Melkite Catholic pawl in Pope ih thu neihnak hnuai ih an um nak kum 300 Jubilee Puai cu 2024 ah tuah ding.

Melkite Catholic pawl in Pope ih thu neihnak hnuai ih an um nak kum 300 Jubilee Puai cu 2024 ah tuah ding.

           Hmai kumah Melkite tidaan a thluntu Greek Catholic Pawlpi cu Rome Catholic lole Pope uknak hnuai ih an umnak kum 300 kim Jubilee puaipi an tuah ding. Kum 300 kim hngilhlonak Jubilee puaipi ih thuthan mi Pawlpi ih Yossef Absi in July thla ni 11 ni ih Media pawl ih thusuhnak a san phah ah theih ter nak a rak nei cih. Aralai ding mi kumah Melkite tidaan a rak hmang dahtu Diocese cu Rome Catholic Pawlpi thawn 1724 laiah pumkhat si dingah an rak kom ruangah a ra lai ding mi kum 2024 kum ah kum 300 a kim ding a si.

            A cui tidaan a hmang tu pawl ih Bishop in Puai tuah dingih a timtuah mi Synod khal tuah lo in um a duh lo ruangah dunglam, a tu caan le hmailam caan ah Pawlpi ih dinhmun thawn a mai Pathian hnatuan nak parah zoh in ruah a duh sal. Aralai ding mi November 11 ah Jubilee kum on nak caanserh cu Seria ram ih khuapi a si mi Damascus ih Our Lady of the Dormition (a it that mi Bawinu) Caderal biakinn pi ah Absi in a hoha dingih thlacamnak thawn on nak a tuah ding.            Biaknak lam ih Pathian biak daan, Biaknak lam theih kohnak, thuathu thawn pehpar mi thu on nak, Khrihtian pawl ih an thuanthu catlang pawl, thurel tlangnak le Biaknak lam thawn pehpar mi zuk pawl hmuhnak, zuksuai thiam pawl in an rak suak mi zuk pawl langter nak tla an nei ding a si.

         Thuthang latu pawl thawn thu an suhawk lai ah Melkite Khrihtian dinhmun in Antioch khua ah an rak thawh thu, Tirhthlah Peter in a rak din thu, an biaknak dinhmun in kum zabi ziangzat hanglo an rak then thek awk thu, Cui a bese zet mi tik cu caan cu kumzabi 17 laiah a si thu, nithlaknak Latin tidaan ih riantuan tu pawl in an din hmun an rak tuamhlawm thu, cuihnuah Antioch Kawhhran pi le Rome Catholic Pawlpi karlakah lungrual ten an komawk sal thu a rak sim. Atu vekih hmunkhat ten komawk sal thei dingah nuam teten tuah a si thu, thleng tul mi pawl nuamteten thleng a si thu, a sinan a hrekkhat pawl ruangah neta ah cun Orthodox Pawlpi hmin in a rak um thu khal a sim.

          Antioch Pawlpi dinhmun in Tirhthlah pawl hnen ih  a ra mi Khrihtian thu zirhnak pawl a zaten an rak thlun thu, relsiatnak, donak pawl zate khal tuar theinak thawn an rak pahtlang thei ih a tu kum 300 kim tiang an rak din thei thu, tuanvo neitu pawl in thiltha zoh thiam in tha zet in an rak din thei ruangah a lungawi thu, Kawhhran pahnih karlak ah upat pehtlaih awknak , suakkhat unau duhdawtnak, tuahtuan tlangnak in pakhat a si mi Thuthangtha kan rian tlang ding. Khrihtian pawl pumkhat ten luanglu pakhat hnuai ah KhrihBawipa an rian thu fiang zet in a rak sim. hi mi thuthang cu Shalom world news in kan don mi a si.