Online par ihsin Missa raithawi nak cu mah rori tel nak ai a awh a theih lo September 12,2020

Online par ihsin Missa raithawi nak cu mah rori tel nak ai a awh a theih lo

September 12,2020

            Ram tampi ah tam le mal in Missa raithawi nakah an tel zo a si. Asinan a hlan vek dinhmun ah thleng sal dingah a thu pi tuk. Ziangruangahtile Catholic Khristian sinakin Missa raithawi nakah a thupi mi caanah  line par ihsin olten an tel nan mah rori tel dignah a thupit thu, line par ihsin Missa raithawinak ih tel nak cu dinhmun parah bun aw in on a sinan mah rori tel nak thawn aiawh a ngah lo thu Nu Pawlpi ih biak khawm nak thawn pehpar mi daan ih tuanvo nei tu Cardinal Robert Sarah in "Bawi Jesuh thi le sa Saramentu hnenah lungawi ten feh tlang cio uh" tiin thulu pek mi ca pakhat cu ram phunphun ih Catholic Bishop pawl pawlkom hnen kuat a si. Himi thuthan mi cu Pope ih nemhngekin September 3 ah suah a si.

            Khristian nunnak cu pehtlai awk nak a um tul,

            Ruahban lomi suanawk nak nat sia ruangah hivek dinhmun hi a thleng. Himi dinhmun cu inn sangsung, nunphung lawngah siloin kawhhran piih biakkhawm nak caan serh ah khal minung pumkhawm ih tuah nak khal bal a si. Nu Pawlpi ih biak khawm nakah biaknak lam daan cu tuah men lawng a si lo. Pathian ih sinak a lang ter timi duhsan a nei. Pathian pakhat ah bawi pathum a um. Cuvekthotho in Pathian cu mipa, nunau pawl thawn nel aw in duhdawt nak a nei. Cutivekin minung pawl khal a mah thawn nel aw dingah in sawm.

            Khristian pawl cu kawhhran ah zum fek tu pawl an um tikah thlacam nak "Pathian ih inn le kawhhran ih inn" cu zalen zetin kan din. Ziangruangahtile cui hmunah hmun khat ten um khawm nakin Pathian ih innsang sungtel tiin ruah nak a um. Curuangah Pathian ih inn ah Pathian ih fa tiin um ding ah a tul tiin ca sungah bet in a sim fiang. Ram uk tu cozah thawn khal hnatuan tlang uh. Khristian pawlkom sinakin a dangten um dingah, zo thawn hman peh tlai awknak tuah loin sangka khar in um daan kha hmang lo ding. Pawlkom ih man cu thangso dingah tuah ding a si. Pawlkom ih that nak hrangah tuah tuan ding a si.

            Khristian pawl  cu pawlkom pawl karlak ah um ding.

            A tu vekih pulhnat tuar caan ah khal minung pawlkom hlat ding asilo. Hmun le ram thu nei tu pawl, mi thiam pawl ih lam hmuh mi pawl thlun in, tuah tlang ding. Diocese Bishop pawl din hmun in a tak ih tuah dingah a har ih, that nak a mal mi thu pot cat ngah pang hlah uh. Ahleicein kawhhran mipi pawl Missa raithawi ank thawn hla dingin caan reipi kham nak a si. Tiduhsan cu dinhmun cang thei tawk in tuah in Missa raithawinak thawn rei zet hlat aw lo ding ah khal ruah sak ding a si.

            Covid a can hlan tikcucaan ngah sal ding a thupi

            Caan tha kan ngah caan le covid pulhnat a can hlan ih Khristian pawlih thlarau lam dinhmun asimi biakinn cu Khristian tinkim ih inn, biak khawm nak tuah nak hmun, ahleicein Khristian pawlih nunnak asimi Missa raithawinak hmun a si. Cuvekthothoin anmah pawl cu Pathian ih a thawm huham a tumzet mi thilti thei nak pawl a suah nak dawhhna khal asi. (Biak khawm nak thawn pehpar mi lam hmuh mi cauk - no.10) Pathian cu a sersiam mi minung cu a har bik mi can khalah a hnong dah lo. Zangfah ank a suah ter. Kanmah pawl cu Bawi Jesuh thi le sa sang loin caan reipi um in kan pial. Hitivekih reipi kanumnak in kan nunnak ah Bawi Jesuh thi le sa ziang tluk in a thu pit thu, Bawi Jesuh thi le sa ih a san, a man khung zet mi a man cu kan thei. Curuangah din hmun ih in pek veten Pathian hmuh duh tuk nak, biak duh nak thinlung, Bawi Jesuh thi le sa sang duh nak thinlung, mai unau pawl hnen pek duh nak thin lung pawl thawn Bawi Jesuh thi le sa hnen kir sal cio uh si. Cutilawngah kan zaten khal zum nak, duhdawt nak le ruahsan nak thawn nunram cu famkim zet in kan nung thei ding.

            Missa raithawinak ah mah rori tel dingah a tul,

            Online ihsin thlah mi Missa raithawinak cu biak inn a feh thei lo tu dam lo pawl hrangah a thupi tuk nan, cumi ih tel nak cu mah rori tel vekin san a nei tuk lo. Aiawh a ngah lo. Line ihsin Pathian biak khawm nak lawng tuah asile kanmah hrang ih minung sinak a la tu Pathian thawn hmunkhat ten um nak dingcu a hlat ter ding timi cu tih a nung. Ziangruangahtile minung pawl karlakah Pathian sinak cu minung sinak thawn a um mi Bawi Jesuh cu a lang men a silo. Amah rori a um. Ziangruangahtile Bawi Jesuh in "Bawipa thi le sa sang loin reipi a um tu, a tih tu pawl, thin tha a nau ih beidong ih a um mi na unau pawl kir sal dingah ko aw" tin a sim. Johan 6:56 ah Pathian le mah tong awk nak cu tha a tho ter. Thlah poih in sung ter hlah. Aiawh khal a ngah lo. Curuangah covid nat suan awk nak mal in hmun tinkim ih thu nei tu pawl ih on mi vek in miung pawlkom in biak khawm nak tuah a theih ding. Cuvek thotho in Bawi Jesuh thi le sa thawn reipi a hlat aw mi u le nau pawl Bawipai hnen hruai sal ding.

            Missa raithawi nak ah tel dingah forhfial,

            Bawi Jesuh thi le sa raithawi nak ah tel thei nak tam deuh dingah, cutivekin nat suan awnak a karh zai lo dingah lam hmuh mi thawn kaih aw in tuah dingah, cutilawngah kawhhran mipi pawl in thinphan nak thinlung, tih nak thinlung in a hlat dingih thinlung hnangam ten an rat ding thu, a tha hnem deuh ih, ngai ngai asimi lamhmuh mi pawl cu hmun le ram thawn pehpar mi Diocese Bishop pawl ih ruah san nak par khalah tampi a um thu, asinan thu nei tu lam ih biak khawm nak cu siat suah dingah tuah nak on asi lo thu, Diocese uk tu pawl lawngin harhdam ank lam ihsin khal siseh, hmun le ram ih thu nei tu pawl ih lam hmuh mi pawl hnong lo dingah tuah ding a si. Nu Pawlpi ih biak khawm nak daan pawl thlun uh. A tu vekih a thupi mi caan ah biak khawm nak tuah ding asinan Nu Pawlpi ih biakkhawm nak thawn pehpar mi daan vekin tuah ding asi. Cuvek thotho in kawhhran mipi pawl ih caan tha khal theih pi ding a si. Ti duh san cu Bawi Jesuh thi le sa san thei nak le Bawi Jesuh thi le sa raithawi nak ih tel thei nak khal tuah sak ding. Nat suan dingcu tih tuk in harhdam nak zung, asilole Diocese Bishop ih lam hmuh mi hnakih luan in khar nak tuah a ngah lo. Diocese Bishop thu ngai ding. Tipalh nak a um lo ding ih a tha bik mi cu thu ngai nak a si.

            Nu Pawlpi ih daan thlun nak kan ti tikah Diocese Bishop thu ngai nak a si. Harsat caan ah tahthim nakah raldo nak hmun, pulhnat sia a um caan vekih tikcucaan ah Diocese Bishop pawl, mai ram ih Catholic Bishop pawl pawlkom ih lam hmuh mi pawl cu thaten thlun ding. Thu ngai nak cu Nu Pawlpi hnen zumnak thawn ap mi thilmankhung kilhim nak a si. Asinan a thupi mi caan ah lam hmuh mi thlun ding mi thuhla pawl cu cui thupi mi caan theh hnuah, a hlan vekih dinhmun thlen veten hnongin biak khawm nak cu a hlan vekin tuah ding a si. Mipi pawl ih harhdam nak le kumkhua rundam nak Nu Pawlpi cu mipi zaten man a nei ter vivo ding a si. Ziangruangahtile leitlun nunnak cu a thupit vekin, kumkhua nunnak cu a thupi sawn. Nu Pawlpi cu mipi pawl ih harhdam nak khal a thupi ih ret ih tuah phah in lungawi nak thuthang sim in kumkhua rundam nak ah feh tlang ding a si thu Cardinal Sarah in himi ca ah a ngan. Himi thuthang cu Vatican thuthang ihsin kan ngah mi a si.

https://bit.ly/3kjuryN