Nile tiva thuthawn pehpar aw in Pope in zaangfah dil. (August 15, 2020)

Nile tiva thuthawn pehpar aw in Pope in zaangfah dil.

August 15, 2020

Pope cu kan dungzarhte ni Angelus thlacam nak le Missa sumnak a theh hnuah Nile tiva thawn pehpar in Egypt, Ethiopia le Sudan karlakih thu buai parah a rak ngaihsak thu, cui elawknak dinhmun thawn pepar in bauinak a cang mi ram pawl thawn tongawin a sizia hawl thei lawngah nunnak ih hrampi cu tiva pi din hmunin a um ringring ding thu, thenawknak hnakin lungrual dingah, ralawknak hnakin rualpi ih kaih awknak, buainak hnakin remdaihnak dinsuak dingah, cui tonawkih thu rel tlang nak cu elawknak cang mi ram pawl ih hrilnak a si hram seh, cu ti lawngah mai ram  mipi pawl hrang khalah siseh, leilung hrang khalah siseh, that hnemnak tampi a um ding tiah forhfialnak a rak nei.

 Buainak a cannak cu Kandung April thla 2011 kumah Ethiopia ram in tikhawl nak ti inn Nile tiva kiangah a rak sak.Cui ti khawlnak inn cu Ethiopia ram in an rak sak nan Sodan ram ri thawn a rak nai tuk. Cui tumtahnak cu America Dolla 4.5 billion cem ih sak mi a si. Hi mi cu Afarica ramih a tum bik mi electric suahnak a si. Curuangah ti inn an sak mi le ziangtlukin a khoh ti mi parah an thin phang. Nile tiva sungah ti dai fehdaan a mal ding tiah phannak an nei. Tiva sungih tidai um daan a mal le Nile tiva ring ih a nung tu ram pawl Egypt, Sudan le Ethiopia ram din hmun a tha lo thei. Nile ti va pawl cu Sudan ramih Nile tiva rang thawn an peh aw ih Nile tiva pi in zatek 85 hrawng a bom mi tiva khal a si. Ethiopia hrang khalah ram sungih a tul mi Electric khal man ol ten a zem thei ding din hmun asi nan thilcinnakih a tul mi le kum tin ten vunnel le dawm a kuat theinak a mal ter ding din hmun a si. Hi mi ti inn pi saknak ih a cang thei mi thil pawl cu harnak a thei ding mi ram pawl in hi a thu pi mi thawn pehpar aw in veitam pi thu an rel tlang. A veihnihnak cu July thla 27 niah African Union in an rak tuah. Cui thurel tlang nakah zoh tu dingah United States, European Union le African Union Commission pawl an rak tel. August thla 10 niah cui thurel tlangnak cu zarhkhat sung an cawl ding ti mi cu Egypt ramih tidai lamthawn pehpar mi tuanvo nei tu in a than. Hi mi an cawlnak cu Sudan ram ih dilnak kha ruat sal nak caan pek nak a si. Hi an colh sungah hin ram ram thum ih ti lam thawn a pehpar mi tuanvo nei pawl thu rel tlangih neta an tuah ding mi thu rel nak ding hrangah a tul mi thu le ti daan tete pawl hawl dingah an cawl nak a si.

https://bit.ly/2Y9mmEf