Tui Kum sungah Pope in Indonasia, Singapore le Timor- Leste ah tlawng ding. (January 10, 2024)

Tui Kum sungah Pope in Indonasia, Singapore le Timor- Leste ah tlawng ding. (January 10, 2024)

Pope Francis cu August thlacem lamah Asian ram ram li a si mi Indonasia, Singapore, Timor- Leste le Papua New Guinea ah tlawng dingin tumtah nak a nei.

America ih Jesuit pawl ih thla tin suah mi thuthang pakhat ih tarlangnakah Pope Francis in 2020 lai ih a rak tum mi a si. Asinan Covid -19 suanthei natnak ruangah a tumtah mi a rak can suak lo nak a si tiah sim.

Timor-Leste ram cu Asia ram ah Catholic mipum a tambiknak hmun a si ih an mipum cu 1.4 million an um.

A linglet zawngih kan tile Papua New Guines's ah mipum 10 million ih 26 zatek cu Catholic an si. Pope Francis cu leilung kilkap ih ram fate pahnih hnenih a feh duhnak a rei tuk zo tiah an tarlang.

Khatlam ah Indonasia ram cu leilung tlun ah Mislim a tambik umnak hmun pakhat a si ih Singapore khal in Vatican ah dilnak ca an kuat thu khal an sim.

Thilcang thei cu a silo nan tuikumah Vietnam khal a tlawng thei. Ti duhsan cu Holy see le Vietnam karlakah pehtlaihnak a that vivo ruangah a si.

Vietnam a Cozah ih Holy See zungon theinak a pek zo ih kan dung kumah ramsungah aiawhtu pakhat a rak um dah. Hi mi cu Vietnam ram a buai theh hnu ih a hmaisa bik thiltuah mi a si.

Kan dung kum July thla ah Vietnam President  cu Pope thawn tonawknak an nei ih December thlaah Pope hnen Vietnam ih thlawng dingah zaangfah dilnak ca ka kuat zo tiah a rak sim.

Asian ram pawl hleiah Pope cu tuikum ah Belgium le Argentina ( a maisuahnak ram) tlawng dingah timtuah nak a nei tiah an sim.

French ram President Emmanuel  Macron in Pope cu a hminthang zet mi Notre- Dame Catheral Biakinn pi 2024 December 8 ah ong salnak caanserh tuah dingah Pope cu Parish ih ra dingah kan sawmnan Pope in a mai caanserh pawl zianghman theih ter nak in nei hrih lo tiah a sim.

Pope Francis cu 2013 kum Pope a can thokin Itlay ramlengah vei 44 a tlawng zo ih ram 61 ah a tlawng zo a si. Hi mi thuthang cu RVA thuthang ih kan don mi a si.