawngkai nithum sunlai hrawngah an sim. Mi runtu pawl cu tlawngkai nithum ah tlangleng ih siatral nak ih a um tu harsat tuar pawl an bawm.

           Greece cozah in nithum sung rammi riahsiat nak tiin an than ih an ram aalan pawl cu tlangkai ninga tiang harsat tuar pawl tuar pi nak thawn tar dingah an fial. Tlawng kai nithum ah Greek President Katerina Sakellaropoulou in "himi a thalo zet mi thilcang nak ih anmai duhdawtmi a sung tu pawl hrang ka riah a sia zet. A tu caan ah mi bawm tu hnatuan nak in a tui thilcang ih nunnak cem tu pawl bawmnak an nei ding" tin a sim.

           Himi thuthang cu RVA thuthang ihsin kan don mi a si.

https://bit.ly/3KLacKV