A cawl zo tu Bangladesh Bishop in lungawi thu sim October 6, 2020

A cawl zo tu Bangladesh Bishop in lungawi thu sim

October 6, 2020

              Bangladesh ram, khuapi Dhaka ih Archbishop Cardinal Patrick D' Rosario cu a cawl thlang ding ih a bawm tu pawl hnen lung awi thu a sim. October 2 ah St. Mary Cathedral , Dhaka ah lungawi thusim nak Missa raithawinak a tuah ih, a dinhmun a luah tu ding Bishop Archbishop Bejoy Nicephorus kha a hmuak. Cardinal cu "himi tuanvo ihsin a colh tikah a thinlung a zang ding vekin kawhhran mipi pawl hnen khal a lung a awi thu, petbet in hna a tuan tu ding Bishop khal thlacam nak thawn bom tlang dingah" zangfah a dil. Kum le harhdam nak lam dinhmun ruangah cawl dingah dil nak cu Pope Francis in a cohlang ih Sylhet Diocese ih Archbishop kha a dinhmun la dingah a hril.

              Cardinal cu Dhaka Archbishop ih a pahra nak Bishop khal a si. Lung awi thu asim nak ah "ahmaisabik hril mi Pathian, cui hnuah zum in tuanvo pe mi Pope a dotdot hnen khal a lung a awi thu, cuihnu ah ram sungih hnatuan pi a nau le Bishop, Siangbawi pawl ih bom nak ruangah khal siseh, cozah le kawhhran mipi pawl par khalah a lung a awi thu a sim. Cui hleiah Bishop in kum 30 sungih a sual nak pawl, tuanvo a hlen lo mi pawl le nat nak pawl hrangah Pathian le minung pawl zaten ngaithiam a dil thu zangfah a dil.

              A colh hnuah menmen Siangbawi nunram ah a um ding ih, cangan, casiar nak lawng in ka nun ram ka hmang ding tiin a sim. Kawhhran piih tuanvo a pek khal asile rintlak zet in a tuan bet ding ih, Pope le Kawhhran thukha ka ngai ding tiin a sim. Himi thuthang cu RVA thuthang ihsin kan ngah mi a si.

https://bit.ly/3nTBmBq