Coronavirus ruangih a thi tu Polish Bishop October 21, 2020

Coronavirus ruangih a thi tu Polish Bishop

October 21, 2020

         Polish Bishop cu covid-19 ruangah tlawngkai nihnih ni, a kum 83 ah a rak thi. Bishop Bogdan Wojtus cu October 20 sun ah a thi tiah Gniezno ih Archdiocese ih sim vekin kan thei.

         Gniezno archdiocese ih a cawl zo tu auxiliary Bishop Wojtus cu coronavirus nathrik a ngah ih kan dung Zarhte ni ah sizung ah an feh pi. A ruakvuinak cu Gniezno Cathedral ah October 24 ah an tuah ding.

 Cui hnu ah Poland nitlaknak lamih a lai fannak Gniezno ih um St. Peter Cemetery Biakinn ah a dang auxiliary Bishop pawl thawn Biakinn hnuai khaankhat ah an re ding.

         Wojtus cu auxiliary Bishop ah 1993 ah Pope John Paul II in a rak nemhnget ih 2012, a kum 75 tiang a rak tuan.

         Polish Bishop pawl cu kan dung zarh pawlah corona nathrik an ngah. Cu mi ah Polish Bishop’s conference ih President, Archbishop Stanislaw Gadecki tla a tel tiah an sim.

         October 5-6 ni ah Lodz ih an tuah mi thurelkhawmnak vek a si le Bishop pawl thurelkhawmnak khalah a nat thu an rak tel tiah a sim.

         Leitlunhuap ah coronavirus nathrik a ngah tu Catholic Bishop a mal bik 13 hrawng an thi zo. Philippines Bishop’s conference ih president Archbishop Oscar Cruz, Brazilian Bishop Henrique Soares da Costa le Mirang Bishop Vincent Malone tla an tel tiah an sim.

         Italy thlanglam Caserta ih Italian Bishop Giovanni D’Alise cu corona nathrik ruangih sizung a thlen hnu ni rei lo te, October 4 ni ah a rak thi.

https://bit.ly/2HrUeXc