Florida Biakinn a siatsuah tu hrangah thlacam sak ding le ngai thiam dingah Parish Priest in zaangfah dil. September 23, 2020

Florida Biakinn a siatsuah tu hrangah thlacam sak ding le ngai thiam dingah Parish Priest in zaangfah dil. September 23, 2020

         America ram, Florida ramthen ih um Incarnation (minung cannak a lak tu) Catholic Biakinn a bohih meisa ur tu an hawl. Cui thilcang cu tlawngkai ninga ni, nazi 10:35 ih cang mi a si.

         September 20 ni ah cui Biakinn ih Fr. in CCTV (Video) file ihsin Kawhhranpi pawl hnenah sual tuah tu hrang thlacam sak dingah le ngaithiam dingah a dil ih Biakinn cu siatsuah nakin mal te a luat ruangah khal Pathian hnenih lungawi thu sim dingah a rak forhfial.

         CCTV ih an zoh mi vek si le cui sualnak tuah tu cu mino a si ih sual a tuah laiah angki a hruk lo. A hmai cu hmaihuh nak in a hup hlei ah kuthruk rang a hruk.

         Biakinn sungah a lutih a tim tuah mi rawng nei lo tidai cu khukbil nak khung pawl ah a toih rero. Cui hnu ah meisa a ur ih meisa a hleu deuh in a tlan. Ziang vek thilri hman ru tum a bang lo. Hi biakinn cu Florida ramthenih nisuahnak saklam ah a um.

         Meisa kang an theih veten meisa mittu pawl an ko ih zamrang ten meisa cu an thah sak. Bawipai Thi le Sa retnak innte le pulpit pawl cu tawkfang nawn a rak kang. Cu vekin kawhhranpi pawl ih thlacamnak hmailam ih tonak pawl khal a rak kang.

         Parish Priest cu Michael Cormier a si-ih Biakinn rem that sal dingah a ra lai ding mi zarh, zungpit ni ah Missa raithawinak cu an cawlh ding thu a ruat nain hi vekih tuah le siatsuah duh tu pawl an lungawi pang ding.

         Missa raithawinak tuah lo a si le satan pawl hrangah thiltha lo tuah dingah caantha an ngah dingih an lungawi ding. Asinain, that lo nakin ziang tik hmanah a neh thei dah lo ding.

         Parish Priest in Kawhhranpi pawl hnenih a sim bet mi cu September 10 ni ih Cathianghlim siar mi Lk 6:27-38 sungta a si mi “Nan ral pawl duhdaw uh. A lo hua tu pawl par ah that nak tuah uh. A lo cam tu pawl khi thlawsuah pe uh la a lo hrem tu pawl hrangah thla cam uh,” ti mi catlang vun mangsal dingah a rak sim.

         Siatsuah dingin an tumtah mi an hlawhtlin ah siseh, sual tuah tu ih thinlung sungah a um mi a tha lo mi thinlung, mi huat nak thinlung pawl khal thlah phoih dingah siseh, kawhhranpi pawl thawn kom aw in thlacam in Pathian hnenah lungawi thu an rak sim.

         Tu vekih can nakin kan mah pawl lungrual ding, a hlan ai in khat le khat duhdaw aw ding le zum nakih hngetkhoh dingih ralrin pek nak a si tiah a rak sim. Diocese hotu khal in September 19 ni ah tha pe phah in thlacamnak thawn ca pakhat a rak kuat.

         Tui thilcang cu tui kum hrangah Florida ramthenah biakinn pawl meisa ur ih siat suah hnu ah a hlo ral mi thil a si. July 11 ni, zinglam ah Florida ramthen, Ocala ih um “remdaihnak Bawinu” Catholic Biakinn cu mino pakhat in a rak siatsuah.

         A ur caan cu kawhhranpi pawl Biakinn ih raithawinak tuah caan a si. Curuangah thiltha lo a tuah tu, kum 24 a si mi Stephen Anthony Shields ti mi cu an kai thei. A mah cu mi that dingih ruah nak, mei ur dingih ruah nak le relh tu pakhat khal a si.

         July thla sungah khal Miami Archdiocese ih um Biakinn pakhat ih Tuukhaal tha Jesuh sintuh (zuk) ih lu cu an phorh suak thei hrih lo. Kum 2019 ah khal Biakinn pakhat ur a tuar ih to nak tampi a rak kang theh.

         Cui thil tha lo a tuah tu cu kum 32 a si ih thinlung lam ih mi kim lem lo mi a si. America ih um Catholic Biakinn pawl, Biaknak lam ih inn pawl, biaknak lamih sintuh (zuk) tampi tu le tu siatsuah a tong mi thuthang pawl a tam deuhdeuh.

         America ram thlengawk nakih a thupi zet mi ih a tel ruangah sunlawih nak pek mi St. Junipero Serra ih sintuh khal mi dum, mi rang thuhla ah duh phorh tu mipi bur khat in an rak siat suah.

         July 10 ni ah khal Brooklyn Diocese ah Biakinn sungih um Bawinui sintuh le Puithiam cannak phunsangtlawng ih um Bawinui sintuh pawl siatsuah a ton thu thuthang a rak suak.

         Cui thuthang an suah hnuih nikhat nakah Boston ih um St. Peter Biakinn hmun ih tuah mi Bawinui sintuh (zuk) khal siatsuah a tong. Curuangah cui a siat thu cu thuthang an rak suah.

July 11 ni ah kum 249  a rei zo mi Biakinn siseh, September thla ah Louisiana ramthen ih mi pakhat in biakinn kulh nak pawl, thir ih tuah mi sangkaa pawl a siatsuah ih biakinn sungah lut in a hmuh mi sintuh (zuk) hmuahhmuah a rak thawi siat theh thu, thiltha lo tuah tu an kai ih a sual a rak phuang.

         September thla ah khal Texas ram then, El Paso ih um St. Patrick Cathedral sungah khal thiltha lo tuah tu pawl thawn an tuah mi pawl a um vekin California ih a cang mi thilcang cu Biaknak lam ih cohlan dan thawn a kaih aw lo mi ramkhel in a siat suah nak cu thinnuam lo za a si.

         Hi thilcang pawl sungah a dang harsat nak a tuah tu pawl an tel vek in sintuh upat peknak a dodal tu pawl khal an tel. Asinain, thilcang tampi cu a tuah tu an hmu hrih lo.

         Hi thuthang cu September 23, 2020 ah CNA thuthang ih kan don mi a si.

Photo courtesy of : Hillsborough County Sheriff's Office

https://bit.ly/36aAYI9