Tuluk -Vatican pehtlai awk nak siat ter thei tu tuah nak pakhat Siangbawi pakhat ih hmuh daan. September 17, 2020

Tuluk -Vatican pehtlai awk nak siat ter thei tu tuah nak pakhat Siangbawi pakhat ih hmuh daan.

September 17, 2020

            Tuluk ram laifanmnakih Catholic Siangbawi pakhat in Tuluk ramih tuah tuan nak cu kawhhran hrangah thil tha lo din hmun a suah ter thu an sim. Hitivekih sim nak cu a liam zo mi kum hnih hrawngah Beijing khuapi ah Vatican le Tuluk lungkim nak ca an ngan mi a siat ter. Cui Siangbawi cu Francis Hu tin an ko. Vatican-Tuluk cozah pawl ih lungkim ih ca ngan mi aiawh tu pawl cu a tui a cang rero mi Tuluk cozah le Catholic kawhhran ih dinhmun ngaingai an thei lo. Hitivekin an lung a kim nan thu tak ahcun Internet parih an tar mi Catholic kawhhran thawn pehpar mi thuhla pawl cu kham a si. Tarlang a ngah lo. Cutivekin Biakinn pawl, biak nak lam hminsin nak asimi thinglamta khal tuletu siat suah sak an tuar. Nauhak pawl khal biak nak lam thuzirh nak pawl khal an on lo.

            Fr. Francis Hu cu amah le mah "a niam zet mi Pathian hnatuan tu" tiin a ti aw. Amah in Vatican le Tuluk cozah karlak ih lungkim nak ca ngan mi cu ram khel lam tuah nak lawng a si. Tuluk ram sung Catholic kawhhran pi din hmunah a hlan vekin um sal nak ding thawn pehpar in lungkim ih an ngah mi thawn pehpar in tubaite ah Vatican ih secretary Cardinal Pietro Parolin ih a sim mi cu a dang lam tuk lo. Cardinal ih a sim nak vekin Tuluk cozah thawn nuam teten reipi tuan tlang dingah asi thu, (2018, Sep 22) ni ih an ngan mi lungkim nak pawl lakah pakhat cu communist ih uk mi ram then pawl ih ret mi Bishop pawl cu Nu Pawlpi in theih pi dingah a si.

            Cui lungkim nak ruangah Pope Francis cu communist cozah ih ret mi Bishop 8 cu a theih pi. Cumi lak ah (2017) ah pakhat cu a nun nak a cem. Pehbet in Fr. Hu in a tlun ih lungkim nak cu kawhhran mipi mal nak hmun lawngah san a neiih, Tuluk Catholic a tam sawn cu hitivek thil cang rero mi cu an theih pi lo. A mang khal an mang lo. Curuangah el awk ank ding lungkim nak cu ram khel lam tuah daan lawng asiih, Tuluk Catholic kawhhran pawl hrangah ziang hman san  a neih lo thu a sim. Lungkim nak ca an ngan nak (2018) kum ihisn thok in an on nawn lo. Biak inn pawl siat suah nak, thinglamta pawl kiak nak pawl khal zo hman in sim rel thei nak an pe lo. Himi thil cang mi cu Tuluk ram sung ih Catholic mipi tampi in an tuar ih, nasa zet in sun nak pawl an tuar.

Mino pawl khal Catholic thuhla zir nak pawl, Khristian Pathian thu kilkhawi nak pawl khal tuah thei nak an on lo. Biak nak lam hnatuan nak cu nasazet in an kham ih, tikcu tin, hmun tin ah hnaihnok nak an tuar. Pathian rian tuan tu pawl cu thil sual tuah tu vek in hminsin nak an tuar ih, Pathian rian tuannak khal a mal vivo. Thudik lo mi tuah vek in an ruat . Tuluk cozah ih theih pi mi kawhhran ahcun himi lungkim ih ca an ngan ruangah an lung a awi tuk. Asinan Tuluk ram ih Catholic kawhhran parah ziangtin an tuah timi cu an thei lo.

            Ziangruangahtile anmah pawl cu Tuluk ram ah an um lo. Ram leng lawngah an um. Anmah pawl cu Tuluk ram ih Catholic kawhhran an aiawh lo ruangah an thil ti thei nak a dong tu pawl khal ai an awh  thei lo. Ziangruangahtile Tuluk Catholic kawhhran mipi pawl an hmuhnak cu Tuluk Catholic kawhhran ih dinhmun cu ram leng ah um in an hmuh nak thawn a dang aw tuk. Tuluk cozah thawn rem aw zet ih an uah nak cu kum 40 a luan zo. Thurelkhawm nak thawn naih awk rero asinan thleng aw ih thanso nak hmuh asilo. Asinan Hong Kong ih than so nak cu tu ah hmuh a theih. Fr. Hu in hmun le ram ih Tuluk Bishop pawl hnen khal ah tha zang ngah loih Tuluk Catholic Bishop pawl khal cui lungkim nak ca ngan dingah an tuah. Asinan an unau pawl ih aw ngai dingah, sim rel thei nak nei dingah an on lo.

            Thenkhat hmun ih biak nak lam upa pawl in Vatican le Tuluk cozah karlak ih lungkim nak cu Tuluk cozah ih hril mi Bishop pawl hnenah Vatican ih an thei pi hnu diriam zet in an thangso thu, cuvekthotho in corona virus dokham nak hnatuan ah leihnuai ih a um mi Pope ih thu ngai mi Catholic Bishop pawlih tuah tuan nak cu an theih pi vekin tuan tlang nak a um. June thla ihsin August thlasung Tuluk cozah ih leihnuai Bishop pali cu thudik in si nak an pek. A tu Vatican le Tuluk cozah ih pehtlai awk nak cu Tuluk ram ih Catholic pawl hrangah san a nei lo tuk nan Vatican le Tuluk cozah ih pehtlai awk nak tha dingah ruah san a si thu, thla khal a cam sak thu, a veihnih nak Vatican thu relkhawm nak ah langhngan zetih thureltlang nak cu tha a pek thu a sim. Himi thuthang cu Licas thuthang ihsin kan ngah mi a si.

Photo courtesy of: Noel Celis/AFP

https://bit.ly/3c5lCFM