Pope cu April thla sungah Hungary tlawng tum 

Pope cu April thla sungah Hungary tlawng tum 

Pope Francis cu April 28 in 30 tiang Hungary ah tukhaal khualtlawnnak a nei tum tiah Vatican thuthang zung ih Director Matteo Bruni in February 27 ih a simnak ihsi’n theih a si.

Cozah lam le Biaknak lam hruaitu upa pawl ih sawmnak cohlang in Pope Francis in tui tum ah Hungary a tlawn tumnak a si ih Budapest khuapi khal a leng cih ding ti’n kan thei.

Himi Hungary a tlawnnak hi Pope Francis ih tukhaal khualtlawn vei 41nak a si ding.

Budapest khuapi ih ni 3 sung a um lai ah, beunak hawltu (refugee) pawl, mifarah pawl le Blessed Laszlo Batthyany-Strattmann Tlawng ih nauhak pawl tla a tong hai ding ti khal in theih a si.

Hungary ih nat zohthiam (physician) Blessed Laszlo Batthyany-Strattmann in taksa ah-nak (surgery) le mit lam zohfelnak lam hleice takih tuahnak hrangah siizungpi pakhat a rak nei. Mitlasam pawl hnenah sumpai siseh, hnipuan siseh, sii siseh a rak bawm theu. Mina pawl ih taksa thlarau harhdamnak hrang a rak tawlrel sak. Mina pawl ih taksa a ah/rai hlan ah thlacamnak a rak neihpi hmaisa theu. Anih cun operation a tuahsak nan, Pathian in a ti dam; Pathian ih hmanrua men a si ti’n a rak ti theu. Amah cu 2003, March 23 ah Pope John Paul II in Blessed dinhmun ah a rak khaisang.

Hmun dang ih a neih theu vekin, tui tum khalah Pope Francis in cozah lam le biaknak lam ih tuanvo nei pawl, awnmai lam le fimzirnak lam ih pumpe tu pawl khal tel in, mi tinkip thawn tonawknak a nei hrih ding a si.

2021, September 12 ih Slovakia ram a rak tlawn lai khalah Pope Francis cu a vei 52nak International Eucharistic Congress ih netnak Missa sumnak tuah dingin Budapest khuapi ah a rak cawl dah.

Hungary ah mipum 9.5 million an um ih, cumi sungih zatek 37 hi Catholic an si.

Tualsung thuthang ih an sim vek a sile, ral buai a thok ihsi’n minung million khat zik cu Ukraine ram ihsi’n Hungary ram ah an beu ti a si.

Vatican thuthang ih tarmi vek a sile, Hungary a tlawn lai ah Pope Francis ih caanserh hman dingdaan cu a tanglam vekin a si:

POPE FRANCIS IH HUNGARY RAM TUKHAAL KHUATLAWNNAK 28 - 30 APRIL 2023

Friday, 28 April 2023
ROME – BUDAPEST
08:10 Rome/Fiumicino International Airport ihsin Budapest ah zuang ding
10:00 Budapest International Airport ah thleng ding
10:00 Official ih Hmuahnak

11:00 "Sándor" Palace Tualrawnpi ih Hmuahnak
11:30  "Sándor" Palace ah President thawn tonawknak
11:55  Prime Minister thawn tonawknak
12:20  Hlan ih Carmelite Monastery Tlawng ah Cozah hruaitu upa   pawl, mipi pawlkom dangdang pawl thawn tonawknak ah Pope Francis in thucahnak tawite nei ding  
17:00  St. Stephen's Co-Cathedral Biakinnpi ah Bishop pawl, Siangbawi pawl, Deacon pawl le Pathian hnatuantu dangdang pawl thawn tonawknak le Pope ih thusimnak 

Saturday, 29 April 2023
BUDAPEST
08:45 Blessed Laszlo Batthyany-Strattmann Tlawng ih nauhak pawl thawn hlimphir teih tonawknak 

10:15 St. Elizabeth Biakinnpi ah Mifarah pawl le beunak hawltu pawl thawn tonawknak (Pope in thucahnak nei ding)

16:30 "Papp László Budapest Sportaréna" ih ummi mino pawl thawn tonawknak (Pope in thucahnak nei ding) 

18:00 Apostolic Nunciature ih ummi Jesuit sungtel pawl thawn hlimphir teih tonawknak

Sunday, 30 April 2023
BUDAPEST – ROME
09:30 Kossuth Lajos' Square Tualrawnpi ah Missa sumnak (Pope in thuthangtha sim ding)
Regina Caeli
16:00 "Péter Pázmány" timi Catholic University tlawng ih Cazirnak le Nunphung lam tuanvo neitu pawl thawn tonawknak (Pope in thucahnak tawite nei ding)   
17:30 Budapest International Airport ah Thlahnak
18:00 Budapest International Airport ihsin Rome ah zuang ding
19:55 Rome/Fiumicino International Airport ah thleng sal ding

Hi mi thuthang cu RVA thuthang ih kan don mi a si.

https://bit.ly/3ycecfG