Afghanistan le a rammi nunau pawl hrangah thinkhat lungkhat te’n tuantlang dingah zangfah dil

Afghanistan le a rammi nunau pawl hrangah thinkhat lungkhat te’n tuantlang dingah zangfah dil

“Nunau pawl cu cazir hman sian an si lo. Fala note pawl tla hramthok tlawng kai ding an siang lo. A duhsan cu nunau pawl hi an covo hrampi rori hman pek an si lo tinak a si” ti’n Caritas Germany ih International Director tuantu Oliver Muller cun a sim. Himi hi Islamist Taliban cozah in Catholic pawlkom pawl ih mipi hrang bomnak hnatuan tuan thei diangah siannak an pek mi Afghanistan ram pakhat ihsin a tlun zawngah Oliver Muller in a simmi a si.

Tui tum ah Vatican thuthang zung in Afghanistan ih nunau pawl hrang zangfah dilnak an run tuah mi hi, March 8 ah “International Women’s Day” ti’n kum tin teih tuah a si theu mi leitlun ih nunau pawl sunloih ni hngilhlonak hrangih an tuah mi a si.

Vatican thuthang ih pawlkomnak an neih mi Oliver Muller hi leitlun huap ih theih mi miharsa bomnak petu pawlkom ‘Caritas Germany’ ih International Director a si ih tu bai teah Afghanistan ihsin a rak tlung. Taliban cozah khal in Oliver Muller ih hoha mi Catholic pawlkom hi Afghanistan ah hna tuan thei dingin siannak a pek mi a si.

Vatican thuthang thawn pawlkomnak an neih mi ah, Oliver Muller cun, “Afghan nunau pawl cu minung ih covo hrampi hman pek an si lo” ti’n a sim.

“Nunau tel lo in hnatuan a theih lo timi cu pheh theih a si lo. Hitawk kan tlawn san nak khal himi thuhla ziangti’n tawlrel theih a si ding timi theih duh ruangah tla a si,” ti’n Oliver Muller cun Afghanistan ihsin a tlun zawngah a sim.

A simnak vek a sile, leitlun huap zingzoinak an tuah mi ah Afghanistan hi leilung tlun ih ram hmuahhmuah lakah nunau pawl hrangih umnak thalo bik a si. Nunau pawl hi mipi lakah tlanlen sian an si lem lo.

 “Kabul khuapi ahcun thil tul mi lei dingih dawr-awk ding ah lamzin par ih feh rero sian an si. Asinain, Afghanistan ramsung khuapi dang tampi ahcun innsang sungtel ihsin mipa pakhat tal tel lo cun nunau pawl cu inn leng suah hman sian an si lo,” tiah Afghan nunau pawl ih nuntun khawsak har zia thawn pehpar in Oliver Muller cun a sim.

Caritas Germany ih Director pakhat dinhmun in Oliver Muller cun a tanglam vekin zangfah dilnak a nei: “Afghanistan thinkhat lungkhat te’n kan bom cio ding mi hrimhrim a si. Europe kiang naite ah buainak dangdang um ko hman sehla, Afghanistan ih buainak hi ziangih siarlo mi si lo dingin kan tuah theimi hmuahhmuah kan tuah a tul rori ko. Afghanistan cu leilung tlun ih a derdai bik le a farah bik mi ram lakih pakhat a si ve. Curuangah hinah kan um hrih ko ding.”

Caritas Germany hi Afghanistan ah 1984 ihsin a rak um zo. Humanitarian projects tampi hmangin minung million tampi bomnak pe rero tu pawlkom khal a si.

Hi mi thuthang cu Vatican News in kan ngah mi a si.

https://bit.ly/3yrKrHW