Cardinal Oswald Gracias in covid-19 ruangih mithi pawl meisa thawn ur in ruakvui dingah a fial

India ram Bombay/Mumbai Archdiocese ah Covid-19 nathrik ruangih a thi mi pawl ih ruak meisa thawn ur dingah forhfialnak tuah a si.

               Mumbai municipal ih thusuah mi thawn kaih in Mumbai/Bombay Archdiocese hotu Cardinal Oswald Gracias in Siangbawi le Catholic zumtu mipi pawl hnenah covid-19 nathrik ruangih a thi mi pawl ih ruak vui tikah phum men loin, meisa thawn ur dingah a forhfial. Cun, phum tengteng a duh tu pawl an um khal le, cozah ih khiah sak mi hmun lawngah phum dingin a fial.

               Cun, cozah upa pawl ih thusuah mi pawl tha teih thlun cio ding khal in Cardinal in a mipi pawl a forh ih mithi vui tik khal ah minung 5 hnak ih tam tel lo dingah thu a suah.

               April 6 tiangah India ram ah covid-19 nathrik nei tu minung 4314 an si ih himi natnak ruangah minung 118 an thi zo. Curuangah, Thitumnak puai le mi burpi thawn tuah mi puai dangdang pawl khal tuah lo dingah Cardinal in a mipi pawl a kham hai. Culawng siloin, mangbang vansang in a um mi ramdang ihsin hna a rak tuan tu pawl siseh, umhar zet ih khua a satu pitar/putar pawl khal siseh, mah ti thei tawk ih bawm cio dingah Cardinal in Christian zumtu pawl hnen ah thu a cah.

               Meisa thawn ur ih mithi vuinak hi Catholic Pawlpi in a on mi a si ko. Singapore ram le thlanmual hmun remcang lonak hmun dangdang ahcun zumtu pawl an thih tikah meisa thawn ur ih vui a si phah theu. Asinain, Catholic zumnak thawn a kalh aw mi ruahnak ruangah meisa thawn ur ih mithi vuinak tuah cu Pawlpi in ziang tik hman ah a on dah kel lo a si. Tuini tiang khalah a remcang lo tuk hrat a si lo ah cun, a phum ih ruakvuinak tuah hi Pawlpi ih tha a pek sawn mi a si.

               Sihmansehla, thlanmual hmun remcang lonak ruangah siseh, tui tum covid-19 ruang ih buainak a um tik caan ah cun, meisa thawn ur tahrat ih mithi ruak vui ding hi Pawlpi in a on mi a si. Curuangah tui tum ah WHO (World Health Organization) ih thusuah mi pawl thawn kaih in covid-19 nathrik ruangih a thi mi pawl meisa thawn ur ih vui dingah Mumbai/Bombay Archdiocese in thu a suah nak a si.