Turkey ram, Istanbul khuapiih Hagia Sophia Museum cu Muslim pawl Pathian biaknak Mosque innpi ah can a si

Turkey ram uktu President Recep Tayyip Erdogan in Istanbul khuapi ih Hagia Sophia tiih kawhmi museum cu Muslim pawl ih Pathian biaknak mosque innpi pakhat ah can sal dingin nemhngetnak hmin tacik a khen zo. Hagia Sophia Museum hi a hlan ahcun Holy Wisdom timi hmin neimi Cathedral Biakinn pi pakhat a rak si dah (Basilica Biakinn pi khal a rak si).

Turkey President ih casuah mi cu July 10 ni ah hmin tacik khal khen a si ih cui casuah mi cun Hagia Sophia innpi hi Muslim pawl ih Pathian biaknak mosque innpi dinhmun ihsin museum dinhmun ah a rak cang ter tu kum 80 rori a kim zomi Turkey acozah ih casuah mi cu a dik lo mi dinhmun ah a cang ter mai.

Hagia Sophia innpi hi Muslim pawl ih Turkish tong ih an kawh dan ahcun Ayasogya mosque an ti ih tu ahcun acozah ih biaknaklam thawn pehpar ih a kaihhruainak tang ah a um thlang.

Tui tum ih casuah mi hi President Erdogan ih kum reipi Hagia Sophia innpi cu museum ihsin mosque innpi cang ter sal dingih a rak zuam rero nak ih rahsuah pakhat a si.

Himi Turkey cozah thuthen zungpi ih thu botcatmi parah leitlun hmun kip ih mipi cun an mawhthluk nasa, ziangahtile kum reipi mi zapi hrang a rak si zo mi innpi cu tuah muslim pawl hrang lawng ah a cang sal ding a si.

Greek nunphun lam tuanvo neitu Lina Mendoni cun Turykey acozah ih thurelcat mi par ah mawhthluknak ca nasa zet in a ngan ih “Hi thuthen zung ih thil tuah mi in Turkey ram ah independent justice timi a um lo zia a lang ter ih President Erdogan ih miphun tannak thinlung in Turkey ram cu a luan ciami kum 600 ah a hruai kir sal a si” tiah a ti.

Nisuahnak lam ih Orthodox Kawhhran sung ihsin Biaknak khat le khat pawlkomawknak lam ih tuanvo neitu, Constantinople khuapi ih um mi Patriach Bartholomew khal in “Hi innpi hi museum ih hman a rak si lai ahcun, tonawknak, thu ruahawknak, lungrualnak le Christian pawl le Muslim pawl kar lakih khat le khat theihthiam awknak lang ter tu hminsinnak pakhat a rak si” a ti. Cule, June 30 ni ih a thusim mi khal ah, “UNESCO World Heritage ih telmi Hagia Sophia hi a tu ih a neitu pawl ih ta lawng a si lo; mi hmuahhmuah ta a si” a rak ti dah zo.

Hagia Sophia innpi hi AD 537 kum ah Siangpahrang Justinian san ih rak sak mi a si. Culai ahcun, leitlun ih innpi tumbik le Christian Biakinn lakih tumbik khal a rak si dah. Catholic le Eastern Orthodox tiih Christian zumtu pawl an then awk hlan in siseh, an then awk hnu khal ah siseh, Hagia Sophia hi Constantinople khuapi ih Cathedral Biakinn pi a rak si theu.

Ottoman in 1453 kum ih Constantinople a rak doneh hnu in, Hagia Sophia innpi hi Cathedral Biakinn pi ihsin mosque innpi ah a rak can. Ottoman san lai ah innsakthiam architects pawl in an rem bet ih Christian sinak lang ter tu thil pawl an rak khuh hlo thluh.

1934 kum ah Santhar Turkey a rak dintu President Mustafa Kemal Ataturk in Hagia Sophia innpi cu mosque ihsin museum ah a rak can. Cutiih museum ih can a si hnu ah mosaic timi lungphen thawn zawng phunphun ih suaimi Christian sinak langter tu zuk pawl khal an lang ter sal. Cutik ah Jesuh Khrih, Falahim Mary, John the Baptist, Justinian I, le Byzantine Siangpahrang bawinu Zoe Porphyrogenita te ih zuk pawl khal an lang sal thluh a si.

Tui tum ih museum ihsin mosque ih can sal a si tikah Hagia Sophia innpi sung ih mosaic zuk pawl hi Muslim pawl in lang nawn lo dingin an khuh sal ding ti’n mipi cun an phang nasa a si.

Hagia Sophia innpi hi Turkey ram sung ihsin hminthang bik le mileng tam bik nak hmun a si ih kum khat ah minung ting 37 hnak ih tam sawn in an leng theu a si.

Source: CNA (Catholic News Agency)