Mexico ram ah kum 400 rei zo mi biakinn pakhat tidai sungin a langsuak sal

Mexico ram ah kum 400 rei zo mi biakinn pakhat tidai sungin a langsuak sal

           Mexico ram hmunkip ah ruah sur loin nikhua a car tuk ruangah kum 400 rei zomi Catholic biakinn pakhat cu Chiapas peng ah tidai sungin a langsuak thluh sal. Hi biakinn cu 1966 kum ih a rak cangmi tilian/tilik ruangah hlo zomi San Juan Quechula khua ih rak pil hlo mi a si. Biakinn cu Dominican friars pawl in Dungthluntu James hmin kengin an rak sak mi a si.

        Tubaite ihsin hi biakinn ih tlunlam cu hmuh theih a si ih, khualtlawng sukso tourists pawl in lawng fate pawl thawn a pan theu mi a si. Asinain, tui kum ih nikhau car in kum tampi rei zomi Catholic biakinn cu a

pumhlum ih hmuh theih ah a can. Hi biakinn hi Mexiram sung hmun dangdang ah tidai lole lungto ih khuh hlomi biakinn (a mal bik 7) lakih tel mi a si. Tecpatan ih Municipality zung cun ruah sur lo ruangah a luan cia mi thlah hnih

ihsin biakinn cu hmuh theih a si ih thuneitu pawl in kiangkap thianfai ding le tourists pawl ih zoh theih dingin tawlrel dingah an forh thu June 9 ah theihternak an nei.

         Tuxtla Gutierrez Archdiocese ih pehtlaih-awknak lam tuanvo neitu Gilbert Hernandez cun, “Himi biakinn hi kum tinte’n maltete cu hmuh theih a si theu nan tui kum ih nikhua car ruangah lawng hman tul loin a hmun ih zoh theih ah a cang. Tu tiang hiti ih hmuh theih a sinak in ziangtluk fek zet in an rak sak timi a langter” ti’n a sim.

       Mexico ih nikhua car lam ngaihvennak zung khal in, “2023, June thla thok ihsin Mexcico ram hmun tam sawn ah ruah a mal ih, Chiapas peng ah nasa zet in nikhua carnak a cang thei” ti’n simphuannak an nei. Mexico ih tuanvo neitu upa pawl ih sim vek a sile, tui tum ih nikhua sa mi hi March 19 in October thla tiang cang thei mi a si ih, tu ah minung 500 zikte harsatnak a thlenpi zo.

Source: CNA