A ol zet mi thil harsa”

Homily for Friday (9.8.2024)
RVA ihsin thuthangtha ngai in thlarau thazang latu nan zate hnenah kan Bawipa Jesu Khrih ih zangfahnak, Pa
Pathian ih duhdawtnak le Thiang Thlarau ih pawlkomnak cu a thar in thleng hram seh tiah thlaza cam phah in
cibai ka run lo buk hai a si.
Tui tum ah ‘A ol zet mi thil harsa” timi thulu thawn hlawmawknak run neih ka duh a si. Hi thulu hi Jesu Khrih
ih dungthluntu sinak thawn pehpar in ka rel duh mi a si.
Tuini hrang Gospel hi a tawi pam ih ka run siar thluh dingih tha te’n kan rak ngai cio pei uh!
Mt 16:24-28
Cun Jesu in a dungthluntu pawl hnenah, “Zokhal keimah thlun a duhtu cu amah ih duhnak kha taan in a
thinglamtah phur in I thlun seh. Ziangahtile zokhal mah nunnak hum a duhtu cu a nunnak a sung ding; asinain
keimah ruangah a nunnak a liamtu cun a nunnak a hum ngah ding. Mi pakhat in leilung pumpuluk co khalsehla
a nunnak a hloh ahcun ziang thathnemnak so a um? Zianghman a thahnem lo! A nunnak kha zianghman in a lei
theisal nawn lo ding. Milai Fapa hi a Pa ih sunlawinak le vancungmi pawl thawn a ra cing dingih mi
hmuahhmuah kha an hnatuanmi vekin tuanman a pek ding. Fiang tein ka lo sim: Milai Fapa hi Siangpahrang
vekin a rat nan hmuh hlan lo nanmah lakah a thi lo dingmi nan um”, tiah a ti.
Duhdawtmi u le nau pawl, a tlun ih ka run siarmi thuhla hi Jesu Khrih ih dungthluntu tha sinak ih tahfung kan ti
thei a si. Christian kan si cun Jesu Khrih ih dungthluntu cu kan si cio ko. Asinain, tuini ih kan Bawipai’
tongkam kan theih mi hin discipleship timi Jesu Khrih ih dungthluntu tha sinak ah thil tulmi pa 3 a um timi thu
in run pholang sak a si. Hmaisabik ah mai’ duhnak taan ding ti a si. Himi hi kan hrangih thil har bik a si kan ti
tla le a sual lo ding. Himi hi kan thinglamtah khal a si ih himi kan ti suak thei cun, a pahnihnak ih tulsam mi
maih thinglamtah phurh ding timi khal kan hlen cia ah a cang mai. Cute pahnih kan hlen ngah suak lawnglawng
ah Jesu Khrih ih duhnak vekin tha te’n a dung kan thlun thei ding.
Tuisun tuini ah, Jesu Khrih ih dungthluntu tha ka si ti’n kan ti ngam cio maw? Nitin kan nunnak ah Pathian ih
duhnak maw kanmaih duhnak sawn kan thlun tam theu timi kan vun cek-aw hnik pei.
A caancaan ah kanmaih duhmi kan tuah ngah lawngah kan nuam zet dingah kan ruat theu nan, cuih kan duhmi
hi Pathian ih duhnak thawn a rark kalh a si ahcun, kan nuam thei lo lawng si loin buaibainak riangri inh in zel
theu sawn a si. Cun khatlei lamah, Pathian ih duhnak thlun duh ruangih kanmaih duhmi kan vun hrial/taan tikah
hmakhat te cu a har fualfo vek nan, nehhnu ih kan vun ruahsal tikah, lungawinak le hnangamnak in kan khat sal
theu lala fawn.
Himi hi tuini kan Bawipai’ timi zo khal keimai’ ruangah a nunnak a liamtu cu a nunnak a hum ngah ding a timi
a si ko lo ding maw? Jesu Khrih ih in pek duh mi nunnak hi, thi lo ih nun/ thaw thawt menmen a si dah lo;
leitlun nomnak cen men khal a si dah lo; sunglam nun hahdamnak a si ringring. Cuih sunglam nun hahdamnak
hum thei ding cun, lenglam nun kan liam ngam a tul – ti duhmi cu sunglam nun hahdamnak ngah thei ding cun
a dawnkhamtu taksa lam zawngih kan hiarmi/ tuah kan duhmi tete hrial/taan ngam a tul tinak a si.
Minung kan sinak ah sunglam nun hahdam ringring hi a theih lo; taksa hiarnak ih namnuai ruangih kan tluk
caan a tam. Hmansehla, kan tluknak hmun ih kan umlan ta ahcun, cuih nun hahdamnak thawn kan hla-aw lan ta
ih, zuam tento teih kan thawhsal tinte’n kan nun a hahdam sal ringring a si. Cuti ih thosal thei ringring dingin
kan Bawipai’ zangfahnak cun in tuam ringring ko; kanmah lam ih kan rin ding lawng a mamawh mi a si.
Na duhnak taan ding hi har na ti fualfo lai maw? Na thinglamtah phurh teh rit na ti tuk hrih ko maw? A keneh
zawh ih kan thlunmi kan Bawipa hi na mitthlam ah vun cuang ter hman aw! Amah thah nak dingih tuahmi
thinglamtah hi a rit zet ve so khaw; harsat a tuarnak khal a har fualfo ve so khaw; amaih duhnak thawn a rak
tuah mi tla a si ve lo kha. Gethsemane dum sungih a thlacamnak kha vun ruatsal hman! Tuah a duhmi si lo

hman sehla, amaih duhnak taanta in a Pa ih duhnak thlun ding a rak hril mi a si. Ziangahtile, a hrilmi ih
thathnemnak a rak hmu cia keukeu. Cumi cu kan rundamnak a si.
Khat lam zawngih kan sim a sile, a Pa a duhdawtnak le kanmah milai pawl in duhdawtnak ruangah thinglamtah
parih thihnak a rak hril kan ti mai ding. Cuih duhdawtnak ruangah cu hmuahhmuah a tuarnak hi a har lo a ti;
“Ka kawn cu a zang ih ka hnen in zir uh” in ti bet.
Nitin kan nunnak ah, kanmaih duhnak taan ih thinglamtah kan phurh rero mi ih thathnemnak hi sunglam nun
hahdamnak lawng si hlah khaw; Pathian thawn kumkhua nunnuamnak cen ding tiang thathnemnak a nei so
khaw.
Himi thathnemnak kan ruah ringring le Pathian kan duh taktak a si ahcun, hi thil harsa kan ti rero mi khal a ol
zet mi thil ah a cang mai.