Ka sim cawk lo, A sunlawi nak (20.5.2020)

May 20, 20// Tirh 17:15,22-18:1/Saam 148/Jn 16:12-15

Pathian ih miphun thiang, zumtu u le nau pawl, Bawipaih pekmi damcahnak, hnangamnak le lungawinak thluasuah phunkim nanpar ah thlenghramseh tiin thlaza ka cam. Hna ttuan lo le lengvak loih kan kharhkhum awk hi kan khop cuahco thlang ding ka zum. Bawi upa vek ih to huahhi men hi a nuamzet ding hmang kan rak ti ttheu nain, ni le thla a rei deuh cun umlak huahhi men khal hi a nuam cuang lo, nin a um nguahngo thlang kan ti cio ko ding. Theihdah lo mi theih le hmuhdah lo mi hmuh hi thilthar a si ih, ton dah lo mi kan ton khal hi a tha zawngin cohlan le pom thei zuam usi. Pathian ih nitin in pekmi, nunnak thar le thluasuah phunkim siarin lungawi usi, hnangam u si. Kan boruak a tthat thei hrih lo ruangah khual lam hla kan tlawngngah lo, innlak khal ah kaupi kan lengvak thei lo. Asinan, kan ruangpum ih lamhla le kaupi kan suahvah thei lo can hi tikcu cantha zet ah hmang thiamin thlarau lam le zumnak lam ah hlazet le kaupi in khual tlawng usi, lengvak usi tiah ka lo sawn hai. 

Tuisun May thla 20, tlawngkai nithum sun ih kan siar ding mi Bible bungcang pawl cu: Tirh 17: 15,22-18:1/Saam 148/ le Jn 16:12-15 an si ih, Saamhla hmangin “Ka sim cawk lo, A sunlawinak” tiin thulu ka hril. Sim cawk lo Bawipaih sunlawinak hi tuisun siarmi sungin phunthum in kan hlawm aw tlang pei uh. 

1/nak; Saam,148 hi vei4 vei5 ka siarnolh rero ih, ka khop thei lo. Siar ah kaa a thaw, ngai ah a nuam, ruah rero ah lung a hmui tuk, a thlum tuk. A tawinak in a seuh ten ka lo seu ding, rak tep ve hnik. Vancung mi pawl, ni le thlapi, le arsi pawl, Bawipa thangthat uh. Nimthlakau, rial, vuur, khuadur le tlitu pawl Bawipa thangthat uh. Tlang pawl, thingkung pawl, ttilva, vate le ramsa pawl, Bawipa thangthat uh. Siangpahrang pawl, uktu pawl, fala thlangval, nutar patar pawl le nauhak pawl Bawipa cu thangthat uh. A sunlawinak cu lei le van ah a thang, mi hmuahhmuah in Bawipa thangthat uh. Saam hla ngantu in leipar ummi pawl le van ih ummi pawl fonkhawm in Pathian thangthat ding in sawm. 

Ziangtinkim hi ngankim le telhcih thluh a duh zet nain, ngancawk thiam ding a silo ruangah ‘an za ten’ tile ‘mi hmuahmuah’ tiin a hmang. Sersiam mi zate le mi hmuahhmuah ti mi ah nang le kei kan tel ih, a thupi bik le hmaitthi rori ah kan tel. Bawipa a hmin sunglawi sin hram seh. Amen. Zumtu pakhat ih thil tumbik le thupibik kan tuah thei patawp cu Bawipa thangthat hi a si. Thluasuah tampi co tu in tampi thangthat ding, malte co tu in malte thangthat ding tivek mai a si lo. Saam ca ngantu cun a maih pumpak ih a co mi thluasuah ruangah Bawipa thangthat dingin  in sawm loih, lei le van ih thlemlo, a liam ih liam Pathian sunlawinak hmuhngah ruangih Bawipa thangthat ding in sawn a si. Kan ruang pumpi sung, kan taksa par le kan kiang kap minung le  ziangtinkim ah Bawipaih sunlawinak siarcawk lole simcawk loin a khat. Cumi hmu ngah thei ding in, Thiang Thlarau in vanlam mitvarnak le lungfimnak in pe sin hram seh. Amen.

    2/nak; Tirhtlah 17, sungih kan siar mi ah, Athens khuasung mi pawl ih zumnak an co thu kan hmu. Paul in, “ Nannih Athens mi pawl hi biaknak lam pohpoh ah cun nan taima zet ti ka hmu” a rak ti. Athens pawl cun pathian tampi an rak nei. An khawpi kil khawitu pathian, lamzin kilkawi tu pathian ti pawl an rak nei. Nikhua kiltu pathian le ciciin tirawl petu pathian tivekin pathian dangdang tampi an nei ding ti khal a fiang. Ziangah tile Judah mi pawl lawng in lei le van sersiam tu Pathian pakhat an zum ih, miphundang pawl cu pathian tampi pomtu pawl an rak si. Tirh 17:16 ah, Paul nih, Athens khawpi cu milem zuk in a khat ti kha a hmu ih a thin a nau ngaingai, tiin kan siar. Milem biaknak le pathian tampi neihnak ih hngetkhoh zet tu Athens mipi pawl, a nung Pathian pakhat thu zirh ding cu thil awlsam cu si lo riai. Paul cu um men loin, inn lak le biaknak an tuahnak hmunlam lengvak phah in, a thlingthlak tik ah “Kan theih lo mi pathian hnenah” ti ih ca an nganmi, thawinak biakttheng a hmu. Pathian tampi an biak ko nain kan hrelhmi pathian a um pangding ti, an phangih, theihlo mi pathian hrang tiah biakttheng, pakhat an ret. Cuih biakttheng cu Paul in thupi zet ah hmangin thu a zirh thok asi. ‘Kan theih lo mi pathian hnenah’ tiih biaktheng nan tuah mi cu, lei le van sersiam tu, mi hmuahhmuah hrang nunnak le thaw petu Pathian asi tiin a zirh thok . Zumtu krifa ih cangtu an um ih, hrek khat cun, insimbet aw, in zirh hrih aw tiih an dil tu pawl khal an um. Theihfiang le ngaibet an duh. Pathian tampi an thei, an nei nain, an hrelh pangmi pathian cu a thupi bik le a nung Pathian taktak a rak si ziar. Thei aw lo baangin, Pathian nung thangthat tu an rak siih, Pathian sunlawinak siarcawk lo hmusuak tu, co ngah tu zumtu krifa ah an cang. Paul ih thin thanau nak cu lungawinak tumpi ah a thleng awaw. Athens mi pawl khal in sim cawk lo, Pathian sunlawinak an hmu ngah a si.  A thupi tuk. Saam ngan tu nih ni le thlapi le tlang le ramsa phunkim, mihmuahhmuah tiin a rak ngan cafang kar lak tete ah nang le kei kan tel ih, Athens pawl khal an tel ve. Sunlawinak cu Bawipa in co seh. Amen.  

3/ nak; John 16, ah Jesuh in, “Nan hnenah simding tampi ka nei, asinain atu ahcun nan ciing thei cawk lo ding, Thlarau a run tik ah thutak hmuahhmuah ah a lo hruai ding” in ti. Jesuh Krih in thu sim ding tampi in nei. Ziangruangah so a tam tuk? Tampei cu, lei le van ih tlemlo Pathian sunlawinak thu a sisi. Minung in kan ciingkeng cawk lo. Ziang ruangah? Lei le van ih khathluh Bawipa sunlawinak a si ual. Siar cawklo, simcawk lo in a tam. Kan thinlung, kan ruahnak, kan thlarau le kan minung sinak in a tlin ban lo. Simcawk lole ciinken cawklo Pathian sunlawinak a si. 

Saam hla ngan tuthawn thinkhat lungkhat in, mihmuahhmuah le sersiam mi ziangkim pawl hi Pathian sunlawinak thangthat ding ah, pakhat hnu pakhat sawm ciamco hnik sehla, kan sawmkim thei pei maw? hmin hmuahhmuah teh kan ngancawk kem? Kan ciing cawk lo, kan ngan cawk lo. Ziangruangah? Lei le van ih khat thawmsunlawi nak a si ual. Samphang paziat ka nei ti le, thisen forziat ka nei ti hman thei awlo fang men ho khaw kan si. San kan tlai lo, kan tawntai tuk tinak lamlam a si lo. Kan sunglawi tuk tinak a si sawn.  Nikhatah veiziat kan thaw kan thaw ti le, veiziat kan mit kan tthep ti hman kan thei aw lo. Pathian in sunglawi tuk le man nei tukin in sersiam. Amai co tlak mi thangthat nak ttongfang hi pol rero khalah hmuh a har ee. Sihmansehla Bawipa cun, ahmin ih Amen veikhat kan sal khal hi lunghmui zetin, in cohlangih, A hmai ih, khukbil le kut zakom ih lukun te khal hi a mah thangthat sunlawihnak ah man nei zet in, hmual nei zet in in co hlansak. Sim cawk lo, A sunlawinak cu kan pumpak nun le kan kiangkapah a khat. Lei le van ah a khat. Pa le Fapa le Thiang Thlarau hnenah sunlawinak um hramseh, a hramthok ih a um vek in, tu le kum khua in um camcin hram seh. Amen.