Lungawi thiam nak cu vancung ramih hminsin nak June 28, 2020

Lungawi thiam nak cu vancung ramih hminsin nak

June 28, 2020

            June (28) ni zarhpi ni, Angelus thlacam nak tuah hlan ah Pope Francis in, lungawi thiam nak cu vancung ram ih hminsin nak a si thu le  kanmah in Jesuh Khrih thinglamta cu a keneh thawn bangaw in lungawi thiam nak thinlung thawn siang zet in kekar tlang dingah asi tiah a sim.

            Sup nak le harsat nak hniksak nak karlak ah a dung thlun dingah JesuhKhrih ih kawhnak aw cu Pope in ruat in a sim. Mt 10:37-42 ah Jesuh Khrih in a dungthlun tu ding pawl hrangah fiang zet in a sim thu cu a tanglam ah ca tlang panga then in Pope in a sim.

1.Jesuh Khrih duhdawt nak cu innsungsang hi duhdawtnak lam a khih hmuh.

            A dung a thlun tu pawl Jesuh Khrih in a hmaisabik a dil mi cu innsang duhdawt hnak in a mah duh ding a si tiin a sim ih, Pope in a sim bet mi cu, fa le pawl Jesuh Khrih in inn sang si nak a niam ter ti asilo. A hman in cun inn sang hmun khat ih duhdawt awk nak ih thil ti thei nak a theih ruangah, himi hi no.1 ih ret ding asile a thupi mi a hman mi that nak pawl ihsin hlon a si ding ruangah a si. Kanmah pakhat ciar rori khalin kan tong. Inn sang duhdawt nak kaihngettu a sang tikah Gospel thuthangtah lamzin thawn a kaih lo mi lam hril dingah thuhla a um theu. Taktak ahcun nu le pa, fa le pawl parih neih mi duhdawt nak cu Jesuh Khrih hnen ih kan ret mi duhdawt nak thawn a thianghlim ih thazang a cang ter. Cumi ihsin a rah suah mi cu innsang hrangah siseh, innsang hnak in a sang mi hrang khalah siseh, tamdeuh in san a nei ter ding. Jesuh Khrih cu a hman mi duhdawt nak thawn duh ding a si ko. Asinan innsang thuhla kha a hmaisabik ih ret asi ahcun Jesuh Khrih dungthlun nakah lam zin sual zawh ngah pang a theih.

2.Kanmah pakhat cio ih Jesuh thinglamtah phur nak

            Jesuh Khrih in cui ni ih Bible ca sung ih a sim mi mai thinglamtah cio phur in ka dung in thlun uh timi thuparah  Pope in ruat phah in a sim. Fa le pawl Bawi Jesuh a mah rori in a ol mi lam a zawh dah lo. Bawi Jesuh a tel lo ahcun a hman mi duhdawt nak a um thei lo. Ziang asi khal le kan theih ding mi ah thinglamtah cu ziangtik khalah kanmah lawng in kan phur lo ti mi asi. Harsat nak karlakah ralthat nak in pe dingah Jesuh Khrih cu kan kiang ah um in, in bawm a si.

3.Mah le mah sup-awknak in famkim nak hmuh a theih

            Jesuh Khrih in a mah hrangih nunnak a sung tu cu a nunnak a hum ngah ding tiin Bible ah a sim. Fa le pawl Bawi Jesuh Khrih hmurka in a suak mi tong pawl cu a hman ngaingai timi cu thuanthu ah tahthim nak phunphun in in hmuh zo. Tuini tui caanah midang va bawm dingah Jesuh Khrih thinglamtah a phur tu tam pi an um ti ih pulhnat caanah anmah pawl cu anmah le mah sup aw in mitampi hrangah an pe aw. Jesuh Khrih thawn a si ahcun ziangtinkim kan tuah thei. A famkim mi nunank thawn lungawi nak timi cu Gospel thuthangtha hrangah le mitampi hrangah felfai nak, mithmai pan ten mi hmuak thei nak le that nak pawl in, mah le mah sup aw in pek awk nak a si.

4.Lungawi thiam nak le sian nak

            Midang bawm dingah mah le mah pek awk nak cu tahthimnakah tidai thiang khuat khat pek mi khal Pathian ih terh sian nak le thluasuah zem nak tiin sim phah in, a tu naiteah  Siangbawi pakhat hnen ihsin a theih mi sian nak thu a sim. Nauhak te pakhatin Siangbawi hnen ra in, Siangbawipa himi te cu ka khawl mi paisa a si. Himi pulhnat caanah harsat a tuar tu pawl bawm a tul mi pawl hrangah in hmang sak aw. A tam lo, mal te vial asi tiin, a timi cu cumi a sang tu Siangbawi ih sim nak in ka thei. Ka fale pawl, hi naute ih paisa cu a mal men thei, asinan a ngaingai ahcun a tampi, ziangahtile duhdawt nak bet ih pek mi a sisi.

            Kan tul sam mi pawl duhsak nak thawn in pe tu pawl hnen lungawi thiam nak thluasuah pe tu ih zangfah nak pawl kan bawm rero a si. Lungawi nak timi cu a tha mi tuahnak pakhat asivekin, Khristian mi pakhat ih a neih ding mi khal a si. Himi hi a menmen asinan Pathian ih vancung ram a hman mi hminsin nak a si. Duhdawt nak thawn theih mi lungawi thiam nak tiin a sim. Neitabik nakah Pope in,

5.Kan nu Maria ih nundaan kan cawng pei, timi thutlang thawn a net nakah thla a cam

            Pathian ih tongkam pawl thei in kanmah pakhat ciar ih um tlan daan le kan hril mi pawl zoh sal in, duh nak thinlung thawn Pathian hmaika ah kanmah le mah ap aw thei ringring dingah le Jesuh Khrih ih keneh thlun thei dingah Bawinu in lo bawm hram seh tiin thlacam phah in Angelus thla cam nak thawn an can cu a cem ter a si. Hi mi thuthang hi Vatican news in kan ngah mi a si.

https://bit.ly/3g3YNDk