Jesuh ih Nu Maria thawn thlacam dingah um khawm tlang uh si.May 30, 2020

Jesuh ih Nu Maria thawn thlacam dingah um khawm tlang uh si.

May 30, 2020

             Pope Francis in line ih a zoh tu mino thawng zaleng lo pawl thawn thurelkhawm nak an tuah ih COVID-19  karhzai nak zamrang te ih hloral dingah Bawinu ih thlacam sak nak an dil. Pope Francis in Pathian biak tu 130 hrawng thawn Vatican hmuan sungih an sak mi Lourdes Bawinui lungkua hmai ah thla an rak cam. Thla an cam lai ah leilung pumpuluk ih Bawinui sin tuh le a zuk pawl TV ah a lang. Rosary cam nak ih tumtah nak cu tu ni cu zarhpi ni a si ruangah Rosary thuthuk cu mangbangza thuthuk an ruat. A pakhat nak mangbangza thuthuk cu sibawi pawkhat le nurse pakhat in an cam ih cu mi cu COVID-19 suan awk nak a tuar rero tu pawl kilkhawi tu leilungtlun ih harhdam nak ih a  tuan tu pawl ai ah a si.

             Rosary ih tumtahnak cu leilung pumpuluk ih sibawi pawl, nurse pawl le si vai zir nak lam ih  mifim le mithiam pawl zate hrangah ap phah in thla an cam. A pahnih nak mangbangza thuthuk cu COVID-19 a tuar ih a dam sal tu pakhat in hi pulh nat ruangih a thi tu sungkua pakhat ih hoha nak in nat tuar tu, a dam deuh tu le pulh nat ruangih a thi tu pawl zaten ai a awh. Rosary ih tumtah nak cu ralkap pawl, humhim nak pawl le ဂရုဏာ pawl zate hrang khal ah thla an rak cam sak.

              A pathum nak mangbangza thuthuk cu sizung pawl ih mina pawl ih thlarau lam, thinlung lam thawn peh par ih silh khah mi sizung ih a tuan tu Puithiam pakhat le nurse ih a tuan tu Sr. pakhat in thlacam an hruai ih nat a tuar rero tu pawl, a kiang te ih a kilkhawi tu Puithiam pawl, Sr. pawl le kawhhran sungtel zaten ai a awh. Rosary ih tumtah nak cu nat nak a tuar rero tu mina pawl, an dam nak hrangih a zoh tu pawl ih thlarau lam ih Puithiam pawl, Sr. pawl le Pathian ih tongkam thawn tha pe in thlacam sak tu kawhhran sungtel zate hrangah a si. Ziangah tile hi vek ih tuan nak ruangah nat suan an tuar ih an nunnak tiangin a liam tu khal an um.

             A pali nak thuthuk ah cun sivai a suah tu mifim pakhat le media ih tuantu pakhat in thlacam an hruai ih pulh nat thawn pehpar in theih thiam nak in mi tampi nat nak ih humhim ding daan hmuh suak nak dingah le a hnget ih a hman mi thuthang in minung pawl hrial dingih tumtah mi a si. Hi thuthuk ih tumtah nak cu thi zik te ih a um tu pawl, mah te lawng kil tu nei lo ih thih nak a hngak tu pawl, a thi zo tu pawl ih thlarau hrangah le a thi zo tu innsungsang pawl hrangah an ap.

            Netabik pahra cu Italy ih um mai innsungsang tha neih tawk ih pawlkom hnatuan a tuan tu innsungsang pawl ai ah  innsang pakhat in thlacam a hruai ih hi pulh nat a reh nak ding hrangih a tuan rero tu  pawlkom pawl, farah harsa pawl bawm tu pawlkom zate ai awh in an cam.

            A voihnih nak Rosary panga cu innsang nei zo ih fa te nei zo tu nupa te in thlacam an hruai. Cu mi pawl hruai ter nak in hngahhlap nak pawl um nak ding le thih nak an neh thu lang ter nak ah a si. A tumtah  nak cu zum nak, hngahhlap nak lam ih tha nei lo tu pawl, hnatuan nei lo tu pawl, hawipi sungkhat nei lo ih mah te lawng a um tu pawl le a suak pek mi naute pawl zate hrangah a si. A dang theih fiang nak ih an lang ter duh mi pawl cu Rosary cam nak ih a thok le a cem nak lam ah May thla sung hmuahhmuah Rosary cam dingah Pope Francis a mah rori in a sim mi thlacam nak pahnih sungah pakhat cu a thok nak lam ah an cam ih a dang pakhat cu a netabik ah an cam. Cui hnu ah Pope Francis in thluasuah a pek ih thu sim nak caan tawi te a nei. Cui a thusim nak ah Guadalupe Bawinu le a dang Latin America ih um Biakinn pawl ih live an thlah nak ah Rosary cam nak ih a tel tu kawhhran pi pawl in an lungawi nak thu le an mai tong in theih ter awk nak an neih thu, an kiang ih a um ruangah a lungawi thu le Guadalupe Bawinu cu kan kiangah um hram seh.

           Hi programme ih live ih an rak thlah mi Bawinu ih Biakinn pawl le hi programme cu Bawinu ih Biakinn 50 pawl ah an rak thlah. Cu pawl cu Mexicoram ih Guadalupe Bawinu, Potugue ih Fatima Bawinu, France ih Lourdes Bawinu, England ih Walsingham, Italy ram ih um ပံုေပ Bawinu, Pathian ih duhdawt nak le Pietrelcina Biakinn, Argentina ram ih um Lujan, Ireland ram ih um Knock Bawinu, Brazil ram ih um Aparecida Bawinu, Italy ram, Assisi khuapi ih Vancungmi pawl ih Bawinu Maria, Canada ram ih Notre Dame le Isarel ram ih Vancungmi in lang nak a hmuh nak Biakinnpi pawl ah an rak thlah a si.

https://bit.ly/2ZZrxYV