Vatican ih diplomat upa pakhat in Vatican le Beijing karlak ih lungkimnak lak mi hi tuah a man a ti. October 9, 2020

Vatican ih diplomat upa pakhat in Vatican le Beijing karlak ih lungkimnak lak mi hi tuah a man a ti.

October 9, 2020

            Vatican ih ramdangdang thawn pehtlai awk nak tuanvo neitu Archbishop pawl Gakagher in China ram ih Bishop hril nakah Vatican le Beijing karlakih lungkim nak lak hnuin thanso nak tampi a um tiah hi lungkim nak lak mi ih thathnem nak a neih zia a sim. Beijing hi China ram ih Bishop hril nak thuneih nak ra pe lo tu sehla Vatican le Beijing karlak ih pehtlai awk nakah tuvekin thanso nak a um lo ding. Hi thuneih nak"Beijing ih Bishop hril nak ih thuneih nak" um lo cun, tui hnu kum 10 sungah Pope thawn a pehtlai aw mi Bishop hi China ram sungah hmuh an har tuk ding ti'n khal Archbishop Pawl Gallagher in Crux timi Catholic media hnenah a sim. "Tui kan thok lo cun, nei hnu san tiang a thleng vivo ding" ti khal in a sim bet.

            Vatican le Beijing karlakih lungkim nak timi cu 2018, September 22 ih Catholic Pawlpi le China ram karlakih lungkim nak rak tuah mi a si. Hi lungkim nak tuah mi in kohhran sung ah siseh, a lenglam ah siseh thubuai tampi a suah pi. Lungkim nak an tuah mi sungtel mi thuhla pawl cu tu tiangah thup an si lai ih hi lungkim nak ih tel mi pakhat ruangah Pope Francis in Pope ih theihpi nak tel loih China ram ih Bishop rakhril cia mi minung 8 cu Catholic Bishop dinhmun ah a co hlang thluh.

            Himi lungkimnak tuah mi a pom tu pawl cun hi lungkimnak tuah mi in 10-12 million mipum a um mi Chinese Catholic zumtu pawl hrangah rualrem nak le humhim nak a pe thei ding ti'n an zum. 1957 kum ih communist pawl in Chinese patriotic Catholic Association timi an din hnu in China ramih Catholic zumtu pawl lakah under-ground Catholic (Pope thawn a pehtlaih aw mi) le Patriotic Catholic (China ram thawn lawng a pehtlaih mi) ti'n phuaih hnih ah an then aw.

            Archbishop Paul Gallagher cun Crux thawn interview tuah niah Vatican cun hi lungkim nak tuahmi hi kum 2 than sal ding a duh thu a sim nan, Beijing lam in zianghman thu leh nak a um hrih lo thu le tui thla cem tiangih thuleh nak a um lo cun himi lungkim nak tuah mi khal a san a cem ding thu asim. Sihmansehla, Beijing lam ihsin a cohlan ding a zum thu khal a sim bet. Kan dung thla ah China ih ram dang thawn pehtlaih awk nak zungpi thunvo nei tu Zhao Li Jian in Beijing khal in Vatican thawn lungkim nak tuah mi thansal ding a duh ve thu hitin a sim. "Kap hnih pehtlaih awk nak hi a hngetkhoh sinsin dingih a thangso sinsin ding".

            Archbishop Paul Gallagher in hi kaphnih lungkim nak tuah mi hi kumkhua daih a si lawlaw ding a duhthusam thu khal a sim. Tui kum hi Vatican in kaphnih lungkim nak tuah mi thansal a duh nak thu ah Archbishop Paul Gallagher in "Vatican in himi lungkim nak tuah mi kum 2 daih in thansal a duh nak pakhat cu himi lungkim nak thawngih kan ruahsan mi thil tampi a cang ngah hrih lo ruangah kan lung a si thei hrih lo bik asi" ti'n a sim.

            Vatican le Beijing karlak ih lungkim nak tuah mi parah mawhthluk nak khal tampi a um ih a mawhthluk tu pawl lakah HongKong ih Bishop rak tuan duh tu Cardinal Zen tla a tel a si. Kan dung February thla sung khal ah China ram ih under-ground Church timi Pope thawn pehtlaih awk nak nei cia mi Catholic zumtu pawl cu Vatican le Beijing karlakih lungkim nak an tuah mi ruangah an hlo vivo ding ti phan a um nasa tiah Cardinal Zen in ralrin nak a rak pe rero zo a si. Himi thuthang cu Licas thuthang ihsin kan ngah mi asi.

https://bit.ly/3jF3xkZ                         ...