“Holyland tuan tlangnak pawlkom” in Jerusalem ah kumtin khualtlawnnak tuah rero (May 24, 2022)

“Holyland tuan tlangnak pawlkom” in Jerusalem ah kumtin khualtlawnnak tuah rero

(May 24, 2022)

         Holyland tuantlangnak pawlkom (HLC) in a mai kumtin khawmzawhnak caanserh cu tui zarh ah a tuah thok rero thlang. A tlangpi ahcun January thla ah an rak tuah theu nan pulhnat ruangah kumhnih rei an colh hnu ah tu ahcun May 21-26 tiang an rak tuah. HLC pawlkom dinhmun in Israel le Palestine ah May 21 ah feh ding mi programme an rak bal ih Palestine Christian thuthang latu nunau a si mi Shireen Abu Aqual ih innsang cu mah pakhat ten riahsiatnak langter dingah Jerusalem khuapi leng ih um Beit Hanina ah an rak feh.

         Al Jazeer thuthang zungin thuthang latu nu cu May 11 ah an kai ih nitlaknak lam tipi kap ah Israel ralkap ih an do nak ah thahnak a rak tuar. English Bishop Dedan Lang ih hoha mi HCL aiawhtu pawlkom cu “Al-Liqa” Pawlpi zung ah Zarhpi ni zaanlam tinten tuah theu mi mansalnak caanserh ah a rak tel.

         Shireen ih u pa Anton Abu Akleh khal in Bishop pawl telnak le naihniam ten dinpi tu Pawlpi pawl hnen a lungawi a rak sim. A unu Shireen cu a tirhsiang ih tangdor mi nunau pakhat a si thu, a mai thuthang laknak hnatuan khal fimkhur ten apaw ih a rak tuan theu thu le a thihnak parah a dik ih a rang mi zingzoinak pawl tuah sak dingah zaangfah a rak dil. Kan dung rei lo te ah khal Latin Christian Pawlpi in a dang Christian hotu pawl thawn hi vek thahnak le May 13 ih tuah mi caanserh ih tuahmawhnak pawl cu nasa zet in a dodal thu a rak sim bet.

         Bishop Lang khal in HLC dinhmun in Shireen ih innsungsang thawn nai te ih a dinpi thu le a tel tu pawl khal thlacam sak cio dingah a rak sawm. Beit Hanina center ih mino pawl khal Bishop pawl in cibai an rak buuk.Cui hmun sungih um Christian unau pawl bomnak “thinlung thlarau umnak Jerusalem, kan thangliannak le fimnak in petu ram” ti mi motto thawn velnak tuah rero mi khualtlawnnak cu kum 2000 ihsin an tak tuah mi a si ih an tumtah mi cu ramkhel le nunphung sumdawnnak lam harsatnak phunkim a tong rero mi Holyland leiram ih um tu Christian pawlkom pawl bawm dingah a si.

Thlacamnak, khawmzawhnak le hiipnak

         Europe ram, saklam America le thlanglam Africa ram pawl ih Bishop pawl tel mi hi “tuantlangnak pawlkom” cu Vatican ih sawmnak thawn 1990 cem lam ah pawlkom an rak din. Hi pawlkom cu P-3 tiih kawh mi Prayer: thlacamnak, Pilgrimage: khawmzawhnak le Persuasion: hiipnak hrambun ih tuah mi a si tiah a sim. Kumtin tonawknak caanserh pawl ih hramthok daan a si mi “Prayer: thlacamnak cu kumtin thlacamnak thawn thok in Missa sumnak a tuah theu. Tonawknak ih a thupibik mi cu cui hmun ih um Christian pawlkom hnenih feh mi “Pilgrimage: khawmzawhnak caanserh” a si ih Bishop pawl cu khualtlawnnak caanserh sungih thuneitu pawl thawn khal an rak tongawk theu.

         “Persuasion: hiipnak” cu mai nunram thawn pehpar mi ram phunphun ih a thlensal hnu ah tuah mi hnatuan pawl ti duh san mi a si. Cui hnatuan pawl cu mai ram ih acozah pawl, Parliament pawlkom pawl, Israel le Palestine ih ram palai pawl, thuthang media pawl thawn an tonawk hnu ah Holyland ih um mi Christian pawl ih nunram parih a thleng thei mi thuhla phunphun an rak rel tlang mi a si tiah a sim.

         Hi thuthang cu Vatican thuthang ih kan ngah mi a si.

https://bit.ly/39pBtC7