Carlo Acutis le blessed 14 pawl cu canonization (mithianghlim dinhmun) ih khaisang dingah lungkimpi nak nei.

Carlo Acutis le blessed 14 pawl cu canonization (mithianghlim dinhmun) ih khaisang dingah lungkimpi nak nei.

Pope Francis cu Cardinal pawl ih zinzoinak hoha tu a si ih a hmaisabik millenial mithianghlim  pakhat a si ding mi blessed Carlo Acutis tel in mi 15 mithianghlim dinhmun ih ngamhnget dingah lungkimnak an rak nei.

Cardinal pawl cu tlawngkai nikhat ni zinglam ah Pope Francis thawn Vatican ih Apostolic Palace ah an tuah theu mi mithianghlim cansuaknak thuhla ah an rak tongaw.

Pope in Rome khuapi a um mi Cardinal pawl hnenah Mid- morning thlacamnak ah blessed dinhmun in a um tu pawl ih thu pawl ruat in an rak rel tlang.

Hi mi ah Fr Manual Ruiz Lopez, OFM le a thluntu pa 7 pawl le Br Abdel Moati, Francis le Raphael Massabki, le Maronite mi menmen pathum pawl an rak tel.

1860 kum, Syrian rambuainak ah Musalem ruahnak luar pawl in Ottoman Syrian ah Christian rampi in thah an rak tuar ih cu mi ah Syrian ramsung buainak ah Christian an huatnak in minung 11 in an nunnak an rak hlan a si.

Peroratio ih tinakah Massabki Brother pawl le Franciscan minung 8 pawl cu Damascus ih um mi Franciscan biakinn sungih thla an cam laifang July 9, 1860 zan ah thah nak an rak tuar a si.

Italian miphun pahnih a si mi Fr Giuseppe Allamano le Sr. Elena Guerra khal mithianghlim ih khaisang dingah lungkimnak an rak nei. Fr Allamano cu kumzabi a thoklam ah Consolata pumpe ih riantuannak rak din tu a si. Sr. Guerra cu nunau pawl ih fimthiamnak lam ah a mai nunram ap aw ih kumzabi 19 a cemnak lam ah Oblates of the Holy Spirit ti mi riantuannak rak dintu a si.

Mithianghlim dinhmun ih khaisan ding  mi Canadian miphun a si mi Sr. Marie- Leonie Paradis ( Virgine-Alodie Paradis ih suak mi) cu kumzabi 20 a thoklam ih the Little Sisters of the Holy Family Congretion rak dintu a si.

Hi mi mithianghlim ih khaisan ding mi 14 pawl ih hmin cu October 20, 2024, zarhpi ni ah mithianghlim hmin cazinah khumlut an si ding.

Pope Francis le Cardinal pawl ih lungkimpinak cu 1981-1996 kum sung a tamsawn in kum thawnghnih  luan hnu ih mi theih tam mi Generation Y ih a hmaisa bik mithianghlim tin lungkim in me peknak an rak tuah a si.

Blessed Carlo Acutis cu a dang mithianghlim pawl thawn 2025 Jubilee ah mithianghlim dinhmun ih khaisan a si ding khal zum a si.

1991 kum ah Englans ram ah Italian miphun a si mi nulepa hnen in a rak suak mi Blesses Carlo Acutis cu Italy ram Monza ah kum 15 a si ah thi cancer natnak thawn nunnak a rak cem tu website designer pakhat a si.

Eucharistic (Bawipai thi le sa le Bawinu Maria) mangbangza langnak parih a upat sunloihnak cu a mai website ih a khumnak ruangah mitheih tam mi a si.

Peroratio ih simnakah Blessed Carlo cu farharsa pawl a zaangfah ih inn le lo neilotu pawl, in le ei ding neilo tu pawl le mivai pawl kha zarhtin a mai hmukleinak sungin a khawl mi paisa thawn a rak bawm theu a si. Hi thuthang cu Vatican thuthang in a tawi zawngin kan ngan mi a si. Kan thuthang a rak ngaitu le a siartu zaten parah lungawinak tampi kan nei.